ازەربايجان پرەزيدەنتى يلحام الييەۆ اقتاۋ ماڭىندا بولعان ۇشاق اپاتىنان كەيىن قازاقستاندىق قۇتقارۋشىلاردىڭ باتىلدىعىن جوعارى باعالادى، دەپ حابارلايدى aqshamnews.kz
«وقيعا ورىن العان ساتتەن باستاپ قازاقستاندىق قۇتقارۋشىلار دەرەۋ اپات ورنىنا كەلىپ، ادامداردى قۇلاعان ۇشاقتان قۇتقارۋعا كىرىستى. ولار ءوز ومىرلەرىن قاتەرگە تىكتى، ويتكەنى جارىلىس بولۋى مۇمكىن ەدى. ۇشاقتىڭ ءبىر بولىگى جانىپ جاتقاندا، ەكىنشى بولىگىنىڭ ورتەنۋى ءقاۋپى بولدى. ءبىراق سوعان قاراماستان، ولار ناعىز ەرلىك كورسەتتى»، – دەدى ازەربايجان پرەزيدەنتى.
سونىمەن قاتار، ول قازاقستاندىق مەديسينا قىزمەتكەرلەرىنىڭ كاسىبيلىگىنە ەرەكشە توقتالدى.
«جارالانعان جولاۋشىلار دەرەۋ مەديسينالىق مەكەمەلەرگە جەتكىزىلدى. بۇل ءۇشىن دە پرەزيدەنت توقايەۆقا ريزاشىلىعىمدى ءبىلدىردىم»، – دەدى يلحام الييەۆ.
پرەزيدەنت ازەربايجان حالقىنىڭ قازاقستاندىق باۋىرلاردىڭ قولداۋىن ەرەكشە باعالاعانىن اتاپ ءوتتى.
«قازاقستاندىق باۋىرلارىمىزدىڭ ىنتىماقتاستىعى ازەربايجان حالقىنىڭ جۇرەگىندە تەرەڭ ءىز قالدىردى. قاراپايىم ازاماتتار اقتاۋداعى كونسۋلدىعىمىزعا كەلىپ، گۇل شوقتارىن قويىپ، قولداۋ ءبىلدىردى. بۇل شىنايى دوستىق پەن باۋىرلاستىقتىڭ كورىنىسى»، – دەپ ەرەكشە توقتالدى.
الييەۆ ۇشاق اپاتى سالدارىنان قازا تاپقان التى قازاقستاندىقتىڭ وتباسىنا كوڭىل ايتتى. ءوز كەزەگىندە، ق ر پرەزيدەنتى قاسىم-جومارت توقايەۆ ازەربايجان باسشىسىنا كوڭىل ءبىلدىردى.
«بۇل قايعىلى وقيعا ۇلكەن سىناق بولدى. ءبىراق مەن بۇل سىناقتان كەيىن ءبىزدىڭ دوستىعىمىز بەن باۋىرلاستىعىمىز بۇرىنعىدان دا نىعايا تۇسكەنىنە سەنىمدىمىن»، – دەدى ازەربايجان پرەزيدەنتى.