يتتەردى قوعامدىق ورىنداردا سەرۋەندەتۋدىڭ ءوز ءتارتىبى بار. الايدا بۇل ەرەجەلەردىڭ ءجيى بۇزىلۋى ادامداردىڭ قاۋىپسىزدىگىنە اسەر ەتەدى، دەپ حابارلايدى aqshamnews.kz
پاۆلودار وبلىسىندا جىل باسىنان بەرى جانۋارلارىن قارعىباۋسىز نەمەسە تۇمىلدىرىقسىز سەرۋەندەتكەن 400-گە جۋىق يت يەسى جاۋاپقا تارتىلعان.
قوعامدىق ورىنداردا جانۋارلاردى ۇستاۋ ەرەجەلەرى قانداي جانە ولاردى بۇزۋ قانداي سالدارعا اكەلەدى؟ وسى سۇراقتارعا جاۋاپتى پوليسيا وكىلدەرى تۇسىندىرەدى. ءۇي جانۋارلارىن سەرۋەندەتۋ – ءاربىر يەسىنىڭ جاۋاپكەرشىلىگىن تالاپ ەتەتىن ماڭىزدى ماسەلە. پاۆلودار وبلىسى پوليسيا دەپارتامەنتى جەرگىلىكتى پوليسيا قىزمەتى باستىعىنىڭ ورىنباسارى رۋفات كەنجيننىڭ ايتۋىنشا، جانۋارلاردى تەك ارنايى بەلگىلەنگەن ورىنداردا سەرۋەندەتۋگە رۇقسات ەتىلەدى. الايدا يەلەرى كوبىنەسە جانۋارلارىن بالالار الاڭدارىندا، سەرۋەندەۋ الاڭدارىندا نەمەسە ادامدار كوپ جينالاتىن جەرلەردە سەرۋەندەتىپ جاتادى. بۇل جەرلەردە ءيتتىڭ قارعىباۋىنان بوساپ كەتۋ ءقاۋپى بار. ەگەر ول بىرەۋگە فيزيكالىق زاقىم كەلتىرمەسە دە، پسيحولوگيالىق جاراقات سالۋى مۇمكىن.
– مۇنداي بۇزۋشىلىقتار تۋرالى تۇرعىندار، ءوتىپ بارا جاتقان ادامدار نەمەسە ارنايى رەيدكە شىققان ينسپەكتورلار حابارلايدى، – دەيدى رۋفات كەنجين.
يتتەردى تۇمىلدىرىقسىز جانە بايلاۋسىز سەرۋەندەتۋ – ءجيى كەزدەسەتىن قۇقىق بۇزۋشىلىقتاردىڭ ءبىرى. ەركىن جۇرگەن اگرەسسيۆتى يت اينالاداعى ادامدارعا ءقاۋىپ توندىرەدى. جىل باسىنان بەرى پاۆلودار وبلىسىندا مۇنداي زاڭبۇزۋشىلىقتار ءۇشىن 400-گە جۋىق يت يەسىنە اكىمشىلىك جازا قولدانىلعان. ماسەلەن، پاۆلودار قالاسىنىڭ پوليسياسىنا تۇرعىندار كوشەدە تۇمىلدىرىقسىز جۇرگەن روتۆەيلەر تۋرالى حابارلاعان. تەكسەرۋ بارىسىندا ونىڭ يەسىنە 10 ايلىق ەسەپتىك كورسەتكىش مولشەرىندە ايىپپۇل سالىنىپ، جانۋاردى ۇستاۋ ەرەجەلەرىن قاتاڭ ساقتاۋ جونىندە پروفيلاكتيكالىق تۇسىندىرمە جۇمىستارى جۇرگىزىلگەن.
ەگەر ءسىز ءۇي جانۋارىنىڭ يەسى بولساڭىز، جانۋارىڭىزدىڭ كوشەدە باقىلاۋسىز جۇرمەۋىن قاداعالاپ، ونى مىندەتتى تۇردە قارعىباۋمەن سەرۋەندەتۋىڭىز قاجەت. سونىمەن قاتار يتتەر مەن مىسىقتاردى كەلەسى ورىنداردا سەرۋەندەتۋگە تىيىم سالىنادى: تۇرعىن ۇيلەردىڭ اۋلالارىندا،
بالالار الاڭدارىندا،
مەكتەپكە دەيىنگى مەكەمەلەردىڭ جانە مەكتەپتەردىڭ اۋماعىندا،
دەنساۋلىق ساقتاۋ مەكەمەلەرىنىڭ ماڭىندا،
ستاديونداردا، ساياباقتار مەن سكۆەرلەردە.
ەگەر جانۋار ويىن الاڭدارىندا، كوگالداردا نەمەسە تروتۋارلاردا ءناجىس قالدىرسا، ونى تازالاۋ – يەسىنىڭ تىكەلەي مىندەتى. بۇل ەرەجەلەردى ساقتاماعان جاعدايدا، قۇقىق بۇزۋشى اكىمشىلىك جاۋاپكەرشىلىككە تارتىلادى. پوليسيا قىزمەتكەرلەرى يت يەلەرىن جانۋارلاردى كۇتىپ-ۇستاۋ ەرەجەلەرىن قاتاڭ ساقتاۋعا شاقىرادى. ءاربىر يەسى ءوزىنىڭ جانۋارى ءۇشىن جاۋاپتى ەكەنىن ۇمىتپاعانى ءجون. بۇل – وزگە ادامداردىڭ تىنىشتىعى مەن قاۋىپسىزدىگىن قامتاماسىز ەتۋدىڭ ماڭىزدى شارتى.