ءبىلىم سالاسىنداعى ەلەۋلى وزگەرىستەر
پرەمەر-مينيستردىڭ ورىنباسارى ەرالى توعجانوۆ حالىقارالىق وليمپيادالاردىڭ جەڭىمپازدارىنا قانداي قولداۋ جاسالاتىنىن ايتتى.
ۇكىمەتتە وتكەن ونلاين باسپا ءسوز ءماسليحاتىندا ەرالى توعجانوۆ پەداگوگتاردىڭ بىلىكتىلىگىن ارتتىرۋ كەزەڭى قىسقارعانىن مالىمدەدى، دەپ حابارلايدى Almaty-akshamy.kz.
«بۇگىنگىدەي اقپارات زامانىندا ءبىلىمنىڭ مازمۇنى جىلدام وزگەرەتىنىن ەسكەرە وتىرىپ، پەداگوگتاردىڭ بىلىكتىلىگىن ارتتىرۋ كەزەڭى 5 جىلدان 3 جىلعا اۋىستىرىلادى»،- دەدى ەرالى توعجانوۆ ۇكىمەتتەگى ونلاين باسپا ءسوز ءماسليحاتىندا.
سونىمەن قاتار ول حالىقارالىق وليمپيادالاردىڭ جەڭىمپازدارى مەن جۇلدەگەرلەرىنە جوعارى وقۋ ورىندارىنا كونكۋرسسىز گرانتتار بەرىلەتىنىن ايتتى.
«بۇل شەشىم تالانتتى جاستاردى جالپى قولداۋعا باعىتتالعان، ولاردىڭ ەلىمىزدە تەگىن جوعارى ءبىلىم الۋىنا جول اشادى. سونداي-اق حالىقارالىق وليپيادالاردىڭ جەڭىمپازدارىنا، ولاردىڭ پەداگوگتارى مەن تالىمگەرلەرىنە ءبىرجولعى اقشالاي سىيلىقتار دا تاعايىندالاتىن بولادى»، - دەدى ە. توعجانوۆ.