سوڭعى جىلدارى ەلىمىزدە لۋدومانيا بەلەڭ الۋدا. بۇل – قۇمار ويىندارعا پاتولوگيالىق تاۋەلدىلىك.
ازارتقا بەرىلۋدىڭ سوڭى الەۋمەتتىك-ماتەريالدىق قۇندىلىقتاردىڭ تومەندەۋىنە، ءتىپتى كەيدە قىلمىس جاساۋعا تۇرتكى بولۋى مۇمكىن.
رەسمي دەرەكتەرگە سايكەس، قازاقستاندا شامامەن قۇمار ويىندارىنا سالىنعان 350 مىڭ ادام بار. ولاردىڭ ءاربىرىنىڭ ورتاشا قارىزى شامامەن 10 ملن تەڭگەنى قۇرايدى.
اقشا تىگىپ، توقتاي الماۋدىڭ سالدارى ەلدە ەرلى-زايىپتىلاردىڭ اجىراسۋىنا، قۇمار ويىنعا قۇنىققانداردىڭ وزىنە-وزى قول جۇمساۋىنا اكەپ سوعۋدا. سوندىقتان بۇل ماسەلە بۇگىندە وزەكتى جانە مەملەكەت نازارىندا.
13 قاڭتاردا ىشكى ىستەر مينيسترلىگى ۇلتتىق قاۋىپسىزدىك كوميتەتىمەن بىرلەسىپ، باس پروكۋراتۋرانىڭ ۇيلەستىرۋىمەن لوتەرەيا كلۋبتارىنىڭ اتىمەن جۇمىس ىستەيتىن زاڭسىز ونلاين-كازينولاردىڭ ءىرى جەلىسىن جويدى.
ەڭ اۋقىمدى بىرلەسكەن ارنايى وپەراسيانى جۇرگىزۋگە ىشكى ىستەر مينيسترلىگى مەن ۇلتتىق قاۋىپسىزدىك كوميتەتىنىڭ ءۇش مىڭنان استام قىزمەتكەرى جۇمىلدىرىلدى.
— جەدەل ازىرلەمە وربيتاسىندا كريميناليتەت وكىلدەرى دە بولدى، ولار ويىن مەكەمەلەرىنە قىلمىستىق ىقپال جانە قامقورلىق ەتكەن، سونداي-اق لوتو كلۋب قىزمەتكەرلەرى مەن كليەنتتەرىنە قاتىستى قىلمىستار جاساعان. زاڭسىز ويىن قىزمەتىنەن باسقا، VIP-كليەنتتەرگە ينتيمدىك قىزمەتتەردى ۇيىمداستىرۋ، جەڭگەتايلىق جانە ەسىرتكى زاتتارىن پايدالانۋ فاكتىلەرى تىركەلدى. ارنايى وپەراسيا بارىسىندا پوليسياعا 400-دەن استام ادام جەتكىزىلدى. نەگىزگى قىلمىستىق سحەمانى ۇيىمداستىرعان سەگىز ادام، ونىڭ ىشىندە الىس جانە جاقىن شەتەل ازاماتتارى ۇستالدى، – دەدى ق ر ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
رەسپۋبليكا بويىنشا لوتو كلۋبتارعا 570 ءتىنتۋ جۇرگىزىلدى. 23 بىرلىك اتىس جانە تراۆماتيكالىق قارۋ، 247 ملن تەڭگە، 55 ملن رەسەي ءرۋبلى، 125 مىڭ اقش دوللارى، كومپيۋتەرلىك تەحنيكا، ءموبيلدى قۇرىلعىلار، سونداي-اق باسقا دا زاتتاي دالەلدەمەلەر تاركىلەندى. ناتيجەسىندە ەلدە بارلىعى 326 لوتو كلۋب قىزمەتىنىڭ جولى كەسىلدى.
شەتەلدەن ونلاين-كازينو تاراتاتىن سەرۆەرلەر انىقتالىپ، بۇعاتتالدى. اكىمشىلەردىڭ ويىن بارىسىنا ىقپال ەتىپ، رەتتەپ وتىرعانى بەلگىلى بولدى. بۇرىن جۇرگىزىلگەن ساراپتامالار ۇستالعان ادامداردىڭ زاڭسىز ارەكەتتەرىن راستادى.
– سوتقا دەيىنگى تەرگەپ-تەكسەرۋ بارىسىندا ءبىر عانا ءوڭىردىڭ لوتو كلۋبتارىنىڭ اي سايىنعى جيىنتىق تابىسى ورتا ەسەپپەن 300 ملن تەڭگەنى قۇرايتىنى انىقتالدى، سايكەسىنشە ەلىمىزدىڭ بارلىق وڭىرلەرىنەن شامامەن 6 ملرد تەڭگەنى قۇراعان. بۇل رەتتە اقشا قاراجاتىنىڭ شامامەن 70% شەتەلگە شىعارىلعان. ۇيىمداستىرۋشىلاردىڭ بىرەۋىنىڭ عانا بانكتىك شوتىنا اي سايىن شامامەن 900 ملن تەڭگە ءتۇسىپ وتىرعان. تەرگەۋدى ءىىم تەرگەۋ دەپارتامەنتى قىلمىستىق كودەكستىڭ بىرنەشە باپتارى بويىنشا جۇرگىزۋدە، فيگۋرانتتارعا ۇيىمداسقان قىلمىستىق توپ قۇرۋ، وعان باسشىلىق ەتۋ جانە قاتىسۋ ايىبى تاعىلۋدا. باسقا مالىمەتتەر جاريالاۋعا جاتپايدى، – دەدى قۋاندىق الپىس.