عىلىم جانە جوعارى ءبىلىم ۆيسە-مينيسترى كاميل اقاتوۆ «تەحنولوگيالاردى كوممەرسيالاندىرۋ رەاكتورى» الاڭىندا عىلىمنىڭ الەۋەتى تۋرالى ايتتى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
«عىلىمي قىزمەتكەرلەر كۇنىمەن بارشاڭىزدى قۇتتىقتايمىن. ءقازىر مەملەكەت تاراپىنان عىلىمي-تەحنيكالىق قىزمەتتى كوممەرسيالاندىرۋعا نازار اۋدارىلىپ وتىر. ەكونوميكا سەكتورىندا عىلىمي جوبالار جۇزەگە اسىرىلىپ جاتىر. مەملەكەت باسشىسى عىلىم ەلگە باسەكەلەستىك اكەلەتىن جاڭا تەحنولوگيالى وندىرىسكە باعىتتالاتىنىن ايتتى»، – دەدى اقاتوۆ.
ۆيسە-مينيستردىڭ ايتۋىنشا، «عىلىم جانە تەحنولوگيالىق ساياسات» تۋرالى جاڭا زاڭ جوباسى ازىرلەنىپ جاتىر.
«عىلىم بيزنەس جانە وندىرىسپەن ىقپالداسىپ جۇمىس ىستەمەك. بيىل 2029 جىلعا دەيىن عىلىم جانە جوعارى ءبىلىمدى دامىتۋ تۇجىرىمداماسى ازىرلەندى. عىلىمعا بولىنەتىن گرانتتار جىل سايىن جۇزەگە اسىرىلادى. عىلىمي تەحنولوگيالاردىڭ دەڭگەيىن تەكسەرەتىن ادىستەر ازىرلەندى. ءبىزدىڭ ەلىمىزدە عىلىمي-تەحنيكالىق پۋل بار. «كوممەرسيالاندىرۋ تۋرالى» زاڭى اياسىندا 225 جوبا قولداۋ تاپتى»، – دەدى ول.
ءداستۇر بويىنشا قازاقستاننىڭ جوعارى وقۋ ورىندارى مەن عزي عالىمدارىنا بيزنەسمەندەردى، كاسىپكەرلەردى جانە الەۋەتتى ينۆەستورلاردى نارىقتا ولاردى ودان ءارى كوممەرسيالاندىرۋ بويىنشا مامىلەلەر جاساسۋ ماقساتىندا عىلىمي يدەيالار مەن ازىرلەمەلەرگە قىزىقتىرۋ مۇمكىندىگى ۇسىنىلدى.