ينتەرنەت-الاياقتار شەتەلگە، سونىڭ ىشىندە يران، ءۇندىستان، جۇڭگو، اقش جانە مالايزيا ازاماتتارىنا قوڭىراۋ شالىپ، ولارعا "جوق" ينۆەستيسيالىق مامىلەلەر جاساۋدى ۇسىنعان.
47 شەتەل ازاماتى، سونداي-اق قازاقستاننىڭ 5 ازاماتى ۇستالدى، دەپ حابارلايدى aqshamnews.kz
ولاردىڭ شەتەل ازاماتتارىنا 2 مىڭنان استام قوڭىراۋ شالعانى انىقتالدى. ءتىنتۋ بارىسىندا 1،5 مىڭنان استام تەلەفون، 57 نوۋتبۋك پەن كومپيۋتەر، مىڭنان استام sim-كارتا تاركىلەندى. قازىرگى ۋاقىتتا ۇستالعانداردىڭ قازاقستاندىقتارعا قاتىستى ينتەرنەت-الاياقتىق جاساۋعا قاتىسى بار-جوعى تەكسەرىلىپ، تەرگەۋ امالدارى جالعاسىپ جاتىر. ىشكى ىستەر مينيسترلىگى الاياقتاردىڭ قۇربانى بولماس ءۇشىن ازاماتتاردى قىراعى بولۋعا شاقىرادى.
قاراپايىم ساقتىق شارالارىن ساقتاۋدى ۇمىتپاڭىزدار. سىزگە مەسسەندجەرلەر مەن الەۋمەتتىك جەلىلەردە جىبەرىلەتىن كۇماندى سىلتەمەلەرگە وتپەڭىز. ەگەر سىلتەمە بويىنشا ءوتىپ قويساڭىز، وندا مەسسەندجەرىڭىزدى قوسىلىپ تۇرعان باسقا قۇرىلعىلاردان اجىراتىڭىز. بەيتانىس ابونەنتتەردىڭ بەينەقوڭىراۋلارىنا جاۋاپ بەرمەڭىز.
"ەگەر بىرەۋ تەلەفون ارقىلى نەسيە رەسىمدەۋدى، مۇلىكتى ساتۋدى نەمەسە اقشانى "ءقاۋىپسىز" شوتقا اۋدارۋدى ۇسىنسا – سەنبەڭىز. قۇقىق قورعاۋ ورگاندارى مەن بانك قىزمەتكەرلەرى مۇنداي وپەراسيالاردى ەشقاشان تەلەفون ارقىلى جۇرگىزبەيدى. جەكە دەرەكتەرىڭىزدى، بانك كارتاسىنىڭ جارامدىلىق مەرزىمىن، CVV-كودىن ەشكىمگە بەرمەڭىز. كۇماندى ينۆەستيسيالىق جوبالارعا اقشا سالماڭىز. ينۆەستيسيا جاساماس بۇرىن قور نارىعىن جانە جوبانىڭ ءوزىن مۇقيات تەكسەرۋ قاجەت. تەلەفونىڭىزعا قوسىمشالاردى ورناتۋ ءۇشىن تەك رەسمي AppStore جانە PlayMarket پلاتفورمالارىن پايدالانىڭىز. وزىڭىزگە جانە جەكە اقپاراتتارىڭىزعا مۇقيات بولىڭىز! پوليسيا ءارقاشان جانىڭىزدا! الايدا كوپ نارسە ءسىزدىڭ قىراعىلىعىڭىزعا بايلانىستى ەكەنىن ەستەن شىعارماڭىز!" – دەدى دەپارتامەنت باستىعى – ءىىم رەسمي وكىلى شىڭعىس الەكەشيەۆ.