حالقىمىزدىڭ تاريحىندا ەرلەردەن قالىسپاي اتقا قونىپ، جاۋعا جاپقان ارۋلار از بولماعانى بەلگىلى. ولاردىڭ ىزدەرى ىقىلىم زاماننان تاريح بەتىندە سايراپ جاتىر. ۇلى وتان سوعىسىندا وق اتىپ، ەلىن جاۋدان قورعاعان شولپان جۇلدىزدارىمىزدىڭ ۇزىگىن جالعاپ، ءوزى ۇستاز، ءارى اپا بولعان قازاقتىڭ قايراتكەر قىزى - ءشامشا بەركىمبايەۆانىڭ ەسىمى ەرەكشە اتاۋعا تۇرارلىق. ەلىمىز ءوز الدىنا دەربەس مەملەكەت بولىپ، شاڭىراق كوتەرگەندە العاشقى بولىپ قۋانعانداردىڭ ءبىرى دە وسى ءشامشا بەركىمبايەۆا ەدى. مەملەكەت جانە قوعام قايراتكەرى، بۇرىنعى ق ر ءبىلىم جانە عىلىم ءمينيسترى، پارلامەنت سەناتىنىڭ ەكس-دەپۋتاتى، حالىقارالىق پەداگوگيكالىق ءبىلىم بەرۋ اكادەميگى، ۇزاق جىلدار قازاق قىزدارىنىڭ قۇتحاناسى قىزپۋ-دى باسقارعان ءشامشا بەركىمبايەۆانىڭ تاۋەلسىزدىككە قوسقان ۇلەسى ەرەكشە.
الاشتىڭ ارداقتى قىزى ءشامشا كوپباي قىزىنىڭ بيلىككە كەلگەن باسپالداعى تومەننەن باستالدى. ول ءوزىنىڭ ەڭبەك جولىن قاتارداعى قاراپايىم مۇعالىمنەن باستاپ، مەملەكەت قايراتكەرى لاۋازىمىنا دەيىن ءجۇرىپ ءوتتى. سول جولدا ۇلتتى ۇيىستىرىپ، حالقىن قولداي ءبىلدى، ەرلەردەن قالىسپاي، مەملەكەت ءىسىنىڭ بەل ورتاسىندا ءجۇردى. ۇلت ارداقتىلارى د. قونايەۆ، ا.اسقاروۆ سىندى ساياسي تۇلعالارمەن قاتارلاسا ءجۇرىپ، سىننان سۇرىنبەي، ەسەلى ەڭبەگىن ەلىنە ارنادى. ءتىپتى سول جولدا ءوزىنىڭ پەندەگە تيەسىلى ۇلەسىن الماي، ۇلتىنىڭ مۇددەسىن جوعارى قويدى.
ۋاقىتتىڭ قيىندىعىنا قاراماستان الاشتىڭ ارداقتى قىزى ەل تاۋەلسىزدىگىنىڭ نىعايۋى جولىندا ەسەلى ەڭبەك ەتتى. سودان دا بولار ديماش احمەت ۇلى ەڭ جاۋاپتى جۇمىستى قاعىلەز قىزعا سەنىپ تاپسىرىپ، سەنىم ءبىلدىرىپ وتىرعان ەكەن. بالكىم، قونايەۆتىڭ كورەگەندىگى ءشامشا كوپباي قىزىنىڭ بيلىكتەگى جولىن اشقان دا شىعار. ول كىسى ءشامشانىڭ بويىنداعى ۇيىمداستىرۋشىلىق قاسيەتتى ەرەكشە باعالاعان ەكەن. الدىڭعى تولقىن اعالارى تۋرالى ەسكە العاندا ءشامشا اپاي شابىتتانىپ، تەبىرەنىپ كەتەتىن.
«ديماش احمەت ۇلىنىڭ سەنىمىنە يە بولۋدىڭ ءوزى ءبىر عانيبەت قوي. مەن ۇلكەن كىسىنىڭ قابىلداۋىنا جۇرەكسىنە كىرىپ، جىگەرلەنىپ شىعاتىن ەدىم. ول كىسىنىڭ تاكتيكاسى قىزىق بولاتىن، الدىمەن مەنىڭ پىكىرىمدى تىڭدايتىن. سوسىن، كوڭىلىنەن شىقسا، راحاتتانىپ كۇلىپ الاتىن. ءبارىبىر، ۇلكەن كىسىنىڭ مىسى باسىپ، ىشتەي ۋايىمداپ تۇراتىنمىن. ءبىراق، مەنىڭ پىكىرىمدى باعالاۋشى ەدى»، - دەپ ەسكە الاتىن ءشامشا كوپباي قىزى.
قازاق قىزدارىنىڭ ەتالونىنا اينالعان، بولمىسى بولەك، بەكزات جاننىڭ تاعى ءبىر قاسيەتى دوستىققا دەگەن ادالدىعى. ءوزى باسشىلىق ەتكەن وقۋ ورداسىندا الاشتىڭ ايىمدارى فاريزا، كۇلاشپەن جىر كەشىن ۇيىمداستىرىپ، ءجيى كەزدەسۋ وتكىزەتىن. كەزىندە فاريزا اپايدىڭ «قىز عۇمىرىنا» ءان جازعان اسەت بەيسەۋوۆ «بۇل ءاننىڭ كەيىپكەرى ءشامشا ەكەنى انىق سەزىلىپ تۇر» دەگەن ەكەن. سول فاريزا اقىن قايتپاس ساپارعا اتتانعاندا اقتۇتەك بورانعا قاراماستان استانانى بەتكە العان ءشامشا «فاكەڭە بارماسام بولمايدى. ول كىسىمەن قوشتاسپاسام، ءوزىمدى ەشقاشان كەشىرمەيمىن» دەگەن ءبىر اۋىز ءسوزى قازاق قىزدارىنىڭ بىر-بىرىنە دەگەن قۇرمەتى ەمەس پە. مىنە، سول ءبىر اياۋلى جاننىڭ كەسەك مىنەزى مەن قايتالانباس بەينەسى ماڭگى ەسىمىزدە قالدى.
عيبراتتى عۇمىر كەشىپ، شىنايى قۇرمەتكە يە بولعان جاننىڭ قاسيەتى، ىسكەرلىگى مەن قابىلەتى تۋرالى كوپ ايتۋعا بولار ەدى... ويتكەنى، ءشامشا كوپباي قىزى ءوزىنىڭ ىسكەرلىگى مەن قابىلەتىنىڭ ارقاسىندا سان ءتۇرلى سالادا، باسەكەگە قابىلەتتى قوعام قالىپتاستىرۋدا ابىرويمەن ەڭبەك ەتكەن جان. قازىرگى قولدانىسقا ەنگەن «پەداگوگ مارتەبەسى» تۋرالى زاڭدى العاش بولىپ قولعا العان دا وسى ءشامشا بەركىمبايەۆا ەكەنىن بىرەۋ بىلسە، بىرەۋ بىلمەس. ساۋلەلى دە سانالى عۇمىرىن جاس ۇرپاقتى تاربيەلەۋگە، ۇلت مۇددەسىنە قىزمەت ەتۋگە، ءبىلىم مەن عىلىم سالاسىنا ارناعان زيالى جاننىڭ سوڭىندا، ءوزى ايتقانداي «ىزگىلىككە تولى جولى» قالدى. ول كىسى ۇنەمى «مەن ىزگىلىكتى ىزدەپ جۇرگەن جانمىن، ءالى دە ىزدەۋمەن كەلەمىن» دەپ ءجيى ايتۋشى ەدى. بالكىم، ءوزى ىزدەگەن ىزگىلىكپەن جولىققان دا شىعار..