بۇل تۋرالى يندونەزيا ەكونوميكالىق ماسەلەلەر جونىندەگى ءمينيسترىنىڭ ارنايى كەڭەسشىسى ريزال اففاندي II ەۋرازيالىق ەكونوميكالىق فورۋمىندا ايتتى
قازاقستان مەن يندونەزيا ەكىجاقتى ىنتىماقتاستىقتى دامىتۋ ءۇشىن كەلەشەگى مول الەۋەتكە يە. بۇل تۋرالى يندونەزيا ەكونوميكالىق ماسەلەلەر جونىندەگى ءمينيسترىنىڭ ارنايى كەڭەسشىسى ريزال اففاندي II ەۋرازيالىق ەكونوميكالىق فورۋمىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بىزدە ەكىجاقتى ساۋدا-ەكونوميكالىق قاتىناستاردى دامىتۋ ءۇشىن زور مۇمكىندىك بار. ەكى جىل بۇرىن ءبىزدىڭ مينيسترلىك دەلەگاسياسى قازاقستاندا بولدى، سودان كەيىن ءبىز وسى كووپەراسيانى جالعاستىرۋعا جانە كۇشەيتۋگە ۋاعدالاستىق. مەنىڭ ويىمشا، ونى دامىتۋدىڭ الەۋەتى مول. ءقازىر دە ەۋرازيالىق ەكونوميكالىق فورۋم الاڭدارىندا كەلىسسوز جۇرگىزىپ، ايتىلعان ۋاعدالاستىقتاردى ىسكە اسىرۋ ەكى ەل اراسىنداعى ءوزارا ءىس-قيمىلدى كۇشەيتۋ ءۇشىن جاعداي جاسايتىنىن تۇسىنەمىز»،– دەدى ارنايى كەڭەسشى ريزال اففاندي.
ول قازاقستاننىڭ يندونەزياعا كوپتەگەن تاۋار جەتكىزەتىنىن، جالپى يمپورتتا ەلەۋلى ۇلەستى يەلەنەتىنىن اتاپ ءوتتى. ءوز كەزەگىندە يندونەزيا ولاردى ىشكى نارىق ءۇشىن دە، افريكا مەن تاياۋ شىعىس ەلدەرىنە تاۋارلاردى ەكسپورتتاۋ ءۇشىن دە پايدالانادى.
سونىمەن قاتار، بىرلەسكەن جۇمىس ءۇشىن زور الەۋەت بىرلەسكەن ونەركاسىپتىك ءوندىرىس سالاسىنداعى كووپەراسيا پەرسپەكتيۆالارىمەن دە بايلانىستى.
«ءقازىر ءبىز قازاقستان اۋماعىندا اۆتوموبيل شينالارىن ءوندىرۋ جوباسىن ىسكە اسىرۋ مۇمكىندىگىن زەرتتەپ جاتىرمىز. بۇل يدەيانى جۇزەگە اسىرۋ ءبىزدىڭ ساۋدا-ەكونوميكالىق ىنتىماقتاستىعىمىزعا جاڭا سەرپىن بەرەدى دەپ سانايمىن»، – دەپ اتاپ ءوتتى ر. اففاندي.
يندونەزيا وكىلى استانا مەن دجاكارتانىڭ حالىقارالىق قاتىناستاردىڭ كوپتەگەن ماسەلەلەرى بويىنشا ۇقساس ساياسي كوزقاراستارى بار ەكەنىن ايتتى.
«بىزدە قانداي دا ءبىر ساياسي قايشىلىقتار جوق، يندونەزيا الەمنىڭ كوپتەگەن ەلدەرىمەن دوستىق قارىم-قاتىناستا، ءبىزدىڭ جاۋىمىز جوق. بۇل رەتتە ءبىزدىڭ ەلدەردە ساۋدا-ەكونوميكالىق قاتىناستاردى دامىتۋدا زور مۇمكىندىك بار، ەڭ باستىسى – ىنتىماقتاستىعىمىزدى نىعايتۋ. ەلدەر اراسىنداعى تىلدىك كەدەرگىنى ەڭسەرىپ، يندونەزيا مەن قازاقستان اراسىنداعى اقپاراتتىق كەڭىستىكتە جاڭا كوپىرلەر قالىپتاستىرۋ قاجەت»، – دەپ تۇيىندەدى ارنايى كەڭەسشى.