ەكى ەلدىڭ قاۋىپسىزدىگىن قامتاماسىز ەتۋ ءۇشىن.
يران قارۋلى كۇشتەرى باس شتابىنىڭ باسشىسى مۇحامماد حوسەين باگەري جۇڭگو قورعانىس ءمينيسترى ۆەي فەنحەنىڭ تەھرانعا ساپارى كەزىندە يران مەن جۇڭگو قورعانىس سالاسىنداعى ىنتىماقتاستىقتى نىعايتۋ قاجەتتىگى تۋرالى كەلىستى، دەپ حابارلايدى Almaty-akshamy.kz Interfax.ru سىلتەمە جاساپ.
«جۇڭگو قورعانىس مينيسترىمەن كەزدەسۋدە ءبىز بىرلەسكەن اسكەري وقۋ-جاتتىعۋلار، جەدەل تاجىريبە الماسۋ، وقۋ-جاتتىعۋ جانە ەكى ەلدىڭ اسكەريلەرى اراسىنداعى باسقا دا بىرلەسكەن ءىس-شارالاردا ەكىجاقتى ىنتىماقتاستىقتى كەڭەيتۋ تۋرالى كەلىستىك. وسىلايشا ءبىز ەكى ەلدىڭ قاۋىپسىزدىگىن قامتاماسىز ەتە الامىز»، - دەگەن مۇحامماد حوسەين باگەريدىڭ ءسوزىن «ال-ارابيييا» تەلەارناسى جاريالاپ وتىر.
ءوز كەزەگىندە يران پرەزيدەنتى يبراگيم رايسي ۆەي فەنحەمەن كەزدەسۋىندە يران-قىتاي قارىم-قاتىناسىن ستراتەگيالىق دەپ اتادى. بۇل رەتتە ول تەھران مەن بەيجىڭ اراسىنداعى 25 جىل مەرزىمگە ىنتىماقتاستىق تۋرالى كەلىسىمگە توقتالدى.
2021 جىلدىڭ ناۋرىز ايىندا يران مەن قىتايدىڭ سىرتقى ىستەر مينيسترلەرى دجاۆاد زاريف پەن ۆان ي ەكى ەل اراسىنداعى 25 جىل مەرزىمگە جان-جاقتى ستراتەگيالىق سەرىكتەستىك تۋرالى كەلىسىمگە قول قويدى. كەلىسىم 20 باعىتتا، اتاپ ايتقاندا، ساياسات، اتقارۋشى بيلىك اراسىنداعى ىنتىماقتاستىق، مادەني، قۇقىقتىق، قورعانىس، قاۋىپسىزدىك سالالارىنداعى ءوزارا ءىس-قيمىل، سونداي-اق وڭىرلىك جانە حالىقارالىق ماسەلەلەر بويىنشا قارىم-قاتىناستاردى دامىتۋدى كوزدەيدى.