يسپانيادا اۋىزسۋدى پايدالانۋعا شەكتەۋ قويىلادى

ۇنەمدەۋ قاراپايىم تۇرعىندارمەن قوسا، بيزنەستەن دە قاتتى تالاپ ەتىلمەك.

يسپانيادا اۋىزسۋدى پايدالانۋعا قاتاڭ شەكتەۋ قويىلادى، دەپ حابارلايدى اlmaty-akshamy.kz 24.kz سىلتەمە جاساپ.

ەۋروپاداعى كليماتتىق وزگەرىستەر سۋ تاپشىلىعىنا اكەپ سوقتىردى. قۇرلىقتى قۇرعاقشىلىق جايلاپ، اپتاپ ىستىق سۋ قورىن ايتارلىقتاي ازايتقان. الداعى مامىر ايىندا جاۋىن شاشىن از تۇسسە، ەلدىڭ سولتۇستىگىندەگى كاتالونيا ايماعىندا قۇرعاقشىلىق بولىپ، توتەنشە جاعداي جاريالاۋى مۇمكىن. سوندىقتان ۇكىمەت اۋىز سۋعا قاتىستى جاڭا شەكتەۋلەردى ەنگىزبەك.

اتاپ ايتقاندا، تۇرمىس پەن كوممەرسيالىق ماقساتتا سۋدى تۇتىنۋ قاتاڭ باقىلاناتىن بولادى جانە سۋ بەرۋ قىسىمى تومەندەتىلەدى. بۇگىندە ءبىر تۇرعىن تاۋلىگىنە 317 ليتر سۋ تۇتىنادى ەكەن، جاڭا شەكتەۋلەرگە سايكەس تۇتىنۋ كورسەتكىشى 180 ليترگە دەيىن قىسقارماق.

ۇنەمدەۋ قاراپايىم تۇرعىندارمەن قوسا، بيزنەستەن دە قاتتى تالاپ ەتىلەدى. ماسەلەن بارسەلونالىق پەن وسى قالاعا كەلگەن ءتۋريستى سالىستىرساق، ساياحاتشى سۋدى بەس ەسە كوپ پايدالانادى. بۇل تۋرالى مەملەكەتتىك سۋدى زەرتتەۋ ينستيتۋتىنىڭ ماماندارى ءمالىم ەتتى. وسىعان بايلانىستى جەرگىلىكتى بيلىك قوناق ۇيلەردەگى دۋش سۋىن تازارتىپ، ەكىنشى رەت قولدانۋعا مۇمكىندىك بەرەتىن رەزەرۆۋارلارعا ينۆەستيسيا تارتۋدى تالاپ ەتپەك. 

جەرگىلىكتى بيلىكتىڭ تالابىنا ساي باسسەيندەردىڭ تەرەڭدىگى ەندى 2 مەتردەن اسپاۋى ءتيىس. قۇرىلىس كومپانيالارى دا بۇل شەكتەۋلەردى قاتاڭ ەسكەرۋى ءتيىس.