كورمەنى 2021 جىلدىڭ 14 قاراشاسىنا دەيىن تاماشالاۋعا بولادى.
ءا. قاستەيەۆ اتىنداعى ق ر مەملەكەتتىك ونەر مۋزەيىندە الماتىداعى رەسەيدىڭ باس كونسۋلدىعى مەن قازاقستان رەسپۋبليكاسىنداعى «روسسوترۋدنيچەستۆو» وكىلدىگىنىڭ قاتىسۋىمەن 2021 جىلى 4 قاراشادا ساعات 13.00-دە كورمەنىڭ بەسىنشى مەرەيتويلىق سالتاناتتى اشىلۋ ءراسىمى بولادى، دەپ حابارلايدى Almaty-akshamy.kz
«ماڭگىلىك بىرگەمىز» اتتى كورمە ادامزاتتىڭ عارىشقا تۇڭعىش رەت ۇشقانىنا 60 جىل تولۋى مەن قازاقستانداعى «بالالار مەن جاسوسپىرىمدەردىڭ وقۋىن قولداۋ» جىلىنا ارنالعان.
«ماڭگىلىك بىرگەمىز» اۆتورلىق ينتەرەرلىك قۋىرشاقتاردىڭ حالىقارالىق مەرەيتويلىق كورمەسى ءا. قاستەيەۆ اتىنداعى ق ر مەملەكەتتىك ونەر مۋزەيىندە وقۋشىلاردىڭ كۇزگى دەمالىس كۇندەرىندە بەسىنشى رەت وتەدى. كورمەگە اۆتورلىق ينتەرەرلىك قۋىرشاق ونەرىنىڭ ءتۇرلى باعىتىن كورسەتەتىن 100-دەن استام شەبەر مەن شىعارماشىلىق بىرلەستىكتەر قاتىسادى. كورمە بولعان بۇرىنعى ءتورت جىل ىشىندە رەسەي، قازاقستان، تۇركيا، فرانسيا، بەلگيا، قىرعىزستان، بەلورۋسسيانىڭ 120-دان استام قۋىرشاقشى شەبەرلەرى ءوز ونەرلەرىن كورسەتكەن بولاتىن. ولاردىڭ شىعارمالارىن كورمەگە كەلگەن 30000-داي ادام كورىپ، تاماشالادى. 2021 جىلى كورمەگە قويىلعان تۋىندىلاردىڭ تاقىرىبى – «الىس جانە جاقىن جۇلدىزدار».
كوكشەتاۋلىق شەبەر اناستاسيا ەليسەيەۆانىڭ «گاگارين. «عارىشتا تۇڭعىش رەت» دەپ اتالاتىن جۇمىسى مەرەيتويلىق 2021 جىلعى ەكسپوزيسيانىڭ رەسمي قۋىرشاعى بولىپ وتىر. «ماڭگىلىك بىرگەمىز» اۆتورلىق ينتەرەرلىك قۋىرشاقتار جوباسى تاريحىندا وسى قۋىرشاق العاش رەت 2021 جىلى 8 جەلتوقساندا جۇك كەمەسىمەن حالىقارالىق عارىش بەكەتىنە جەتكىزىلىپ، قايتىپ كەلگەن سوڭ ول حالىقارالىق عارىش بەكەتىندە رەسەيلىك كينو توبىنىڭ قۇرامىندا ۇشقان اكتريسا يۋليا پەرەسيلدكە تاپسىرىلاتىن بولادى.
