ءىىم قىزمەتكەرى جاۋىنگەرلىك تىكۇشاقتى سۇيرەپ، رەكورد ورناتتى

بۇل - پوليسيا قىزمەتكەرىنىڭ رەسمي تىركەلگەن ءتورتىنشى رەكوردى

ناۋرىز مەيرامى قارساڭىندا ەلوردالىق اۆيابازادا ءىىم اسكەري-تەرگەۋ دەپارتامەنتىنىڭ قىزمەتكەرى باۋىرجان كامالييەۆ مي-17 جاۋىنگەرلىك تىكۇشاعىن 15 مەترگە جىلجىتىپ، رەكورد ورناتتى، دەپ حابارلايدى Almaty-akshamy.kz polisia.kz-كە سىلتەمە جاساپ.

بۇل - پوليسيا قىزمەتكەرىنىڭ رەسمي تىركەلگەن ءتورتىنشى رەكوردى. بۇرىن ول ەكى لوكوموتيۆتى، 42 توننالىق Airbus ۇشاعىن جانە 10 جول تالعامايتىن كولىكتى ورنىنان جىلجىتقان.

اقتىڭ مولاياتىن، تىرشىلىكتىڭ جاڭاراتىن كەزەڭى – كوكتەم مەركەسىنە ارنالعان شاراعا قورعانىس ءمينيسترى رۋسلان جاقسىلىقوۆ پەن ىشكى ىستەر ءمينيسترى مارات احمەتجانوۆ قاتىستى. ەكى ۆەدومستۆونىڭ باسشىلارى سپورتشىنى جاڭا جەتىستىگىمەن قۇتتىقتادى.

وعان قازاقستان رەكوردتار كىتابى ۇيىمىنىڭ اتىنان ارنايى سەرتيفيكات تابىستالدى.

"بۇگىن بارلىعىمىز قازاقستان رەكوردىنىڭ كۋاگەرى بولىپ وتىرمىز. كۇشتىك ەكستريم سالاسىنداعى بەلگىلى سپورتشى، ءىىم قىزمەتكەرى باۋىرجان كامالييەۆ ءبىزدىڭ كەڭسەمىزگە ءوزىنىڭ ۇسىنىسىمەن شىقتى. ول بۇرىن دا ءوزىنىڭ رەكوردتارىمەن ەلىمىزگە، الەمگە تانىمال بولعان. ءبىز مۇنداي سپورتشىلاردى ءاردايىم قولداۋعا دايىنبىز"، - دەدى قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ.

باۋىرجان كامالييەۆ  جاڭا رەكوردتى جاساماس بۇرىن ءۇش اي دايىندالعان. ونىڭ بازالىق سپورت ءتۇرى – اۋىر اتلەتيكا.

پاۋەرليفتينگتەن ەلىمىزدىڭ سپورت شەبەرى ىشكى ىستەر ورگاندارىندا 15 جىلدان بەرى قىزمەت اتقارىپ كەلەدى.