مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا مەملەكەتتىڭ ەكونوميكاداعى ۇلەسى ءالى جوعارى ەكەنىن سىنادى.
«مەملەكەتتىڭ ەكونوميكاداعى تىكەلەي ۇلەسى ءالى دە جوعارى دەڭگەيدە قالىپ وتىر. مۇنداي احۋال نارىقتاعى تەڭدىك شارتتارىن بۇزادى، جەكە باستامالارعا توسقاۋىل بولادى. ەلىمىزدە مەملەكەتتىك كاسىپورىنداردى باسقارۋ ساياساتى ءالى دە ءتيىمسىز ەكەنىن مويىنداعان ءجون. ولاردىڭ ماقسات-مىندەتىن، قىزمەت اياسىن، قارجىلاندىرۋ تاسىلدەرىن جانە جۇمىسىنىڭ باسقا دا تۇستارىن ءتيىستى زاڭدارمەن رەتتەۋ قاجەت. سونىمەن بىرگە حولدينگتەر مەن ۇكىمەتتىڭ اراسىنداعى قارجى ماسەلەلەرىنە قاتىستى ۇستانىم تۇراقتى ءارى جۇيەلى بولۋعا ءتيىس»، - دەدى مەملەكەت باشسىسى.
قاسىم-جومارت توقايەۆ باس پروكۋراتۋرا ءىرى ينۆەستيسيالىق جوبالاردى جۇزەگە اسىرۋعا قولداۋ كورسەتە باستاعانىن اتاپ ءوتتى.
«ينۆەستورلارعا «جاسىل ءدالىز» قاعيداسى بويىنشا جەڭىلدىكتەر بەرىلدى. ەكونوميكالىق قىلمىستاردىڭ ءبىرازى قىلمىس دەپ تانىلمايتىن بولدى. الايدا كاسىپكەرلەردەن مەملەكەتتىك ورگانداردىڭ شەكتەن تىس قاداعالاپ، باقىلايتىنى تۋرالى شاعىمدار ءالى دە ءتۇسىپ جاتىر. ۇكىمەت باس پروكۋراتۋرامەن بىرلەسىپ، ينۆەستيسيالىق احۋالعا اسەرىن تيگىزەتىن جاعىمسىز ۇردىستەردى جويۋى كەرەك»، - دەدى پرەزيدەنت.