تۇركولوگ اسەل لاحايەۆا جەتەكشىلىك ەتەتىن «TÜRKTAV» قورى ەۋروپادا العاشقى حالىقارالىق ءىس-شاراسىن جۇزەگە اسىردى.
تۋرين حالىقارالىق كىتاپ جارمەڭكەسى اياسىندا قىرعىز رەسپۋبليكاسى پرەزيدەنتىنىڭ كەڭەسشىسى، جازۋشى، الاش سىيلىعىنىڭ يەگەرى ارسلان كويچييەۆتىڭ قور تاراپىنان اعىلشىن تىلىنە اۋدارىلعان «شامان جانە شىڭعىس حان» اتتى كىتابىنىڭ تۇساۋكەسەرى مەن يتالياندىق فوتوونەر شەبەرى سوفيا لاۆروۆتىڭ «تۋرين مەن بىشكەك: ەكى شاھار — ءبىر جۇرەك» اتتى كورمەسى وتكىزىلدى.
«تۋرين مەن بىشكەك: ەكى شاھار — ءبىر جۇرەك» اتتى كورمەدە سوفيا قوس قالانىڭ ىرعاعى مەن رۋحىن فوتوسۋرەتتەرى ارقىلى جەتكىزە ءبىلدى. بۇل كورمە بۇعان دەيىن بىشكەكتە گۇلزادا شارشەنالييەۆا ۇيىمداستىرعان ءىس-شارا اياسىندا قىرعىزستاننىڭ ۇلتتىق بەينەلەۋ ونەرى مۋزەيىندە ونەرسۇيەر قاۋىمعا ۇسىنىلعان بولاتىن. ءبىز دە وسى قۇندى كورمەنىڭ ءبىر بولىگىن تۋرين تۇرعىندارى مەن قوناقتارىمەن ءبولىسۋ مۇمكىندىگىنە يە بولدىق»،-دەيدى اسەل لاحايەۆا.
سونداي-اق، ول «TÜRKTAV» اتىنان تۇركى جازۋشىلاردىڭ ەڭبەكتەرىن تۇركى دۇنيەسىندە عانا ەمەس، كۇللى الەمگە كەڭىنەن تانىتقىسى كەلەتىندىگىن ايتتى.
يتاليا مەن تۇركى الەمى اراسىنداعى بايلانىستار تەرەڭ تاريحي تامىرلارعا يە. ورتا عاسىرلاردا ماركو پولو سىندى ۆەنەسيالىق ساياحاتشىلار مەن ديپلوماتتار تۇركىستان جەرى مەن تۇركى حالىقتاردىڭ مادەنيەتىن ەۋروپاعا تانىستىرعان.
حح عاسىردا يتالياداعى تۇركولوگيا زەرتتەۋلەرى دەربەس اكادەميالىق سالا رەتىندە قالىپتاستى.
اگۋستينو زالي، الەسسيو بومباچچي جانە دجۋزەپپە ستوري سىندى كورنەكتى عالىمدار تۇركى تىلدەرى، جازۋ جۇيەلەرى مەن ادەبي مۇراسىنا ايتارلىقتاي ۇلەس قوستى.
تۋرين كىتاپ جارمەڭكەسى 1988 جىلدان بەرى وتكىزىلىپ كەلە جاتقان يتاليانىڭ ەڭ ءىرى، ال ەۋروپانىڭ ەڭ بەدەلدى كىتاپ جارمەڭكەلەرىنىڭ ءبىرى. جىل سايىن الەمگە تانىمال جازۋشىلاردى، باسپاگەرلەردى جانە ادەبيەت سۇيەر قاۋىمنىڭ باسىن قوسىپ حالىقارالىق مادەني ءوزارا ىقپالداستىققا ەلەۋلى ۇلەس قوسىپ كەلەدى.