ىلە الاتاۋى ۇلتتىق پاركىنىڭ كەي ايماقتارىنا بوگەت سالىنادى

حالىقتى سەلدەن قورعاۋ ماقساتىندا بوگەت سالىنادى.

ىلە الاتاۋى ۇلتتىق تابيعي ساياباعىنىڭ 20،90 گا جەرى ەرەكشە قورعالاتىن اۋماقتان شىعارىلۋى مۇمكىن. ول جەرلەرگە تۇرعىنداردى سەلدەن قورعاۋ ماقساتىندا بوگەت سالىنادى. بۇل تۋرالى ورمان شارۋاشىلىعى جانە جانۋارلار دۇنيەسى كوميتەتىنىڭ قاۋلىسى اشىق تالقىعا شىعارىلدى، دەپ حابارلايدى Almaty-akshamy.kz. 

قاۋلىدا ۇلتتىق پارك تەرريتورياسىندا ورنالاسقان اقساي وزەنى باسسەينى سەل ءقاۋپى جوعارى اۋماق ەكەنى جازىلعان. ال وعان جاقىن جەردە 30 مىڭنان استام تۇرعىن قونىستانعان. 

«اقساي وزەنىنىڭ باسسەينىندە سەل ءقاۋپى جوعارى 18 ۋچاسكە، 25 مۇزدىق، 16 مورەنالىق كول (ولاردىڭ 5-ەۋى اسا ءقاۋىپتى) ورنالاسقان. ولار 30 مىڭنان استام ادامنىڭ ومىرىنە ءقاۋىپ توندىرەدى. سوندىقتان الماتى قالاسى مەن الماتى وبلىسىنىڭ حالقىن سەلدەن قورعاۋ ماقساتىندا 20،90 گا جەر ەرەكشە قورعاۋ اۋماعىنان شىعارىلىپ، قوسالقى جەرلەر ساناتىنا ەنگىزىلسىن. ول جەرگە بوگەت سالىنادى»، - دەلىنگەن قۇجاتتا. 

ەرەكشە قورعالاتىن تەرريتوريادان شىعارىلاتىن اۋماقتاردىڭ باسىم بولىگى جايىلىمدىق جەرلەر مەن ورمانسىز القاپتار. قاۋلى 13 شىلدەگە دەيىن تالقىلاۋعا شىعارىلدى.