جىلدىق ماندە ينفلياسيا 16،1 پايىزعا جەتتى.
ق ر ۇلتتىق بانك ءتوراعاسى عالىمجان ءپىرماتوۆ ينفلياسياعا قاتىستى تۇسىنىك بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۇلتتىق بانكتىڭ اقشا-كرەديت ساياساتى كوميتەتى 2022 جىلعى 6 قىركۇيەكتەن باستاپ بازالىق مولشەرلەمەنى 14،5 پايىز دەڭگەيىندە ساقتاۋ تۋرالى شەشىم قابىلدادىق. شەشىم كەلەسى بولجامدى راۋندتىڭ ناتيجەلەرى نەگىزىندە قابىلداندى. ءبىز بيىلدىڭ سوڭىنا دەيىن جانە ورتا مەرزىمدى كەزەڭگە ينفلياسيا مەن ناقتى جالپى ىشكى ءونىمنىڭ ءوسۋى بويىنشا باعالاۋدى جاڭارتا وتىرىپ، ماكروەكونوميكالىق احۋالدىڭ بۇدان بىلايعى دامۋىنا قاتىستى بولجامدارىمىزدى وزگەرتتىك»، - دەدى عالىمجان ءپىرماتوۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، ينفلياسيانىڭ ايلىق ديناميكاسى وسى جىلعى ناۋرىزداعى ەڭ جوعارعى دەڭگەيدەن تومەندەۋىنە قاراماستان، ورتاشا جىلدىق ماندەردەن اسىپ، ءالى دە جوعارى دەڭگەيدە قالىپ وتىر.
«جىلدىق ماندە ينفلياسيا 16،1 پايىزعا جەتتى. ازىق-تۇلىك ونىمدەرى باعاسىنىڭ ءوسۋى جىلدىق ماندە 20،8 پايىزعا جەتىپ، ەڭ كوپ ۇلەس قوسىپ وتىر. ازىق-تۇلىككە جاتپايتىن ينفلياسيا دا يمپورتتىق تاۋارلاردىڭ قىمباتتاۋىنا بايلانىستى 15،5 پايىزعا دەيىن ءوستى. اتاپ ايتقاندا، بۇل سۇرانىستىڭ ءوسۋى اياسىندا شارۋاشىلىق تاۋارلارىنا، سونداي-اق كەڭسە تاۋارلارىنا قاتىستى بولدى»، - دەپ ءتۇسىندىردى ۇب باسشىسى.
ونىڭ سوزىنە قاراعاندا، اقىلى قىزمەتتەر ينفلياسياسى 10،1 پايىزعا جەتتى. جابدىقتالعان تۇرعىن ءۇيدى جالعا بەرۋ بويىنشا باعانىڭ ەڭ جوعارى ءوسۋى بايقالىپ وتىر. 2022 جىلعى 1 شىلدەگە دەيىن تاريفتەردى كوتەرۋگە قويىلعان موراتوريي اياقتالدى. وسى ورايدا بارلىق وڭىرلەردە مونوپوليست كاسىپورىنداردىڭ قىزمەتتەرىنە تاريفتەر وزگەردى. وسىلايشا، ولاردىڭ ايلىق ءوسىمى 1،3% بولدى.
عالىمجان ءپىرماتوۆتىڭ پايىمىنشا، ينفلياسيا قاتىستى باعالاۋ ءالى دە جوعارى بولىپ تۇر. بيىلدىڭ قورىتىندىسى بويىنشا جاڭارتىلعان بولجامدارعا سايكەس، ينفلياسيا 16-18 پايىز دەڭگەيىندە بولۋى مۇمكىن. بۇل ۇلتتىق بانكتىڭ الدىڭعى بولجامىنان جوعارى.