جالعان اقپارات تاراتقانى ءۇشىن جاۋاپكەرشىلىك كوزدەلگەن.
WhatsApp مەسسەندجەرىندە تاراعان حابارلامادا وزدەرىن پوليسيا قىزمەتكەرىمىز دەپ تانىستىراتىن الاياقتار تۋرالى ايتىلعان، دەپ حابارلايدى Almaty-akshamy.kz.
قولدارىنا ءىىم سيمۆوليكاسى بار بلانكىلەر ۇستاعان ولار ۇيلەردى ارالاپ، الداعى حالىق ساناعى قارساڭىندا قازاقستاندىقتاردىڭ جەكە كۋالىكتەرىن تەكسەرەدى. ال شىن مانىندە توناۋمەن اينالىسادى ەكەن.
ق ر ىشكى ىستەر مينيسترلىگىنىڭ باسپا ءسوز قىزمەتى بۇل اقپاراتقا قاتىستى تۇسىنىكتەمە بەردى.
«تارالعان حابارلامادا كورسەتىلگەن الاياقتىق فاكتىلەرى رەسپۋبليكا اۋماعىندا تىركەلگەن جوق.
ءىىم ازاماتتاردىڭ جەكە كۋالىكتەرىن تەكسەرۋ، سۋرەتكە ءتۇسىرۋ جانە ساۋساق ىزدەرىن الۋ ماقساتىندا ۇيلەردى ارالامايدى.
ق ر قك 274-بابىنا سايكەس كورىنەۋ جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعانىن ەسكە سالامىز.
ازاماتتاردى ساق بولۋعا جانە بوگدە ادامدارعا جەكە دەرەكتەر تۋرالى اقپارات بەرمەۋگە شاقىرامىز»، – دەلىنگەن ق ر ءىىم باسپا ءسوز قىزمەتىنىڭ حابارلاماسىندا.