گەرمانيانىڭ گامبۋرگ قالاسىندا قازاقستاندىق كومپوزيتور ايگەرىم سەيلوۆا ءوزىنىڭ اعىلشىن تىلىندەگى وپەرا مۋلتيمەدياسىن ۇسىنادى
360 گرادۋستىق دىبىسقا نەگىزدەلگەن جاڭا مانەردەگى كلاسسيكالىق مۋزىكا شىعارماسىنىڭ پرەمەراسى 2 جەلتوقسان كۇنى وتەدى، دەپ حابارلايدى Almaty-akshamy.kz
ونەرسۇيەر قاۋىم جاندى اۋەن مەن ەلەكتروندى دىبىستاردىڭ ۇندەستىگىنە قانىعىپ، ۆيرتۋالدى مۋزىكالىق ساياحاتقا ساپار شەگەدى. اۋقىمدى ءارى اسەرلى باعدارلامانى قۇرۋعا 25 حالىقارالىق دەڭگەيدەگى مۋزىكا مايتالمانى جۇمىلدىرىلعان. ونى جۇزەگە اسىرۋعا ەكى جىلداي ۋاقىت كەتكەن.
«بۇل 90 مينۋتتىق شىعارما بەينەينستالياسيا نەگىزىندە قۇرىلىپ، سوليستىك اسپاپتار، وپەرا ورىنداۋشىلارى، شاعىن كامەرالىق وركەسترگە ارنالىپ جازىلعان. ياعني سەنوگرافيانى تولىعىمەن ۆيدەو ءارتىس الماستىرادى. سونداي-اق ەلەكتروندى اكۋستيكا اسەرى قولدانىلادى. جاندى دىبىسپەن قاتار، ءتۇرلى سەنسور ارقىلى ەلەكتروندى دىبىستار قوسىلادى»، - كومپوزيتور ايگەرىم سەيلوۆا.
وتاندىق سازگەر تۋىندىنىڭ تۇساۋكەسەرىن ەل تاۋەلسىزدىگىنىڭ 30 جىلدىعىنا ورايلاستىرىپ وتىر. مۋزىكانت ءوز مۋزىكاسى مەن ونەر ءتىلى ارقىلى قازاقستان اتىن تانىتىپ جۇرگەنىن ماقتان ەتەدى. ايگەرىم سەيلوۆا – جەكە اسپاپتار مەن كامەرالىق وركەسترلەرگە ارنالعان 200-گە تارتا شىعارمانىڭ اۆتورى. ونىڭ تۋىندىلارىن الەمنىڭ ۇلكەن ساحنالارىندا ۇزدىك مۋزىكانتتار جارىسا ورىنداپ ءجۇر. ايگەرىم – جىل سايىن تەك ءبىر عانا الەمنىڭ ۇزدىك كومپوزيتورىنا بۇيىراتىن حيندەميت سىيلىعىنىڭ يەگەرى.