قازاقستاندا ەنەرگەتيكا سالاسىن كەشەندى جاڭعىرتىپ، ونىڭ تۇراقتى دامۋىن قامتاماسىز ەتۋگە ارنالعان «ءتاريفتى ينۆەستيسياعا ايىرباستاۋ» جاڭارتىلعان باعدارلاماسى ىسكە اسىرىلىپ جاتىر. بۇل تەتىك ەنەرگيامەن جابدىقتاۋدىڭ سەنىمدىلىگىن ارتتىرۋ ءۇشىن ماقساتتى ينۆەستيسيا تارتۋعا مۇمكىندىك بەرەدى ءارى تۇتىنۋشىعا تۇسەتىن جۇكتەمەنى بارىنشا ازايتادى، دەپ حابارلايدى aqshamnews.kz
2024 جىلى باعدارلاما اياسىندا ەداۋىر قاراجات جۇمىلدىرىپ، ەلدەگى ەلەكتر ستانسيالارىندا جوندەۋ جانە قالپىنا كەلتىرۋ جۇمىستارىن دەر كەزىندە ورىنداۋعا قول جەتكىزىلدى. 2025 جىلى ينۆەستيسيا كولەمى 428 ملرد تەڭگەگە دەيىن ۇلعايادى دەپ كۇتىلۋدە، بۇل اعىمداعى جىلمەن سالىستىرعاندا 13،24 %-عا جوعارى.
جاڭارتىلعان ءتاسىلدىڭ باستى جاڭالىعى – ينۆەستيسيالاردى قايتارۋدىڭ جىلدىق ءليميتىن 32 ملرد-تان 428 ملرد تەڭگەگە دەيىن كوتەرۋ جانە ەلەكتر قۋاتىن قولداۋعا ارنالعان قىزمەتتىڭ شەكتى ءتاريفىن ارتتىرۋ. بۇل جەكە كاپيتال تارتۋدى جانە اۋقىمدى تەحنيكالىق قايتا جاراقتاندىرۋدى ىنتالاندىرادى.
«تاريفتى ينۆەستيسياعا ايىرباستاۋ» باعدارلاماسى تاريفتىك وزگەرىستەردى ەنەرگيا ءوندىرۋشى كومپانيالاردىڭ ناقتى مىندەتتەمەلەرىمەن – جوندەۋ قورلارىن ۇلعايتۋ، جابدىقتاردى جاڭارتۋ، وندىرىستىك پەرسونالدىڭ ەڭبەك جاعدايىن جاقسارتۋمەن قاتاڭ بايلانىستىرۋدى كوزدەيدى. ەڭبەكاقىنى كوتەرۋ، ستانسيالاردى جاڭعىرتۋ، جاڭا تەحنولوگيالاردى ەنگىزۋ – وسىنىڭ بارلىعى بۇكىل ەنەرگەتيكالىق جۇيەنىڭ سەنىمدىلىگى مەن تيىمدىلىگىن ارتتىرۋعا ىقپال ەتەدى.
ءسويتىپ، باعدارلاما شەڭبەرىندەگى ءتاريفتى تۇزەتۋ - شىعىن وسۋىنە جاي جاۋاپ ەمەس، زاماناۋي، ورنىقتى ءارى كەلەشەككە باعىتتالعان ەنەرگەتيكانى قالىپتاستىرۋعا جاسالعان ويلاستىرىلعان قادام. ۇزاق مەرزىمدى ينۆەستيسيالىق كوزقاراس ارقىلى قازاقستان ەنەرگەتيكالىق قاۋىپسىزدىگىن نىعايتىپ، 2060 جىلعا قاراي كومىرتەگى بەيتاراپتىعىنا جەتۋگە ەلەۋلى ۇلەس قوسادى.
تاريف قالىپتاستىرۋدىڭ اشىقتىعى مەن قاراجاتتى پايدالانۋ تۋرالى ەسەپتىلىككە كەلسەك، ەنەرگيا ءوندىرۋشى ۇيىمداردىڭ دەرەكتەرى ەندى ۋاكىلەتتى ورگاننىڭ اقپاراتتىق جۇيەسى ارقىلى ۇسىنىلادى.
سوندىقتان ەلەكتر ەنەرگياسى بويىنشا شەكتى ءتاريفتى بەكىتۋ نەمەسە تۇزەتۋ جونىندەگى كەلەسى وتىنىمدەر دە وسى اقپاراتتىق جۇيە ارقىلى بەرىلىپ، ءتاريفتۇزۋ پروسەستەرى تولىق سيفرلاندىرىلماق.