بۇل تۋرالى ءبىلىم جانە عىلىم ءمينيسترى اسحات ايماعامبەتوۆتىڭ Telegram ارناسىندا ءبىلىم بەرۋ جۇيەسىنىڭ رەيتينگتەرى تۋرالى جازباسىنان بەلگىلى بولدى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
TOEFL iBT. 2018 جىلى – 82 بالل، 2019 جىلى – 85 بالل، 2020 جىلى – 120 بالدان 86 بالل. ورتالىق ازيا ەلدەرى اراسىندا بۇل - ەڭ جوعارى كورسەتكىش. CEFR جالپىەۋروپالىق جۇيەسىندەگى اعىلشىن ءتىلىن مەڭگەرۋ دەڭگەيلەرىنە سايكەس، بۇل كورسەتكىشتەر اعىلشىن ءتىلىن ءبىلۋدىڭ شەكتى نەمەسە ورتاشا دەڭگەيىنە (B1) سايكەس كەلەدى.
ياعني، بۇل تۇرمىستىق جاعدايلاردا تىلدەسۋ مۇمكىندىگىن نەمەسە تانىس تاقىرىپتار بويىنشا اڭگىمەلەسۋگە بولاتىنىن بىلدىرەدى. تىلدىك داعدىلار بولىنىسىندە قازاقستاندىقتار تىڭداۋ جانە سويلەۋ بويىنشا ورتاشا ەسەپپەن ءاربىر بولىمدەگى 30 ەڭ جوعارى بالدان 22 بالل، وقۋ جانە جازۋ بويىنشا 21 بالل جينايدى.
IELTS. 2019 جىلى ازاماتتاردىڭ اعىلشىن ءتىلىن مەڭگەرۋ دەڭگەيىنىڭ ورتاشا بالى ەڭ جوعارى 9-دىڭ 6،1 بالىن قۇرادى، بۇل بىلىكتى پايدالانۋشى دەڭگەيىنە سايكەس كەلەدى. بۇل قازاقستاندىق ۇمىتكەرلەردىڭ كەيبىر ناقتىلانباعان اقپاراتقا قاراماستان، ءتىلدى جاقسى مەڭگەرگەنىن بىلدىرەدى. ولار كۇردەلى ءتىلدى، اسىرەسە تانىس جاعدايلاردا قولدانىپ، تۇسىنە الادى.
تىلدىك داعدىلاردىڭ تۇرلەرى بويىنشا قازاقستاندىقتار وقۋ جانە تىڭداۋ بويىنشا ايتارلىقتاي جوعارى ناتيجە (6،3 بالدان)، ال سويلەۋ (6،0) مەن جازۋ (5،6 ۇپاي) بويىنشا ءبىرشاما تومەن ناتيجە كورسەتىپ وتىر. كەيبىرەۋلەر تاڭداناتىن شىعار، ءبىراق ولار IELTS حالىقارالىق ەمتيحانىنداعى جالپى بالل بويىنشا قازاقستاننىڭ كورەيا (6،0)، جۇڭگو (5،8)، جاپونيا (5،8)، وزبەكستان (5،7) جانە تاعى باسقا كوپتەگەن ەلدەن وزىپ كەتكەنىنە قىزىعا قارايتىن بولادى.
«IELTS جانە TOEFL ەلدەر بويىنشا رەسمي رەيتينگ جاسامايتىنىن ەستە ۇستاعان ءجون. ودان بولەك، ولار بويىنشا جالپى قورىتىندىلار جاساۋ دا قيىن. مۇنداي دەرەكتەرمەن جانە رەيتينگتەرمەن جۇمىس ىستەگەندە، ەڭ الدىمەن، ادىستەمەگە نازار اۋدارىپ، سودان كەيىن عانا قورىتىندى جاساۋ كەرەك»، – دەپ جازدى اسحات ايماعامبەتوۆ.