قازاقستاندىقتارعا سمارتفونىن تىركەۋگە قاتىستى كەلگەن SMS-حابارلامادا تەلەفوندى ۆەريفيكاسيالاۋعا 30 كۇن ۋاقىت بەرىلەتىنى ەسكەرتىلەدى، دەپ حابارلايدى aqshamnews.kz
بيىل 24 ناۋرىزدا قازاقستاندا ەنگىزىلگەن جاڭا IMEI ۆەريفيكاسياسى ەرەجەلەرى وسى كۇننەن باستاپ كۇشىنە ەنەدى. ولار جالعىز تەك جاڭا، ياعني 24 ناۋرىزدان كەيىن ەلگە اكەلىنگەن قۇرىلعىلارعا قاتىستى. بۇرىن اكەلىنگەن نەمەسە تىركەلگەن تەلەفوندارعا قوسىمشا شەكتەۋلەر قويىلمايدى – ولار اۆتوماتتى تۇردە اق تىزىمگە كىرەدى جانە قالىپتى جۇمىس ىستەيدى
ۆەريفيكاسيا – بۇل تەلەفوننىڭ IMEI كودىن اۆتوماتتى تۇردە تەكسەرۋ پروسەسى. تەكسەرۋ حالىقارالىق GSMA بازاسىمەن جانە قازاقستاننىڭ مەملەكەتتىك ورگاندارىمەن (مەملەكەتتىك كىرىستەر كوميتەتى، ۇقك) بىرىكتىرىلگەن جۇيە ارقىلى جۇرگىزىلەدى.
IMEI كودتى تىركەۋ نە ءۇشىن قاجەت؟
قازاقستاندا تەلەفوندار مەن سمارتفونداردىڭ زاڭسىز اكەلىنۋى مەن ۇرلىعى كوپتەپ كەزدەسەدى. ءبىر قۇرىلعىنىڭ IMEI كودىن بىرنەشە تەلەفونعا قولدانۋ جاعدايلارى بولعان. بۇل مەملەكەتكە سالىق ءتۇسىمىنىڭ ازايۋىنا، كولەڭكەلى نارىقتىڭ كوبەيۋىنە جانە ابونەنتتەردى قورعاۋدىڭ السىرەۋىنە اكەلەدى. سوندىقتان IMEI كودىن تىركەۋ جۇيەسى ەنگىزىلدى. ول زاڭسىز قۇرىلعىلاردى بۇعاتتاپ، تەك زاڭدى ساتىپ الىنعان تەلەفونداردىڭ عانا بايلانىس قىزمەتىن پايدالانۋىن قامتاماسىز ەتەدى.
IMEI كود بويىنشا 3 ءتىزىم
اق ءتىزىم
قۇرىلعى زاڭدى جولمەن اكەلىنگەن جانە دۇرىس تىركەلگەن.
بايلانىس قىزمەتىن ەش كەدەرگىسىز پايدالانا بەرەدى.
سۇر ءتىزىم
قۇرىلعىنىڭ مارتەبەسى كۇماندى.
وپەراتور يەسىنە SMS جىبەرەدى، 30 كۇن ىشىندە ارنايى انكەتانى تولتىرىپ، يەلىگىن راستاۋى كەرەك.
ۋاقىتىندا تىركەلمەسە، تەلەفون بۇعاتتالادى.
قارا ءتىزىم
ۇرلانعان، قولدان جاسالعان نەمەسە زاڭسىز اكەلىنگەن تەلەفوندار.
مۇنداي قۇرىلعىلار بىردەن بايلانىستان اجىراتىلادى.
قالاي تىركەيمىز؟
جاڭا قۇرىلعىنى ساتىپ الار الدىندا ازاماتتار IMEI-كودىن kz-imei.kz پورتالىندا نەمەسە egov.kz سايتىندا تەكسەرە الادى. بۇل – قولدان جاسالعان نەمەسە ۇرلانعان تەلەفونداردى ساتىپ الۋدىڭ الدىن الادى. ەگەر قۇرىلعى “سۇر تىزىمگە” تۇسسە، يەسى ونى 30 كۇن پايدالانا الادى. وسى مەرزىمدە بايلانىس وپەراتورلارى قۇرىلعىنى ۆەريفيكاسيالاۋ قاجەتتىگى تۋرالى SMS-حابارلامالار جىبەرەدى.
شەتەلدە ساتىپ الىنعان قۇرىلعىنى تىركەۋ كەزىندە پايدالانۋشى شەكارادان وتكەن كۇنىن كورسەتۋى ءتيىس.
IMEI-كودتىڭ ۆەريفيكاسيادان ءوتۋ مارتەبەسىن ونلاين رەجيمدە kz-imei.kz نەمەسە egov.kz پورتالدارىنان تەكسەرە الادى.
تەلەفوندى شەتەلدەن باسقا ادامعا بەرۋ ماقساتىندا اكەلگەن جاعدايدا دا، ونى سوڭعى پايدالانۋشىعا تاپسىرعانعا دەيىن مىندەتتى تۇردە ۆەريفيكاسيا جۇرگىزىلەدى. بۇل ءراسىمدى ورىنداۋ ءۇشىن قۇرىلعىنىڭ اكەلىنۋىنىڭ زاڭدىلىعىن راستايتىن قۇجاتتار (كەدەندىك دەكلاراسيا نەمەسە شەكارادان وتكەنىن راستايتىن انىقتاما) تالاپ ەتىلەدى.
تەلەفوندى IMEI كودى بويىنشا ۆەريفيكاسيالاۋ ءتارتىبى
الدىمەن egov.kz پورتالىنا نەمەسە kz-imei.kz سايتىنا كىرەسىز.
قانداي قۇجاتتار قاجەت:
جەكە كۋالىك (جسن مىندەتتى تۇردە)؛
ەلەكتروندى سيفرلىق قولتاڭبا (ەسق)؛
تەلەفوننىڭ بارلىق IMEI-كودتارى (*#06# تەرىپ نەمەسە قاپتامادان كورۋگە بولادى)؛
قازاقستانعا زاڭدى كىرگىزىلگەنىن راستايتىن قۇجاتتار: كەدەندىك دەكلاراسيا نەمەسە شەكارادان وتكەنىن راستايتىن انىقتاما.
سايتقا كىرىپ، ارنايى فورمانى تولتىرىپ، IMEI كودتارىن ەنگىزەسىز. سودان كەيىن قۇجاتتاردى ەلەكتروندى تۇردە قوسا تىركەيسىز.
ەسكەرتۋ. ەگەر قۇرىلعىعا قاتىستى ەشبىر قۇجات بولماسا، تەك جەكە كۋالىكپەن تىركەۋ مۇمكىن ەمەس. مىندەتتى تۇردە قازاقستانعا زاڭدى كىرگىزىلگەنىن دالەلدەيتىن قۇجات تالاپ ەتىلەدى.
ۆەريفيكاسيادان وتپەگەن قۇرىلعىلار الدىمەن 30 كۇن بويى “سۇر تىزىمدە” بولادى. ەگەر وسى مەرزىمدە تىركەۋ جۇرگىزىلمەسە، قۇرىلعى “قارا تىزىمگە” ەنگىزىلەدى. قارا تىزىمدەگى قۇرىلعىلار ءۇشىن بايلانىس قىزمەتتەرى (قوڭىراۋ، SMS، ءموبيلدى ينتەرنەت) تولىق شەكتەلەدى، - دەلىنگەن مينيسترلىكتىڭ رەسمي جاۋابىندا.
كومەك الۋ ءۇشىن Kz-imei.kz پورتالىنداعى تەحنيكالىق قولداۋ قىزمەتىنە جۇگىنۋ قاجەت. ماسەلەنى سيپاتتاپ، سكرينشوتتاردى قوسا تىركەۋ كەرەك. وتىنىشتەردى قاراستىرۋ 1-دەن 5 جۇمىس كۇنىنە دەيىن ۋاقىت الادى.
مينيسترلىك بولاشاقتا قيىندىق بولماس ءۇشىن IMEIء-ى تىركەلگەن جانە رەسمي تەكسەرىستەن وتكەن تەلەفونداردى ساتىپ الۋعا كەڭەس بەرەدى.