بابالارىمىزدىڭ ايتقان ءاربىر سوزدەرىنىڭ ءمانى تەرەڭ ماعىنالى. «بالاڭ وزىڭە تارتسا جۇبان، قوعامعا تارتسا قۋان»، - دەپ بەكەر ايتپاعان دانا حالقىمىز. مۇنداعى نەگىزگى ءمان قوعاممەن ەتەنە ارالاسۋ، قوعامعا پايداسىن تيگىزۋ، قوعامدا بەلگىلى ءبىر ورىن تابۋ ماقساتىندا ايتىلسا كەرەك-تى. ال سول بالانىڭ قوعامعا، ەلگە پايداسى تيەتىن ازامات بولىپ قالىپتاسۋىنا الدىمەن اتا-انانىڭ سودان كەيىن مەكتەپ ۇجىمىنىڭ تيگىزەر اسەرى وتە مول. بالا الدىنداعى جاۋاپكەرشىلىكتىڭ جۇگى جەڭىل ەمەس. «اكەگە قاراپ ۇل وسەر، شەشەگە قاراپ قىز وسەر»، - دەگەن بابالارىمىز. دەمەك، بالاڭىزدىڭ بولاشاعىن قالاي كورگىڭىز كەلسە وندا سىزدە سونداي بولعانىڭىز ابزال. بابالارىمىز ونى «بالاپان ۇيادان نە كورسە سونى ىلەدى»، -دەپ ءبىر اۋىز سوزگە سىيدىرعان.
يا، ۋاقىت العا سىرعىعان سايىن زامان تالابى دا وزگەرىسكە ۇشىراپ جاتقانىن جوققا شىعارا المايمىز. كەشەگى مەن بۇگىنگىنى سالىستىرۋ مۇمكىن بولماي بارا جاتىر. عالىمدار مۇنى اقپاراتتار اعىنى زامانى دەپ تە توپشىلاۋدا. ونىسىمەن تولىق كەلىسۋگە بولادى. ءقازىر قولىڭىزداعى تەلەفوننىڭ ءوزى اقپارات قۇرالىنا اينالعانى قاشان. الەۋمەتتى وزىنە تەلمىرتكەن الجەلى تالاي وتباسىنىڭ شىرقىن بۇزىپ، ءتۇپ-تۇزۋ تاربيە الىپ كەلە جاتقان بالالاردىڭ ومىرىنە سىزات ءتۇسىرىپ جاتقانى اششى دا بولسا شىندىق. ءتىپتى، كەيبىر بالعىن بالالار بلوگەر بولامىز دەپ ماقساتتا قۇرعانى قوعام ءۇشىن ءقاۋىپتى ەكەنىن جاسىرماۋىمىز كەرەك. بابالارىمىز «اۋىرۋىن جاسىرعان ولەدى»، - دەپ بەكەرگە ايتپاسا كەرەك-تى. وسىناۋ قوعامعا ءقاۋىپ ءتوندىرىپ تۇرعان وسى ماسەلەنى ايتپاساق، جازباساق كەلەشەگىمىزدىڭ كەمەل بولاتىنىنا ءشۇبا كەلتىرەرىمىز انىق.
تالاپتىڭ تۇلپارىنا مىنگەن جاستار از ەمەس. شۇكىر! بار. ءبىراق، سول تالانتتىلاردى تالاپسىزدار جۇتىپ كەتپەي مە؟ مىنە، ماسەلە وسى! بۇگىنگى كۇنى كىتاپ ارقالاپ، جازۋ جازعان ادامعا ءتۇرپايى قارايتىندار كوبىرەك بولىپ تۇر. وسى رەتتە ەلىمىزگە بەلگىلى اقىن بەكجان اشىربايەۆتىڭ مىنا ءسوزى ەسكە تۇسەدى.
وكتيابرياتتار ورنىنا
اقپاقۇلاقتار كەلدi عوي.
پيونەرلەر ورنىنا
زيانكەرلەر كەلدi عوي.
كومسومولدار ورنىنا
نان سوعارلار كەلدi عوي.-دەپ قوعامنىڭ جاراسىن ءدوپ باسىپ ايتقان ەدى.
جالپى جارانى ايتىپ ونى جازۋدىڭ جولىن جازباساق تاعى بولمايدى. بۇگىنگى كۇنى «بالامىزدى سىزدەرگە بەردىك. تاربيەلەڭىزدەر، وقىتىڭىزدار. ارى قارايعى جۇمىس سىزدەردە»،-دەيتىندەر دە تابىلادى. وتە قاتە ۇعىم. نەگىزى الدىمەن بالانىڭ تاربيەسى وتباسىنان باستالادى. وتباسىندا ءتۇزۋ تاربيە العان بالا بولاشاعىن بولجاي الادى. ال مۇعالىمدەر ءبىلىم جولىندا تاربيە بەرەدى. وقىپ، جازۋعا مۇمكىندىك سىيلايدى. تالعاپ وقۋدى، پايدالى دۇنيەگە ىنتىقتىرۋدى ۇيرەتەدى. مىنە، ەكى ورتاداعى ارا سالماق وسىنداي.
بۇگىنگى كۇنى وسىنداي تالعامى قالىپتاسقان وزات وقۋشىلارىمىز جوق ەمەس بار. ۇكىلى ءۇمىتىمىزدى ارقالاپ جۇرگەن باقنۇر بەگالى، ەركەناز پەرنەبەك، ارۋنا جولداسبەك، ولجاس مىرزابەك، اقنيەت يبادۋللا سەكىلدى وقۋشىلارىمىزدىڭ اتىن ماقتانىشپەن اتايمىز. بۇل شاكىرتتەرىمىزدى ماقتان تۇتامىز. جانە دە كەلەشەكتە وسى وزات وقۋشىلارىمىز مەكتەبىمىزدىڭ اتىن شىعارادى دەگەن سەنىمدەمىز. وسى رەتتە تۇركىستان وبلىسى وتىرار اۋدانى «كوكماردان جالپى ءبىلىم بەرەتىن» مەكتەبىنىڭ ديرەكتورى مىرزاش بيمەننىڭ پىكىرىن ءبىلىپ ەدىك.
- بۇگىنگى تاڭدا ەلىمىزدە ءبىلىم سالاسىنا قاتىستى ءتۇرلى الىپ-قاشپا اڭگىمەلەر ايتىلىپ، سىنالىپ كەلەدى. ول ورىندى. سىن ادامدى تۇزەيدى. ءبىراق، سىن – شىن بولۋى ءتيىس. ەلىمىزدە ءبىلىم سالاسىنا ءتيىستى دەڭگەيدە كوڭىل ءبولىنىپ جاتىر. مۇعالىمدەردىڭ بەدەلىن كوتەرۋ جولىندا دا كوپتەگەن جۇمىس جاسالۋدا. مىنە، وسىناۋ جاعدايدى وڭتايلى پايدالانىپ مەكتەبىمىزدە تالماي ەڭبەك ەتۋ ۇستىندەمىز. ءبىز الدىمەن ءبىلىم ساپاسىنا ءمان بەرەمىز. بالا تاربيەسى وڭاي شارۋا ەمەس. ۇنەمى سوعان ساي قيمىل-ارەكەت ەتۋىمىز كەرەك. ءبىلىم بەرۋ ءۇشىن ءبىلىمدى بولۋ ەڭ العاشقى شارت. ال ءبىلىم ىزدەنىستىڭ ارقاسىندا كەلەدى. ۇجىمىمىزداعى ءاربىر ءمۇعالىم كەلدىم-كەتتىم دەگەن ۇستانىمدا ەمەس. كەرىسىنشە ءبىلىمدى بالاعا قالاي بەرسەك قىزىقتى بولادى دەگەن ىزدەنىستە جۇرەدى. بۇگىنگى بالالارعا ءبىلىمدى قىزىقتىرىپ، تارتىمدى ەتىپ بەرمەسەڭىز بالانى بىلىمگە تارتۋ وڭاي بولماي قالدى. وسى رەتتە ۇجىمىمىزداعى بىلىكتى مۇعالىمدەرىمىزدى اتاپ وتكەن ءجون بولار. ۇلجان راتقۇلوۆا، پەريزات ساحوۆا، ءجاۋدىر ەسبولعانوۆا، پەريزات قۇتتىبايەۆا، ءلاززات رىسبەكوۆا، بەيسەنكۇل نىشانبايەۆا سەكىلدى مۇعالىمدەرىمىز باپتاعان وقۋشىلار وبلىستىق، رەسپۋبليكالىق جارىستاردان ورىن الىپ، ۇجىمىمىزدىڭ مەرەيىن كوتەرىپ جاتقان جايى بار. بۇل دا دامۋدىڭ دارا جولى دەسەك ارتىق ايتپاعاندىق بولار، - دەيدى مەكتەپ ديرەكتورى.
دۇنيەدە ەڭ باقىتتى ادام ءبىلىمدى ادام. ال ءبىلىم ىزدەنىستىڭ ارتىندا جاسىرىلعانى حاق.