حالىقارالىق ايتىستا قازاقستان اقىنى باس جۇلدەگە يە بولدى

وزبەكستاندا كەيىنگى 7 جىلدا العاش رەت حالىقارالىق اقىندار ايتىسى ءوتتى.

جىر دوداسى جەرگىلىكتى قازاق مادەني ورتالىعىنىڭ قولداۋىمەن ۇيىمداستىرىلدى. ايتۋلى الامانعا قازاق پەن قىرعىزدىڭ ارقالى اقىندارى جينالدى، دەپ حابارلايدى Almaty-akshamy.kz.

24.kz سايتىنىڭ مالىمەتىنشە، ۇزىن ىرعاسى 10 جۇيرىك قاتىسقان ايتىستىڭ باس جۇلدەسىنە 10 ملن سوم، ياعني 400 مىڭ تەڭگە تىگىلدى، ال جالپى جۇلدە قورى 1 ملن تەڭگەگە جۋىقتادى.

بۇل كەشتە كورەرمەن قىز بەن جىگىت، اعا مەن ءىنى، قازاق پەن قىرعىز اراسىنداعى ءازىلى جاراسقان ادەمى ايتىستىڭ كۋاسى بولدى. دوستىق ءھام ىنتىماق ۇعىمى كەڭ ناسيحاتتالىپ قانا قويماي، ەل مەن جەردە بولىپ جاتقان وقيعالار سۇلۋ سوزبەن cۋرەتتەلدى.

«ايتىس ادەمى بولىپ جاتىر. بۇدان ارتىق بولمايدى. بارىنە راقمەت. جاڭا جىل بارىمىزگە تابىس اكەلسىن. ەلىمىز، جۇرتىمىز تىنىش بولسىن»، - دەيدى تاشكەنت تۇرعىنى سانابات ساپاربەكوۆا. 

اقىندار ايتىسى 60 جىلدان بەرى جەرگىلىكتى تەلەارنا ەفيرىنەن تۇسپەي كەلە «زامانداس-ديدار» باعدارلاماسىنىڭ مەرەيتويىنا ورايلاستىرىلدى. شىعارماشىلىق ۇجىم وزبەكستاننىڭ تۇكپىر-تۇكپىرىن ارالاپ، قانداستاردىڭ تىنىس-تىرشىلىگىن باياندايدى. مادەنيەتى مەن ونەرىنىڭ دامىپ، ۇرپاقتان ۇرپاققا مۇرا بوپ قالۋىنا قوسقان ۇلەسى زور.

 جىر بايگەسى 4 ساعاتقا سوزىلدى. شەشۋشى سىندا قازاقستاندىق نۇرلان ەسەنقۇلوۆ پەن وزبەكستاندىق قانداس تالعات ورىنبەكوۆ كەزدەستى. اقىندار ەلدىك ماسەلەلەردى كوتەرىپ، ۇرىمتال تۇستا ءبىر-بىرىن سىناپ-مىنەپ تە الدى. تارتىستى وتكەن فينالدىڭ ناتيجەسىندە باس بايگە نۇرلاننىڭ ەنشىسىنە بۇيىردى. ال تالعات ءبىرىنشى ورىنعا لايىق دەپ تانىلدى. قىرعىزستان جانە قاراقالپاقستان اتىنان سىنعا تۇسكەندەر دە جۇلدە ەنشىلەپ، ەلىنە ولجالى ورالدى.