ينجەنەرلىك ينفراقۇرىلىمدى جاڭعىرتۋ ماسەلەسى تۇركسىب اۋدانىنىڭ ماڭىزدى ماسەلەلەردىڭ ءبىرى بولىپ قالا بەرمەك.
وتكەن جىلى «شۋاقتى» شاعىن اۋدانىنىڭ تۇرعىندارى ءۇشىن 17،4 شاقىرىم سۋ قۇبىرى جانە كارىز جەلىلەرى سالىندى. ونىڭ 10 شاقىرىمى سۋ قۇبىرى بولسا، 7،4 شاقىرىم كارىز جۇيەسى تارتىلعان. بۇل تۋرالى الماتى قالاسىنىڭ اكىمى ەربولات دوسايەۆ تۇركسىب اۋدانى تۇرعىندارىمەن كەزدەسۋىندە ءمالىم ەتتى، دەپ حابارلايدى Almaty-akshamy.kz.
بيىلعى جىلى 223،7 شاقىرىم سۋمەن جابدىقتاۋ جانە سۋ بۇرۋ جەلىلەرىن سالۋ جانە ىسكە قوسۋ جوسپارلانعان.
«Sheber Build» ج ش س «المەرەك» شاعىن اۋدانىندا 20 شاقىرىم سۋ قۇبىرى مەن كاناليزاسيا قۇرىلىسى بويىنشا نەگىزگى جۇمىستارىن اياقتادى. تۇرعىندار سۋمەن قامتۋ جەلىلەرىنە قوسىلا الادى، جۇيە تەكسەرىلگەننەن كەيىن وسى جىلدىڭ قاڭتار ايىنىڭ سوڭىندا كاناليزاسيا جۇيەسىنە قوسىلۋعا مۇمكىندىك بولادى؛
- بيىل اقپان ايىنىڭ سوڭىنا دەيىن «جاس قانات» شاعىن اۋدانىندا 16،4 شاقىرىم سۋ قۇبىرى مەن كاناليزاسيا قۇرىلىسى بويىنشا جۇمىستار اياقتالادى، دەدى قالا اكىمى.
وسى جىلدىڭ 3ء-شى توقسانىندا «ماياك»، «نيجنيايا پياتيلەتكا» شاعىن اۋداندارىندا جانە زاكارپاتسكايا كوشەسىندە 187،3 شاقىرىم سۋ قۇبىرى جانە كاناليزاسيا قۇرىلىسى اياقتالادى. سونىمەن قاتار، وسى جىلدىڭ 2ء-شى توقسانىندا «قايرات» شاعىن اۋدانىندا 37،2 شاقىرىم سۋمەن قامتۋ جانە سۋ بۇرۋ جاڭا جەلىلەرىنىڭ 2ء-شى كەزەگىن سالۋ جۇمىستارىن باستاۋ جوسپارلانعان.
بيىل 6 ۋچاسكە بويىنشا سۋ قۇبىرى مەن كاناليزاسيا جەلىلەرىن جوبالاۋدى اياقتاۋ كوزدەلگەن، ونىڭ ىشىندە: ۇزىندىعى 120 شاقىرىم 2 ۋچاسكە بويىنشا اۋداننىڭ ورتالىق بولىگىندە سەيفۋللين داڭعىلىنان باتىسقا قاراي (رىسقۇلوۆ-جانسۇگىروۆ – شولوحوۆ - سەيفۋللين كوشەلەرىنىڭ كۆادراتى) جانە اۋەجاي كولىنىڭ ماڭى،
ۇزىندىعى 50 شاقىرىم 4 ۋچاسكە بويىنشا اۋداننىڭ ورتالىق بولىگىندە سەيفۋللين داڭعىلىنان شىعىسقا قاراي، شولوحوۆ، اقان سەرى جانە سەيفۋللين كوشەلەرىنىڭ كۆادراتىندا، سونداي-اق، كراسنوگورسكايا، ءسۇيىنباي، اسىلبەكوۆ، سوبوليەۆ، سارىمولدايەۆ كوشەلەرىندەگى جەكەلەگەن ۇيلەر ءۇشىن رەكونسترۋكسيالانادى، دەدى قالا اكىمى ە.دوسايەۆ.