بۇل ءىىم-نىڭ مالىمدەمەسى.
2023 جىلدىڭ باسىنان بەرى كريمينالدىق پوليسيا قىزمەتىنىڭ جەدەل ۋاكىلدەرى 2،5 مىڭ ىزدەۋدە جۇرگەن قىلمىسكەردى ۇستادى، دەپ حابارلايدى Almaty-akshamy.kz
ىزدەستىرۋ جۇمىستارى تەك ەل اۋماعىندا عانا ەمەس، باسقا مەملەكەتتەردە دە جۇزەگە اسىرىلادى
ارادا جىلدار وتسە دە، شەتەل اسقان قىلمىسكەردى ۇستاۋ، دالادا جوعالعان بالانى تابۋ، بەلگىسىز جاعدايدا قازا بولعان ادامنىڭ جەكە باسىن انىقتاۋ – ءىىم كريمينالدىق پوليسيا قىزمەتكەرلەرىنىڭ جۇمىسىندا كەزدەسەتىن دۇنيەلەر.
2023 جىلدىڭ باسىنان بەرى بۇل قىزمەتتىڭ جەدەل ۋاكىلدەرى 2،5 مىڭ ىزدەۋدە جۇرگەن قىلمىسكەردى ۇستادى، ونىڭ ىشىندە:
34 كىسى ءولتىرۋشى؛
17 قاراقشى؛
84 توناۋشى؛
10 بوپسالاۋشى؛
11 زورلىقشى؛
87 ەسىرتكى قىلمىسكەرى بار.
«مىسالى، وسى جىلدىڭ شىلدە ايىندا شىمكەنتتە جەدەل-ىزدەستىرۋ ءىس-شارالارى بارىسىندا ءبىزدىڭ قىزمەتكەرلەر 2018 جىلى دۋبايدا كىسى ولتىرگەنى ءۇشىن ىزدەۋدە جۇرگەن ەر ادامدى ۇستادى. سونداي-اق تارازدا 2022 جىلدىڭ قاراشا ايىنان باستاپ قاراعاندى وبلىسىنىڭ پوليسيا دەپارتامەنتىمەن كىسى ولتىرۋگە وقتالعانى ءۇشىن ىزدەۋدە جۇرگەن ەكى ازامات قۇرىقتالدى»،-دەدى ق ر ءىىم كريمينالدىق پوليسيا دەپارتامەنتى باستىعىنىڭ ورىنباسارى رۋسلان نازاروۆ.
قىلمىسكەرلەردى ىزدەۋ تەك ەل اۋماعىمەن شەكتەلمەيدى. ىزدەستىرۋ جۇمىستارى باسقا مەملەكەتتەردە دە جۇزەگە اسىرىلادى. بۇل رەتتە ينتەرپولدىڭ ۇلتتىق ورتالىق بيۋروسىنىڭ مۇمكىندىكتەرى كەڭىنەن قولدانىلادى. سونىمەن قاتار تمد-عا قاتىسۋشى ەلدەردىڭ اۋماعىندا جىلىنا ەكى رەت «ىزدەستىرۋ» وپەراسياسى جۇرگىزىلەدى.
«ەلدەن تىس جەرلەردە جىل باسىنان بەرى 70 قىلمىسكەردى ۇستاپ، ودان بولەك تاعى 36 ىزدەۋدە جۇرگەن ادامدى انىقتادىق. ولار اقش، شۆەسيا، گەرمانيا، تۇركيا، سونداي-اق وزگە دە الىس-جاقىن ەلدەردە تابىلدى»،-دەپ اتاپ ءوتتى رۋسلان نازاروۆ.
قازاقستان ءىىم جەدەل-ىزدەستىرۋ توپتارى شەتەلدە 34 قىلمىسكەردى ۇستاپ، حابار-وشارسىز كەتكەن ءبىر ادامدى تاپتى. ال قازاقستان اۋماعىندا باسقا مەملەكەتتەردىڭ قۇقىق قورعاۋ ورگاندارىمەن ىزدەۋدە جۇرگەن 374 قىلمىسكەر تابىلدى.
«ماسەلەن، ءبىزدىڭ جەدەل-ىزدەستىرۋ توبىمىز قاراشا ايىندا گرۋزيا قالالارىنىڭ بىرىندە 2019 جىلدىڭ ساۋىرىنەن 2020 جىلدىڭ اقپانىنا دەيىن قارجى پيراميداسىن قۇرعان جانە باسقارعان كۇدىكتىنى ۇستادى. ول ازاماتتارعا 2 ملرد تەڭگەدەن استام شىعىن كەلتىرگەن»،-دەدى سپيكەر.