قازنييور راديولوگيا جانە يادرولىق مەديسينا ءبولىمىنىڭ مەڭگەرۋشىسى جاندوس امانقۇلوۆ يادرولىق مەديسينانىڭ زاماناۋي الەمدە، اسىرەسە، ونكولوگيا سالاسىندا ماڭىزدى ورىن الاتىنىن اتاپ ءوتتى.
جاندوس امانقۇلوۆتىڭ ايتۋىنشا، راديواكتيۆتى يزوتوپتاردى پايدالانۋ ارقىلى جۇرگىزىلەتىن تەحنولوگيالار اۋرۋدى ەرتە كەزەڭدەردە انىقتاپ قانا قويماي، ءتيىمدى ەمدەۋدى دە جۇزەگە اسىرۋعا مۇمكىندىك بەرەدى، سونىمەن قاتار ساۋ تىندەرگە اسەرىن مەيلىنشە ازايتادى.
– يادرولىق مەديسينانىڭ ماڭىزدى باعىتتارىنىڭ ءبىرى – دياگنوستيكا. راديويزوتوپتىق دياگنوستيكا ىشكى اعزالار مەن تىندەردى جانە ولاردىڭ پاتولوگيالارىن جوعارى دالدىكپەن ۆيزۋاليزاسيالاۋعا مۇمكىندىك بەرەدى، بۇل ءوز كەزەگىندە ءتيىمدى ەمدەۋ ادىستەرىن ۋاقتىلى قولدانۋدىڭ ىقتيمالدىعىن ارتتىرادى. مىسالى، پوزيتروندىق-ەميسسيالىق توموگرافيا كومپيۋتەرلىك توموگرافيامەن بىرگە ىسىكتىڭ سۋرەتىن الۋعا جانە ونىڭ مەتابوليكالىق بەلسەندىلىگىن باعالاۋعا مۇمكىندىك بەرەدى. بۇل، اسىرەسە، ونكولوگيادا ماڭىزدى، ويتكەنى ەمدەۋدىڭ ساتتىلىگى كوبىنەسە اۋرۋدىڭ ەرتە انىقتالۋى مەن ونىڭ ساتىسىن ءدال انىقتاۋعا بايلانىستى، – دەدى جاندوس امانقۇلوۆ.
قازنييور دەرەكتەرىنە سۇيەنسەك، ەلدەگى قاتەرلى ىسىك اۋرۋلارىنىڭ دەڭگەيى ءار 100 مىڭ ادامعا 200-دەن استام جاعدايدى قۇرايدى. تەك وتكەن جىلى 44 909 جاڭا جاعداي تىركەلگەن.
– يادرولىق مەديسينانى ونكولوگيالىق اۋرۋلاردى دياگنوستيكالاۋ جانە ەمدەۋدە قولدانۋ پاسيەنتتەردىڭ بولاشاعىن ايتارلىقتاي جاقسارتادى. بۇل باعىتتى دامىتۋ، جاڭا تەحنولوگيالارعا ينۆەستيسيا سالۋ جانە مامانداردى دايارلاۋ وتە ماڭىزدى، وسىلايشا ەلىمىزدىڭ ءاربىر ازاماتى جوعارى ساپالى مەديسينالىق كومەككە قول جەتكىزە الادى، – دەپ قورىتىندىلادى جاندوس امانقۇلوۆ.