الماتىداعى كارديولوگيا جانە ىشكى اۋرۋلار عزي حالىقارالىق ستاندارتتارعا سايكەستىگىن تاعى دا راستادى جانە JCIء-دىڭ (Joint Commission International) قايتا اككرەديتتەۋ راسىمىنەن ءساتتى ءوتتى. دالىرەك ايتساق، بيىلعى شىلدەدە JCI مەديسينالىق ۇيىمداردى اككرەديتتەۋ جونىندەگى حالىقارالىق بىرىككەن كوميسسيا الماتىداعى قىزمەتىنە باعالاۋ جۇرگىزدى.
اتالعان ينستيتۋت العاش رەت 2021 جىلى وسىنداي اۋديتتەن وتكەن. الايدا كورسەتىلەتىن كومەكتىڭ ساپاسى مەن قاۋىپسىزدىگىنىڭ جوعارى ستاندارتتارىن ساقتاۋ ءۇشىن JCI اراعا ءۇش جىل سالىپ وتكىزىلىپ تۇرادى.
JCI حالىقارالىق اككرەديتتەۋ – بۇل مەديسينالىق كومەكتىڭ جوعارى ساپاسىنىڭ ستاندارتى، مەديسينالىق قىزمەتتەردىڭ ساپاسى مەن قاۋىپسىزدىگىن وبەكتيۆتى تانۋ. اۋديتورلار اتاپ وتكەندەي، ولار ينستيتۋتتا بولىپ جاتقان بارلىق جاعدايعا پاسيەنتتىڭ كوزقاراسىمەن قارادى. حالىقارالىق كوميسسيا مۇشەلەرى ۇجىمدا ماقتانۋعا تۇرارلىق نارسە كوپ ەكەنىن اتاپ ءوتتى، ويتكەنى ينستيتۋتتا جوعارى دەڭگەيدەگى ماماندار جۇمىس ىستەيدى. ولار پاسيەنتتەرگە ساپالى كومەك كورسەتۋ، مۋلتيديسيپلينارلىق ءتاسىلدى قولدانۋ، سونداي-اق ءوزارا بايلانىستى پروسەستەر بويىنشا كوماندانىڭ ۇيلەسىمدى جۇمىسىن اتاپ ءوتتى.
اۋديتورلار توبى ينستيتۋتتا قولدانىلاتىن تيىمدىلىك پەن ساپانىڭ جەكەلەگەن ينديكاتورلارىن، مىسالى، قانت ديابەتىمەن اۋىراتىن جۇكتى ايەلدەردى ەمدەۋ تاجىريبەسىن، كارديورەابيليتاسيا كەزەڭدەرى اراسىنداعى ساباقتاستىق كريتەرييلەرىن، ىشەكتىڭ ەندوسكوپياعا دايىندىق ساپاسىنىڭ كورسەتكىشتەرىن جانە ت.ب. JCI حالىقارالىق كىتاپحاناسىنا بەرۋگە شەشىم قابىلدادى. مۇنداي وزىق تاجىريبەلەر بۇكىل الەم بويىنشا مەديسينالىق ۇيىمدار اراسىندا تارالىپ، تاجىريبە الماسۋعا جانە مەديسينالىق قىزمەتتەردىڭ ساپاسىن ارتتىرۋعا ىقپال ەتەدى. دەمەك، ءبىزدىڭ وتاندىق ءعزي-دىڭ زاماناۋي تاسىلدەرىن شەتەلدىك دارىگەرلەر دە پايدالانادى دەگەن ءسوز بۇل.
كلينيكانىڭ جۇمىسى 1110-نان استام كورسەتكىش بويىنشا باعالانىپ، ولاردىڭ تەك 10-ى بويىنشا تەكسەرۋ بارىسىندا جويىلعان ەلەۋسىز ەسكەرتۋلەر بولدى.
ءيا، JCI ستاندارتتارى بويىنشا بارلىق بولىمشە مەن پروسەستەر باعالاندى، ولار: پاسيەنتتەردى ەمدەۋ جانە كۇتۋ تاسىلدەرى، ولاردىڭ قاۋىپسىزدىگى مەن قۇقىقتارىنىڭ ساقتالۋى، عيماراتتىڭ قاۋىپسىزدىگى، دارى-دارمەكپەن جۇمىس ىستەۋ، ينفەكسيالىق قاۋىپسىزدىك، كادرلارمەن قامتاماسىز ەتۋ، تاۋەكەلدەردى باسقارۋ، ءبىلىم بەرۋ جانە عىلىمي پروسەستەر، مەديسينالىق جانە اكىمشىلىك پەرسونالدىڭ پاسيەنتتەرگە جەكە كوزقاراسى. قاۋىپتىلىگى جوعارى دارى-دارمەكپەن دۇرىس جۇمىس ىستەۋ، ولاردى تاڭبالاۋعا جانە ساقتاۋعا، ينسيدەنتتەردى باسقارۋعا، اۋرۋحاناىشىلىك ينفەكسيالاردىڭ، قۇلاۋ سالدارىنان جاراقات الۋ ءقاۋپىن ازايتۋعا ەرەكشە نازار اۋدارىلدى.
"JCI ستاندارتتارى دەنساۋلىعى مەن ءومىرىن بىزگە سەنىپ تاپسىرعان پاسيەنتتەردىڭ كۇتىمى مەن قاۋىپسىزدىگىنە باعىتتالعان. JCI اككرەديتاسياسى پاسيەنتتەرگە كلينيكاعا سەنە الاتىنىن كورسەتەدى. ءبىز JCI ۇسىناتىن قۇرالداردى پايدالانا وتىرىپ، قىزمەتتەردىڭ ساپاسىن ۇنەمى جاقسارتۋعا تىرىسامىز"، – دەدى كىاعزي باسقارما ءتوراعاسى مارات ورىنباسار ۇلى.