الماتىدا كارديولوگيا جانە ىشكى اۋرۋلار عزي ميوكارد ينفاركتىن باستان وتكەرگەن، ماڭعىستاۋ وبلىسىنىڭ جاڭاوزەن قالاسىنان كەلگەن 20 جاستاعى جىگىتكە بىرەگەي وپەراسيا جاسادى.
دارىگەرلەردىڭ ايتۋىنشا، 20 جاستاعى ءالىمجان وتە جوعارى جۇرەك سوعۋ جيىلىگىنە، سونىمەن قاتار كۇيدىرۋ، قىسىم سيپاتتارىنداعى كەۋدە تۇسى اۋىرسىنۋلارىنا شاعىمدانعان. مۇنداي جۇرەك سوعىسى العاش رەت 1،5 جىل بۇرىن پايدا بولعان، ءبىراق ول دارىگەرلەرگە جۇگىنبەگەن. وسى جىلدىڭ ماۋسىم ايىندا جاعدايى ناشارلاپ، جەدەل مەديسينالىق كومەك شاقىرۋ كەزىندە الدىن الا جۇرەكتىڭ يشەميالىق اۋرۋى، جەدەل ميوكارد ينفاركتى، جۇرەكشە فيبريللياسيانىڭ پاروكسيزمالدى ءتۇرى دياگنوزى قويىلعان.
قوسىمشا تەكسەرۋ جۇرگىزۋ كەزىندە تۋا بىتكەن جۇرەك پاتولوگياسى (ۆولف-پاركينسون ۋايت سيندرومى) انىقتالدى. كىاعزي جاعدايىندا جۇرەكتى ەلەكتروفيزيولوگيالىق زەرتتەۋ جانە راديوجيىلىكتى كاتەتەرلىك ابلياسيا ۇسىنىلدى.
ناۋقاستىڭ جاستىعىن، جاقىندا دامىعان ميوكارد ينفاركتىن، تۋا بىتكەن جۇرەك پاتولوگياسىنىڭ بولۋىن، سونداي-اق ولىمگە اكەلۋى مۇمكىن ميوكارد ينفاركتىنىڭ قايتالانۋ ءقاۋپىنىڭ جوعارى بولۋىن ەسكەرە وتىرىپ، كلينيكانىڭ اريتمولوگتارى ناۋقاسقا رەسەي پروفەسسورى، م.ع.د. سەرگەي ارتەمەنكونىڭ باسشىلىعىمەن وپەراسيا جاسادى.
«ءبىز سەرگەي نيكولايەۆيچپەن 12 جىلدان استام ۋاقىت جۇمىس ىستەپ كەلەمىز، ول ءبىزدىڭ دارىگەرلەرمەن بىرگە جۇرەك ىرعاعىنىڭ بۇزىلۋى بار ەڭ اۋىر ناۋقاستارعا وپەراسيا جاسايدى. بىزدە بار جابدىق الەمدىك ستاندارتتارعا ساي كەلەدى جانە ەڭ كۇردەلى وپەراسيالاردى جاساۋعا، دياگنوستيكالاۋ دالدىگىنىڭ ارقاسىندا ولاردىڭ تيىمدىلىگىن ارتتىرۋعا، بولاشاقتا قايتالاناتىن وپەراسيا جاساۋ قاجەتتىلىگىن ازايتۋعا، كەنەتتەن بولاتىن ءولىم مەن ميوكارد ينفاركتى، جۇرەك قىزمەتىنىڭ جەتكىلىكسىزدىگىنىڭ دامۋى، ينسۋلت جانە ت.ب. اسقىنۋلاردىڭ سانىن ازايتۋعا مۇمكىندىك بەرەدى"، - دەيدى باسقارما ءتوراعاسى مارات پاشيموۆ.
3 اپتا ىشىندە 80-گە جۋىق وپەراسيا جاسالادى. ولارعا كورسەتكىشتەر – جۇرەك ىرعاعىنىڭ بۇزىلۋىمەن بايلانىستى تۋا بىتكەن جانە جۇرە پايدا بولعان پاتولوگيالار. بارلىق كلينيكادا مۇنداي وزىق جوعارى تەحنولوگيالىق جابدىق جوق جانە وسىنداي كۇردەلى پاسيەنتتەرگە وپەراسيا جاساۋعا دايىن ەمەس.
«انىقتالعان اۋرۋ، ونىڭ ەرەكشەلىكتەرىن ەسكەرە وتىرىپ، ميوكارد ينفاركتى جانە سول جاق قارىنشانىڭ فراكسياسىنىڭ تومەندەۋى ونىڭ ومىرىنە ءقاۋىپ توندىرگەن. سوندىقتان عزي ءبىرىنشى باسشىسىنىڭ قۇرامىنداعى كونسيليۋم ۆس ەفز جانە رچا دپپ جاساۋ تۋرالى شەشىم قابىلدادى. ءبىز تۋا بىتكەن پاتولوگيالىق جولدى جويا الدىق. وپەراسيا ءساتتى ءوتتى. جەرگىلىكتى انەستەزيامەن جاسالدى جانە وپەراسيا كەزىندە ناۋقاس ەسىندە بولدى. وپەراسيا شامامەن 2 ساعاتقا سوزىلدى»، - دەيدى پروفەسسور.
«وپەراسيا بارىسىندا جاقسى ناتيجەگە قول جەتكىزىلدى، ناۋقاس جالپى پالاتاعا اۋىستىرىلدى. بولجام وتە جاقسى، پاسيەنتتە ۇستامالاردىڭ قايتالانۋ ءقاۋپى جوق"، - دەدى بولىمشە مەڭگەرۋشىسى باعدات احىت.