«حان ءتاڭىرى» سىيلىعى تابىستالدى

الماتى وبلىسىندا ءوڭىردىڭ ۇزدىك سپورتشىلارىنا «حان ءتاڭىرى» سىيلىعى تابىستالدى.

سالتاناتتى شارادا سپورت سالاسىنا ەڭبەك ەتىپ جۇرگەن ماماندار «دەنە شىنىقتىرۋ جانە سپورتتى دامىتۋعا قوسقان ۇلەسى ءۇشىن» توسبەلگىلەرىمەن، قازاقستان رەسپۋبليكاسىنىڭ تۋريزم جانە سپورت مينيسترلىگىنىڭ جانە الماتى وبلىسى اكىمىنىڭ قۇرمەت گراموتالارىمەن ماراپاتتالدى. سونىمەن قاتار اقشالاي سىياقى بەرىلدى، دەپ حابارلايدى اlmaty-akshamy.kz.

وسىمەن ەكىنشى رەت ءوتىپ وتىرعان ۇزدىك سپورتشىلاردى ماراپاتتاۋ راسىمىنە وبلىستاعى سپورت سالاسىنىڭ بارلىق وكىلدەرى قاتىستى. سالتاناتتى شارادا ءسوز العان ءوڭىر باسشىسى كەلەر جىلى سپورتشىلارعا بەرىلەتىن سىياقى ەكى ەسەگە ارتاتىن جەتكىزدى.

مارات سۇلتانعازييەۆ، الماتى وبلىسىنىڭ اكىمى:

الماتى وبلىسىنىڭ سپورتشىلارى ءۇشىن دە تابىستى جىل بولدى دەپ ەسەپتەيمىز. بيىل سپورتشىلارىمىز حالىقارالىق جانە رەسپۋبليكالىق دەڭگەيدەگى جارىستاردا 1800-دەن اسا مەدال يەلەندى. 146-ى الەم چەمپيوناتتارىندا، ال 119-ى ازيا چەمپيوناتتارىندا.

سالتاناتتى جيىندا الماتى وبلىسىنىڭ دەنە شىنىقتىرۋ جانە سپورت سالاسىنىڭ ۇزدىك 130 وكىلى ماراپاتتالدى. ولاردىڭ اراسىندا حالىقارالىق جارىستاردا ەل مەرەيىن اسقاقتاتىپ جۇرگەن سپورتشىلار دا بار.

تولعاناي قاسىمبەك، بوكستان الەم چەمپيونى:

مۇمكىن ەمەس نارسە جوق. تەك تاباندىلىق پەن قايسارلىقتىڭ ارقاسىندا بارلىعىنا جەتۋگە بولادى. ءتارتىپ پەن ديسيپليناعا ۇيرەنۋ كەرەك. وسىلاردىڭ بارلىعى بويىڭىزدا بولسا جەڭىسكە جەتپەۋ مۇمكىن ەمەس.

ەربولات سارابەكوۆ، وبلىستىق دەنە شىنىقتىرۋ جانە سپورت باسقارماسىنىڭ باسشىسى:

ايتا كەتۋ كەرەك، جازدا وتكەن ازيا ويىندارىندا الماتى وبلىسى ەكى التىن، ءۇش قولا مەدال جەڭىپ الدى. قازاقستان رەسپۋبليكاسى بويىنشا ءۇشىنشى ورىنعا تۇراقتادى.

جىل باسىنان بەرى الماتى وبلىسىنىڭ سپورتشىلارى رەسپۋبليكالىق جانە حالىقارالىق جارىستاردا 1806 مەدال يەلەندى. ەندىگى مەجە - كەلەر جىلى وتەتىن وليمپيادا ويىندارىندا جاقسى ناتيجە كورسەتۋ.