يسپانياداعى جانارتاۋدان لاۆانىڭ اتقىلاۋى كۇشەيدى

اپات ايماعىنان ادامدار كەتىپ جاتىر.

يسپانيانىڭ پالما ارالىنداعى جانارتاۋدىڭ اتقىلاۋى جالعاسىپ، اپات ايماعىنان ادامدار كەتىپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.

سوڭعى كۇندەرى كۇل مەن شوقتان تونگەن قاۋىپكە بايلانىستى تاعى 3 اۋىل حالقى ءقاۋىپسىز جەرگە كوشىرىلدى. سەبەبى جانارتاۋدا تاعى ءبىر جارىقشاق پايدا بولىپ، لاۆانىڭ اتقىلاۋى كۇشەيگەن. قازىرگە دەيىن تاۋدان اققان ىستىق شوق 400-دەن استام ءۇيدى ءبۇلدىرىپ، كوپتەگەن ءجۇزىم مەن بانان القابىن كۇلگە اينالدىرعان. جەرگىلىكتى بيلىكتىڭ ايتۋىنشا، دەرەۋ قيمىلداۋدىڭ ارقاسىندا ەشكىم جاپا شەكپەگەن. ەسكە سالا كەتەيىك، وتكەن جەكسەنبى كۇنى پالما ارالىندا كۋمبرە-ۆەحا جانارتاۋى اتقىلاپ، اپات ايماعىنان 7 مىڭداي ادام ەۆاكۋاسيالانعان ەدى. اۋەجاي جابىلىپ، ادامدار تەڭىز ارقىلى كەتۋگە ءماجبۇر. 

«ءبىز مۇندا دەمالۋعا كەلگەن ەدىك، ءبىراق تابيعات اپاتىنان ۇيگە قايتۋعا ءماجبۇرمىز. بارسوناعا دەيىن ۇشۋىمىز كەرەك ەدى، ءبىراق اۋەجاي جابىق. سوندىقتان تەنەريفەگە دەيىن كەمەمەن جەتىپ، ارى قاراي ۇشاققا وتىرماقپىز»، - دەدى جەرگىلىكتى تۇرعىن.

«مەن مۇندا تۋعاندارىما كومەكتەسۋ ءۇشىن وزگە ارالدان كەلىپ ەدىم. ءبىراق تاۋدان اققان ىستىق شوقتان ولاردىڭ ءۇيى جانىپ كەتىپ، بارلىق مۇلكىنەن ايىرىلىپ قالدى»، - دەدى ول.