«جاس بۇركىت» جاس ساربازىنا مينيستر ساعاتى سىيعا بەرىلدى
22 ءساۋىر كۇنى ەلىمىزدىڭ ىشكى ىستەر ءمينيسترى پوليسيا گەنەرال-لەيتەنانتى مارات احمەتجانوۆ ۇلتتىق ۇلاننىڭ شىمكەنت قالاسىنداعى قۇراماسىندا بولدى، دەپ حابارلايدى Almaty-akshamy.kz.
ۆەدومستۆو باسشىسىن قۇقىقتىق ءتارتىپ اسكەرىنىڭ باس قولباسشىسى گەنەرال-مايور ەركىن بوتاقانوۆ، “وڭتۇستىك” وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆ، 6506 اسكەري ءبولىمىنىڭ كومانديرى پولكوۆنيك باۋىرجان قابىلبەكوۆ جانە شىمكەنت قالاسىنىڭ اكىمى مۇرات ايتەنوۆ قارسى الدى.
ق ر ۇلتتىق ۇلانى 6506 اسكەري ءبولىمىنىڭ باسپا ءسوز قىزمەتى ءمالىم ەتكەندەي، ءىس-ساپار بارىسىندا مينيستر اسكەري ءبولىمنىڭ ماتەريالدىق-تەحنيكالىق بازاسىن، ينفراقۇرىلىمىمى مەن وقۋ-جاتتىعۋ وبەكتىلەرىن نازارعا الدى. سونىمەن قاتار، 6506 اسكەري ءبولىمىنىڭ تاريحىنان سىر شەرتەتىن، باتىرلاردىڭ ەرلىگىن ناسيحاتتايتىن مۇراجايدىڭ جاي-كۇيىمەن تانىستى.
مارات احمەتجانوۆ ءوز سوزىندە ۇلتتىق ۇلاننىڭ ەلدەگى تۇراقتىلىقتى ساقتاۋ، ازاماتتار مەن قوعام قاۋىپسىزدىگىن قامتاماسىز ەتۋ بويىنشا اسا ماڭىزدى مىندەتتەر ورىندايتىنىن اتاپ ءوتتى. سونداي-اق، مەملەكەت باسشىسى قاسىم-جومارت توقايەۆ ۇلتتىق ۇلان اسكەري قىزمەتشىلەرىنىڭ اتقارعان جۇمىسىنا جوعارى باعا بەرگەنىن جەتكىزدى.
- ىشكى ىستەر ورگاندارى ءۇشىن دە، ۇلتتىق ۇلان بولىمشەلەرى ءۇشىن دە قاڭتارداعى وقيعالار كۇردەلى سىناق بولدى. قۇقىق قورعاۋ ورگاندارىنىڭ قىزمەتكەرلەرى مەن ۇلتتىق ۇلان اسكەري قىزمەتشىلەرى قيىن كۇندەردە الدىڭعى شەپتە كونستيتۋسيالىق قۇرىلىم مەن ەل تىنىشتىعىن قورعادى. مەملەكەت باسشىسى اسكەريلەردىڭ جاۋىنگەرلىك دايىندىعىنا، قۇقىق قورعاۋ سالاسى قىزمەتكەرلەرىنىڭ جاۋىنگەرلىك دايىندىعىنا ايرىقشا ءمان بەرىپ وتىر. سونىمەن قاتار الدىڭعى تولقىن ۇلتتىق ۇلاننىڭ ارداگەرلەرىنە قاراپ بوي تۇزەۋىمىز جانە دە ولارمەن قويان-قولتىق جۇمىس جاساۋىمىز قاجەت،- دەدى ءىىم باسشىسى.
ءىس-شارا بارىسىندا ىشكى ىستەر ءمينيسترى ءبولىمنىڭ قۇرامىندا جاساقتالعان "جاس بۇركىت" سپورتتىق اسكەري-پاتريوتتىق كلۋبىنىڭ قىراندارىمەن تانىسىپ، ولاردىڭ بىرىنە ايرىقشا سىيلىق جاسادى. دالىرەك ايتساق، پوليسيا گەنەرال-لەيتەنانتى مارات احمەتجانوۆ كلۋبتىڭ ەڭ جاس مۇشەسىنە ءوزىنىڭ جەكە قول ساعاتىن سىيعا تارتتى.
كەزدەسۋ سوڭىندا ەلىمىزدىڭ باس پوليسەيى ءبولىم جەكە قۇرامىنىڭ الداعى ىستەرىنە ساتتىلىك تىلەدى.
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-مايور ەركىن بوتاقانوۆ ءوز كەزەگىندە پرەزيدەنت پەن ىشكى ىستەر مينيستر تاپسىرمالارىنىڭ تولىق كولەمدە ورىندالاتىنىن اتاپ ءوتتى.