ماماندار ارحەولوگيالىق ەسكەرتكىشتەردى زەرتتەۋ مەن ساقتاۋمەن ەكى ءتۇرلى مينيسترلىك اينالىساتىنىن سىنعا الدى.
اشىق نقا پورتالىندا جاريالانعان «تۇركىستان قالاسىنىڭ ەرەكشە مارتەبەسى تۋرالى» ق ر زاڭى جوباسىنىڭ كونسۋلتاتيۆتىك قۇجاتىندا ياسساۋي كەسەنەسىن ساقتاۋ ءقاۋپى جويىلماعان جاعدايدا، ونىڭ يۋنەسكو-نىڭ بۇكىلالەمدىك مۇرا تىزىمىندەگى مارتەبەسىن جوعالتۋى مۇمكىن ەكەنى جازىلعان.
بۇعان العىشارتتار بار. مىسالى، جوبادا ارحەولوگيالىق ەسكەرتكىشتەرگە قاتىستى جۇمىستارمەن ەكى ءتۇرلى مينيسترلىكتىڭ اينالىسۋى تيىمدىلىك بەرمەيتىنى جازىلعان. اتاپ ايتقاندا، تاريحي-مادەني ماڭىزى بار وبەكتىلەردى قورعاۋ جانە پايدالانۋ سالاسىنداعى ۋاكىلەتتى ورگان مادەنيەت جانە سپورت مينيسترلىگى بولسا، ارحەولوگيالىق ەسكەرتكىشتەردى زەرتتەۋ جونىندەگى باعدارلامالاردى قارجىلاندىرۋمەن عىلىم جانە جوعارى ءبىلىم مينيسترلىگىنىڭ عىلىم كوميتەتى اينالىسادى.
«ناتيجەسىندە ەكى ءتۇرلى مينيسترلىك تاريحي نىسانداردى ساقتاۋمەن، زەرتتەۋمەن جانە تانىمال ەتۋمەن اينالىسادى، بۇل وسى باعىتتاعى جۇمىستىڭ تيىمدىلىگىن ارتتىرۋعا ىقپال ەتپەيدى»، – دەپ جازىلعان جوبادا.
ەسكە سالايىق، پرەزيدەنت قاسىم-جومارت توقايەۆ 2022 جىلعى 27 قىركۇيەكتە تۇركىستان وبلىسىنا جۇمىس ساپارى بارىسىندا قوجا احمەت ياسساۋي كەسەنەسىنىڭ جاي-كۇيىنىڭ ساقتالۋىنا قاتىستى ۇكىمەتكە تاپسىرما بەرگەن بولاتىن.
قازىرگى ۋاقىتتا كەسەنەنىڭ ىلعالدانۋ جاعدايى بويىنشا زەرتتەۋ، زەردەلەۋ جۇمىستارى قولعا الىنعان. 2022 جىلى كەسەنەنىڭ ءار بولىگىندە ونىڭ تەمپەراتۋرالىق-ىلعالدىق رەجيمىن، قابىرعالارىنداعى جارىقشاقتاردى قاداعالايتىن مونيتورينگتىك جۇيە ورناتىلدى.
«2022-2024 جىلدارعا ارنالعان كەشەندى جوسپار شەڭبەرىندە كەسەنەنىڭ جاعدايىن ءارتۇرلى بەيىمدەگى عىلىمي-زەرتتەۋ ينستيتۋتتارى 2023 جىلى زەردەلەۋ جۇمىستارىن جۇرگىزەدى. عىلىمي زەرتتەۋ 2 جۇمىستارىنا قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتى، ۋ. احمەدسافين اتىنداعى گيدروگەولوگيا جانە گەوەكولوگيا ينستيتۋتى، بوتانيكا جانە فيتوينترودۋكسيا ينستيتۋتى، «قازقايتاجاڭارتۋ» مەكەمەسى، ياساۋي اتىنداعى قازاق-تۇرىك ۋنيۆەرسيتەتى، «ازىرەت سۇلتان» مەملەكەتتىك رەسپۋبليكالىق تاريحي-مادەني مۋزەي-قورىعى قاتىسادى. 2023 جىلعا ارنالعان رەسپۋبليكالىق بيۋدجەتتەن كەسەنەدە تولىق عىلىمي-زەردەلەۋ جۇمىستارىن جۇرگىزۋگە 317 ملن تەڭگە قارجى ءبولىندى»، – دەپ جاۋاپ بەرگەن بولاتىن ۇكىمەت باسشىسىنىڭ ورىنباسارى التاي كولگىنوۆ ءماجىلىس دەپۋتاتتارىنىڭ ساۋالىنا جاۋابىندا.