گەرمانيادا قازاقستان كينوسىنىڭ اپتالىعى ءوتىپ جاتىر

مادەني ءىس-شارا قازاقستان مەن گەرمانيا اراسىنداعى ديپلوماتيالىق قارىم-قاتىناستىڭ 30 جىلدىعىنا ارنالعان.

كورەرمەندەرگە العاشقىلاردىڭ قاتارىندا رەجيسسور اقان ساتايەۆتىڭ «توميريس» تاريحي كارتيناسى كورسەتىلدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

ماسساگەتتەردىڭ پاتشايىمى مەن پارسىلاردىڭ كير پاتشاسى تۋرالى ءفيلمدى تاماشالاۋ كەزىندە زال لىق تولدى. اكتەرلاردىڭ ويىنى مەن كوستيۋمدەرى ەرەكشە اسەر قالدىرعان.

اپتالىق اياسىندا رەجيسسور نۇرگەلدى سادىعۇلوۆتىڭ «بالۋان شولاق»، راشيد سۇلەيمەنوۆتىڭ «ورالۋ» فيلمدەرى جانە رەجيسسورلەر تىلەك تولەۋعازى مەن تۇردىبەك مايداننىڭ «مۇزبالاق» ءمۋلتفيلمى جانە باسقا دا تۋىندىلار كورسەتىلەدى. 

«مەن جاڭا عانا ءفيلمدى كورىپ شىقتىم، كارتينادان كەرەمەت اسەر الدىم. اسىرەسە، مايدان دالاسىنداعى كورىنىستەر كوڭىلىمنەن شىقتى. ولاردى ءتۇسىرۋ، كاسكادەرلاردىڭ جۇمىسىن، جالپى، بۇكىل ۇدەرىستى ۇيىمداستىرۋ وتە قيىن. بۇل -  كەرەمەت ءىس جانە تاريحقا تەرەڭ بويلاۋعا تاماشا مۇمكىندىك. ەرىك-جىگەرى مىقتى ايەلدىڭ بەينەسى ءساتتى بەرىلگەن. سوسىن، ارينە، كوستيۋمدەر وتە قاتتى ۇنادى»، - دەدى فيلمدەر پروديۋسەرى تەرەزا كلامانن.

«ءبىزدىڭ ماقساتىمىز - ەلىمىزدىڭ وسى ءسالت-داستۇرىن، مادەنيەتىن كينو ارقىلى جەرگىلىكتى جۇرتشىلىققا جەتكىزۋ. بۇل ەلشىلىكتىڭ جەكە جوسپارلاعان ءىس-شارالارىنىڭ ءبىرى بولىپ تابىلادى. قارىم-قاتىناستىڭ 30 جىلدىعى بولعاندىقتان، ارينە، ءبىز وسى مەرەيلى جىل اياسىندا كوپتەگەن ءىس-شارالاردى جۇزەگە اسىرۋعا جوسپارلاپ وتىرمىز»، - دەيدى گفر-داعى ق ر ەلشىسى داۋرەن كاريپوۆ.