الماتىدا پروفەسسور رىسبەك بايماحانۇلىنا ارنالعان حالىقارالىق كونفەرەنسيا ءوتتى
الماتىدا قازاق عىلىمىنىڭ كورنەكتى وكىلى، تەحنيكا عىلىمدارىنىڭ دوكتورى، پروفەسسور رىسبەك بايماحانۇلىنا ارنالعان حالىقارالىق عىلىمي-پراكتيكالىق كونفەرەنسيا جوعارى دەڭگەيدە ءوتتى. عالىمنىڭ ەسىمىمەن تىعىز بايلانىستى – گەومەحانيكا، سيفرلىق تەحنولوگيالار جانە ينجەنەرلىك عىلىمدار سالاسى بۇگىن جاڭا تىنىس الدى.
QyzPU مەن مەحانيكا جانە ماشيناتانۋ ينستيتۋتى ۇيىمداستىرعان القالى جيىن عىلىمدى ۇلىقتاعان تاعىلىمدى شارا عانا ەمەس، جاس عالىمدارعا جول كورسەتكەن باعىت-باعدار الاڭى بولدى. «گەومەحانيكالىق پروسەستەر جانە سيفرلاندىرۋ: يننوۆاسيالىق تەحنولوگيالار جانە دامۋ پەرسپەكتيۆالارى» تاقىرىبىنداعى كونفەرەنسيادا گەومەحانيكا عىلىمىنىڭ دامۋىنداعى تىڭ يدەيالار مەن پروفەسسور بايماحان ۇلىنىڭ عىلىمي مەكتەبىنىڭ مۇراگەرلىگى كەڭىنەن تالقىلاندى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما ءتوراعاسى – رەكتورى گۇلميرا قانايدىڭ ايتۋىنشا، پروفەسسور بايماحان ۇلى – ءبىر عانا عىلىمنىڭ ەمەس، ۇلت رۋحانياتى مەن ۇلتتىق تاربيەگە دە ەڭبەك سىڭىرگەن قايراتكەر.
«پروفەسسور رىسبەك بايماحان ۇلى – حالىقارالىق دەڭگەيدە مويىندالعان كورنەكتى عالىم. ول قىزدار ۋنيۆەرسيتەتىندە 50 جىلعا جۋىق ۋاقىت بويى جەمىستى ەڭبەك ەتىپ، عىلىم مەن ءبىلىم سالاسىنا سۇبەلى ۇلەس قوستى. گەومەحانيكا سالاسى بويىنشا حالىقارالىق ISSMG قوعامىنىڭ ءتورت عىلىمي كوميتەتىنىڭ مۇشەسى رەتىندە جاپونيا، كانادا، تۇركيا، جۇڭگو سىندى الدىڭعى قاتارلى مەملەكەتتەردە عىلىمي ۇسىنىس-تارىمەن تانىلدى. عالىمنىڭ 450-دەن استام عىلىمي ەڭبەگى جارىق كورگەن. ونىڭ ىشىندە 19 وقۋ قۇرالى، 10 مونوگرافياسى بار. سونداي-اق، Scopus دەرەكتەر بازاسىندا – 9، Web of Science بازاسىندا – 2 ماقالاسى جاريالانىپ، حيرش يندەكسى 6-عا جەتكەن. پروفەسسوردىڭ جەتەكشىلىگىمەن 9 عىلىم كانديداتى، 1 عىلىم دوكتورى جانە كوپتەگەن ماگيسترلەر دايىندالدى. ۇلتتىق رۋح پەن تاربيەگە ايرىقشا ءمان بەرگەن رىسبەك بايماحان ۇلىنىڭ عىلىمي-پەداگوگيكالىق مۇراسى – جاس ۇرپاققا ۇلگى، كەيىنگى بۋىنعا باعىت-باعدار»، – دەدى رەكتور.
ءىس-شاراعا اكادەميكتەر، پروفەسسورلار، جاس زەرتتەۋشىلەر جانە عالىمنىڭ تۋعان-تۋىستارى قاتىستى. سەكسيالىق وتىرىستاردا 30-دان اسا عىلىمي بايانداما تىڭدالىپ، ۇزدىك عىلىمي جۇمىستار ديپلوممەن ماراپاتتالدى.
تەحنيكا عىلىمدارىنىڭ دوكتورى، پروفەسسور، حالىقارالىق كولىك اكادەمياسىنىڭ جانە ق ر ۇلتتىق ينجەنەرلىك اكادەمياسىنىڭ اكادەميگى باعدات بۇرحانباي ۇلىنىڭ سوزىنشە، رىسبەك بايماحان ۇلى – مەتروپوليتەن قۇرىلىسىنىڭ قاۋىپسىزدىگى جونىندە عىلىمي نەگىزدەمە جاساعان العاشقى قازاقستاندىق عالىمداردىڭ ءبىرى.
«بۇل كونفەرەنسيانىڭ وسكەلەڭ ۇرپاققا تاربيەلىك ماڭىزى وتە زور. الماتى مەتروسىنىڭ قاجەتتىلىگى مەن تيىمدىلىگىن دالەلدەگەن – وسى كىسىنىڭ بىرنەشە ونجىلدىققا سوزىلعان ەڭبەگى. ول مەترونىڭ جەر ۇستىندەگى عيماراتتارعا قاراعاندا ءقاۋىپسىز ەكەنىن دە كوپ جىلدار بويى عىلىمي تۇرعىدان دالەلدەدى. ءومىرى – ەرلىك پەن تالماي ەڭبەكتىڭ ۇلگىسى. ءار الۋان سالادا دارىندىلىعىن كورسەتتى: جاس كەزىندە اڭگىمەلەر، فانتاستيكالىق پوۆەستەر مەن كوپشىلىككە ارنالعان عىلىمي كىتاپتار جازدى. ماتەماتيكا، فيزيكا، مەحانيكا، اسىرەسە ساندىق ادىستەردى تەرەڭ مەڭگەرگەن. قىسقاسى، وسكەلەڭ ۇرپاققا ونەگە بولار تۇلعا»، – دەدى عالىم.
كونفەرەنسيا اياسىندا پروفەسسوردىڭ ءومىرى مەن عىلىمي جولى جايلى بەينەبايان كورسەتىلىپ، شاكىرتتەرى ارناۋ ولەڭدەرىن وقىدى. اسىرەسە جاس زەرتتەۋشىلەرگە ارنالعان «ۇزدىك جاس عالىم» ماراپاتتارى – شارانىڭ ەرەكشە ءساتى بولدى.
عالىمنىڭ ۇلى ايدار بايماحان جاس عالىمداردى ىنتالاندىرۋ ماقساتىندا جەكە قاراجاتىنان سىياقى تاعايىنداپ، عىلىمداعى ساباقتاستىقتى قولدايتىنىن جەتكىزدى.
«اكەمنىڭ ومىرلىك ميسسياسى – ءبىلىم مەن عىلىمدى بىرىكتىرۋ بولاتىن. ول 450-دان اسا عىلىمي ماقالانىڭ اۆتورى. تەك عىلىمي ماقالالار جازىپ قانا قويماي، شاكىرت تاربيەلەۋدى پارىز سانادى. اكەمنىڭ ءىسى – بىزگە امانات»، – دەدى ول.
بۇل كونفەرەنسيا – قۇرمەت پەن عىلىمنىڭ ۇيلەسكەن ءساتى عانا ەمەس، بولاشاق زەرتتەۋلەردىڭ باستاۋ كوزىنە اينالاتىن ماڭىزدى الاڭ بولدى. رىسبەك بايماحان ۇلىنىڭ عىلىمي مۇراسى ءالى دە تالاي بۋىنعا باعىت بولارى ءسوزسىز.
QyzPU قابىرعاسىندا وتكەن تاعىلىمدى جيىن – عىلىمعا باس ءيۋدىڭ، ۇلاعاتتى ۇستازدى ەسكە الۋدىڭ جانە عىلىم مەن رۋحانياتتىڭ ءوزارا بايلانىسىن دارىپتەۋدىڭ جارقىن ۇلگىسى بولدى.
