گرۋزيا حالقى سانيتارلىق تالاپتار مەن ۆاكسينا الۋدا سالعىرتتىق تانىتىپ ءجۇر
قازان ايىندا عانا ەلدەگى مەكتەپتەر مەن بالاباقشالار اشىلىپ، ءتىپتى ساياسي شارالار قىزا تۇسكەن بولاتىن. حالىق سانيتارلىق تالاپتاردى ۇمىتىپ، شەت ەلگە بارىس-كەلىس كوبەيگەن. گرۋزيا حالقى ۆاكسينا قابىلاۋدا دا سالعىرتتىق تانىتىپ وتىر. كۇن سايىن كوروناۆيرۋستى جۇقتىرعان 6 مىڭنان اسا ادام انىقتالادى، دەپ حابارلايدى Almaty-akshamy.kz
اۋىر حالدەگى ناۋقاستار مەن ءولىم-جىتىم كورسەتكىشى ءوستى. كۇنىنە بۇل دەرتتەن 40-تان استام ادام كوز جۇمادى. ۆاكسينالاۋ قارقىنى دا باسەڭدەدى. ەگەر تامىز ايىندا 63 مىڭ ادام ەكپە سالدىرسا، قازان ايىندا تەك 5 مىڭ ادام ۆاكسينا العان. ءقازىر گرۋزيادا حالىقتىڭ تەك 33%ء-ى ۆاكسينالاندى. ال جۋىردا جارامدىلىق مەرزىمى بىتكەندىكتەن، AstraZeneka ۆاكسيناسىنىڭ 17 مىڭ داناسى قولدانىلماي قالدى. جەرگىلىكتى جۇرت بۇل پرەپاراتقا سەنىمسىزدىكپەن قارايدى. ويتكەنى كوكتەمدە ونى ەككەن مەدبيكە قايتىس بولعان ەدى. ال ارقانى كەڭگە سالعان جۇرت ساقتىق شارالارىن ۇمىتقان ءتارىزدى.
«ەپيداحۋال قيىن. وكىنىشتىسى ناۋقاستار سانى ءوسىپ كەلەدى. بۇل تاڭقالارلىق جايت ەمەس، ويتكەنى ازاماتتارىمىزدىڭ ءجۇرىس-تۇرىسى كوپ. سونداي-اق ماسكا تاقپايدى، سانيتارلىق شارالاردى ساقتامايدى. قالىڭ جۇرت قاتىسقان كوپتەگەن شارا ءوتتى. مۇنىڭ ءبارى جاعدايدىڭ ناشارلاۋىنا اكەلدى. جەلتوقسان ايى كۇردەلى بولادى. وعان وزگە دە ۆيرۋستى اۋرۋلار قوسىلادى»، - دەدى اۋرۋلار مەن قوعامدىق دەنساۋلىقتى باقىلاۋ ورتالىعىنىڭ ديرەكتورى اميران گامكرەليدزە
ۇكىمەت ازىرگە جاڭا شەكتەۋلەر ەنگىزۋدى كوزدەپ وتىرعان جوق. دەنساۋلىق ساقتاۋ مينيسترلىگى ەل تۇرعىندارىن قازىرگى ەرەجەلەر مەن نۇسقاۋلىقتاردى ساقتاۋعا شاقىردى. سونداي-اق حالىقتىڭ ۆاكسينالاۋعا بەلسەندىلىگى ارتادى دەگەن ۇمىتتە.