ءيتتىڭ مايىن دەنەگە جاعۋعا بولا ما؟

شاريعاتىمىزدا ءيتتىڭ ەتى، سىلەكەيى ءناجىس، حارام بولىپ سانالادى.

ويتكەنى يت ازۋ ءتىستى جىرتقىش اڭداردىڭ قاتارىنا جاتادى.

بۇل تۋرالى Almaty-akshamy.kz Muftyat.kz-كە سىلتەمە جاساي وتىرىپ حابارلايدى. 

ول جونىندە پايعامبارىمىز (وعان اللانىڭ سالاۋاتى مەن سالەمى بولسىن):   

«ازۋ ءتىستى ءاربىر جىرتقىش اڭدى جەۋ – حارام»، – دەگەن.

سونداي-اق، ءيتتى ساتىپ اقشاسىن پايدالانۋ حارام ەكەندىگىنە بايلانىستى اللا ەلشىسى (وعان اللانىڭ سالاۋاتى مەن سالەمى بولسىن) بىلاي دەگەن: 

«ءيتتى ساتىپ تاپقان تابىسى – حارام».    

ەندى ءيتتىڭ مايىن ەمدىك ماقساتتا پايدالانۋعا كەلسەك، حانافي ءمازھابىندا جەۋگە تىيىم سالىنعان جانۋارلاردىڭ ەتى جانە تاعى باسقا نارسەلەرىمەن ەمدەلۋگە بولمايدى.

يبن ءان-نۋجايم ءال-حانافي: «حارام نارسەلەرمەن ەمدەلۋ عالىمداردىڭ اراسىندا  تارتىستى ماسەلە. الايدا «ءاز-زاحيرا» كىتابىندا: «حارامنان باسقا ەش ەم تابىلماسا جانە ول اۋرۋعا ەم بولاتىنى ناقتى بولسا، ونىمەن ەمدەلۋگە رۇقسات»، – دەگەن.

ال پايعامبارىمىزدىڭ (وعان اللانىڭ سالاۋاتى مەن سالەمى بولسىن) «اللا تاعالانىڭ حارام ەتكەن نارسەلەرىندە سەندەرگە شيپا جوق»، – دەگەن ءحاديسى ەمى جوق نارسەلەردى عانا قامتيدى. سول ءۇشىن عالىمدار ادال ءارى تازا ءدارى تابىلماعان جاعدايدا عانا دارىگەر ءيتتىڭ مايىن جاعۋعا كەڭەس بەرسە وعان رۇقسات بەرگەن.

سوندىقتان ءادىل ءارى سەنىمدى مۇسىلمان دارىگەر اۋرۋدىڭ جالعىز ەمى – ءيتتىڭ مايىن جاعۋ جانە ونىڭ ەش زيانى جوق دەگەن قورىتىندى جاساعان جاعدايدا ءارى ونىڭ ورنىن باساتىن حالال ءدارى تابىلماسا، وندا ونى ەمدىك ماقساتتا قولدانۋدىڭ وقاسى جوق.