ەمحانا جۇكتى ايەلدەر مەن 5 جاسقا دەيىنگى بالالارى بار وتباسىلارعا پاتروناتتىق قىزمەت كورسەتەدى.
بۇگىن يۋنيسەف-تىڭ جەنيەۆاداعى ايماقتىق كەڭەسشىسى گابريەل فونتانا جانە №26 قالالىق ەمحانا جانىنداعى امبەباپ وزىق پاتروناج ۇلگىسى رەسپۋبليكالىق ۇيلەستىرۋشىلەرى جۇكتى ايەلدەر مەن 5 جاسقا دەيىنگى بالالارى بار وتباسىلارعا پاتروناتتىق قىزمەت كورسەتۋدىڭ امبەباپ وزىق ۇلگىسىنىڭ جۇمىسىمەن تانىستى، دەپ حابارلايدى Almaty-akshamy.kz
بۇگىنگى تاڭدا ەمحانادا 5 جاسقا دەيىنگى 5914 بالا مەديسينالىق كومەك الادى، 467 ايەل جۇكتىلىگى بويىنشا ەسەپتە تۇر.
كەزدەسۋ بارىسىندا ەمحانانىڭ باس دارىگەرى ايگۇل تۇرىسبەكوۆا بالالاردى دامىتۋ كابينەتىن، رەسۋرستىق ورتالىقتى، جاستار ورتالىعىن كورسەتىپ، پسيحولوگ، الەۋمەتتانۋشى، مەدبيكەلەردىڭ جۇمىسىمەن تانىستىردى.
وكىلدەر امبەباپ وزىق ۇلگىنىڭ جۇمىسىنا قاتىستى ساۋالدارىن قويدى، وعان ەمحانا قىزمەتكەرلەرى جان-جاقتى جاۋاپ بەردى.
سونداي-اق، ەكسكۋرسيا اياسىندا قوناقتار كاسىبي مىندەتتەرىن ءتيىمدى اتقارۋ ماقساتىندا مەديسينا قىزمەتكەرلەرى بىلىكتىلىگىن ارتتىراتىن وقۋ-سيمۋلياسيالىق ورتالىقتا بولدى.
2022 جىلى «N26 قالالىق ەمحانا» ناۋرىزباي اۋدانىنداعى «ۇزدىك تاجىريبە ورتالىعى» بولىپ تاڭدالعان.
قازاقستان رەسپۋبليكاسى دەنساۋلىق ساقتاۋ مينيسترلىگى يۋنيسەف-پەن 2017 جىلى «امبەباپ وزىق پاتروناج ۇلگىسى» پيلوتتىق جوباسىن ىسكە قوسقان بولاتىن.
امبەباپ وزىق پاتروناج ۇلگىسى بويىنشا رەسپۋبليكالىق ۇيلەستىرۋشى ناتاليا كيمنىڭ ايتۋىنشا، جوبا بالالار مەن سابيلەر ءولىمىن، شالا تۋۋ مەن سىرقاتتانۋشىلىقتى ازايتۋعا باعىتتالعان.
«ۇيدە قاراۋ قىزمەتى بالانىڭ جان-جاقتى دامۋىنا، بالا جاراقاتىن ازايتۋعا، وتباسىلىق قارىم-قاتىناستى جاقسارتۋعا ىقپال ەتەدى. سونىمەن قاتار، بۇل ۇلگى دەنساۋلىق ساقتاۋ جانە الەۋمەتتىك قورعاۋ جۇيەسىنىڭ قىزمەتتەرىنە الەۋمەتتىك وسال جانە وقشاۋلانعان وتباسىلاردى تارتادى»، - دەيدى ول.
قازاقستانعا عانا ءتان امبەباپ وزىق پاتروناج ۇلگىسى وسى ۋاقىتقا دەيىن الماتىدا نارەستە ءولىمى بويىنشا ايتارلىقتاي ناتيجە كورسەتتى.
فرانسيادان كەلگەن قوناقتار ەمحانا ۇجىمىن تابىستى جۇمىسىمەن قۇتتىقتاپ، العىسىن ءبىلدىردى.