قازاقستان مۇسىلماندارى ءدىني باسقارماسىنا تابىستالدى.
مەملەكەت باسشىسى تۇركىستاندا وتكەن ۇلتتىق قۇرىلتايدىڭ ەكىنشى وتىرىسىندا ايگىلى مارال يشاننىڭ كەنەسارى حانعا سىيلاعان قۇران كىتابى تابىلعانى جانە ونىڭ ەلگە ورالعانى جايىندا ءمالىم ەتكەن بولاتىن، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆ ءوز سوزىندە كەنەسارى حاننىڭ قۇرانى قازاقستان مۇسىلماندارى ءدىني باسقارماسىنا تابىستالاتىنىن اتاپ وتكەن ەدى.
بۇگىن پرەزيدەنتتىڭ تىكەلەي تاپسىرماسى بويىنشا مەملەكەتتىك كەڭەسشى ەرلان قارين ءمۇفتياتقا بارىپ، كەنەسارى حاننىڭ قۇرانىن تابىستادى.
مەملەكەتتىك كەڭەسشى قۇراندى وتاندىق جانە شەتەلدىك جوعارى بىلىكتى، تاجىريبەلى ماماندار تولىقتاي زەرتتەگەنىن، ءبىراۋىزدان ونىڭ كەنەسارى حانعا تيەسىلى ەكەنىن انىقتاعانىن ايتتى. سونىمەن قاتار ول قۇراننىڭ جان-جاقتى سيپاتتاماسىن بايانداپ، ەرەكشەلىكتەرىن جەتكىزدى.
عالىمدار قۇراننىڭ بۇل نۇسقاسى قازاق حالقىنىڭ تاريحي جادىگەرى ەكەنىن راستاپ، ونىڭ تاريحي جانە مۋزەيلىك قۇندىلىعى وتە جوعارى دەپ باعالاپ وتىر.
سالتاناتتى راسىمگە قوعام قايراتكەرلەرى، زيالى قاۋىم وكىلدەرى، ۇلتتىق قۇرىلتايدىڭ مۇشەلەرى مەن ءدىن قىزمەتكەرلەرى قاتىستى.