قورجىندا 3 التىن، 4 كۇمىس جانە 2 قولا مەدال بار.
بۇل تۋرالى ق ر مادەنيەت جانە سپورت مينيسترلىگىنەن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جارىس العاش رەت تۇركيادا ءوتتى، وعان الەمنىڭ 102 مەملەكەتىنەن 3 مىڭنان استام سپورتشى 13 سپورت تۇرىنەن قاتىستى. قازاق سپورتشىلارى سپورتتىڭ 5 تۇرىنەن (قازاق كۇرەسى، كوكپار، كوكبورى، جامبى اتۋ، ساداق اتۋ) ونەر كورسەتتى.
سونىمەن، قازاق كۇرەسىنەن ق ر قۇراماسى قورجىنىندا 6 مەدال بار: مارات نىعماتۋللايەۆ 60 كەلىگە دەيىنگى سالماقتا جەڭىمپاز اتاندى. سونداي-اق 65 كەلىگە دەيىنگى ساناتتاعى «التىندى» زارينا ساريپوۆا جەڭىپ الدى. ەلامان قويشىبايەۆ (80كگ) پەن راۋزا نۇرمۇحاممەتوۆا (55 كگ) – كۇمىس، ال «قازاقستان بارىسى» ماقسات يساعابىلوۆ (+80 كگ) پەن ءمولدىر ازامات (+65 كگ) قولا جۇلدەگەر اتاندى.
قاسىمحان قانات ءداستۇرلى ساداق اتۋدان فينالدا ونەر كورسەتتى، وندا 32 ەلدەن 95 سپورتشى ب ا ق سىنادى. ول ءوزىنىڭ قارسىلاسى وعىز وكشادان 2 ۇپاي ايىرماشىلىعىمەن جەڭىلىپ، كۇمىس جۇلدەگە يە بولدى.
كوكبورىگە قازاقستان، قىرعىزستان، تۇركيا كوماندالارى قاتىستى. تۇركيا كومانداسى ءوز قالاۋى بويىنشا ءۇشىنشى ورىنعا كەلىسىم بەرىپ، اقتىق سىنعا قازاق-قىرعىز قۇرامالارى ءوتتى. اقتىق سىندا قازاقستان – قىرعىزستان كوماندالارىنىڭ ويىنى 0-5 ەسەبىمەن اياقتالىپ، سپورتشىلارىمىز كۇمىس جۇلدەگە قول جەتكىزدى.
قازاقستان قۇراماسى كوكپاردان چەمپيون اتانىپ، قىرعىزستان كومانداسىن 4:3 ەسەبىمەن جەڭدى. فينالعا جەتۋ جولىندا قازاقستاندىقتار وزبەكستان مەن موڭعوليا سپورتشىلارىن 8:1 جانە 12:2 ەسەبىمەن ويسىراتا جەڭگەن بولاتىن. مينيستر داۋرەن ابايەۆ Facebook-تەگى پاراقشاسىندا كوكپار تۇڭعىش رەت كوشپەندىلەر ويىندارىنىڭ باعدارلاماسىنا ەنگەنىن جانە بۇل جەڭىس بىرەگەي تاريحي وقيعا ەكەنىن اتاپ ءوتتى.