ولجاس بەكتەنوۆ پەن GE HealthCare باسشىلىعى ەلىمىزدە مەديسينالىق جابدىقتار ءوندىرىسىن قۇرۋ جوباسىنىڭ ورىندالۋ بارىسىن تالقىلادى، دەپ حابارلايدى aqshamnews.kz
قازاقستاننىڭ پرەمەر-مينيسترى ولجاس بەكتەنوۆ جاھاندىق ينۆەستيسيا جونىندەگى قازاقستاندىق دوڭگەلەك ۇستەل اياسىندا GE HealthCare كومپانياسىنىڭ تاياۋ شىعىس، سولتۇستىك-شىعىس جانە وڭتۇستىك افريكا، تۇركيا، رەسەي جانە تمد ەلدەرىندەگى پرەزيدەنتى كوستاس دەليگياننيسپەن كەزدەسۋ وتكىزدى. تاراپتار مەملەكەت باسشىسى قاسىم-جومارت توقايەۆتىڭ قاتىسۋىمەن قول قويىلعان، دەنساۋلىق ساقتاۋ جۇيەسىن جاڭعىرتۋعا جانە قازاقستاندا جەرگىلىكتى وندىرىستىك مۇمكىندىكتەردى دامىتۋعا باعىتتالعان نەگىزدەمەلىك كەلىسىمنىڭ ىسكە اسىرىلۋ بارىسىن تالقىلادى.
GE HealthCare – مەديسينالىق قۇرىلعىلار، دياگنوستيكالىق فارماسيەۆتيكالىق پرەپاراتتار، سونداي-اق سيفرلىق شەشىمدەر مەن دەرەكتەردى تالداۋ جۇيەلەرىن شىعاراتىن الەمدەگى جەتەكشى وندىرۋشىلەردىڭ ءبىرى.
كەزدەسۋدە قاتىسۋشىلار قازاقستاندا مەديسينالىق دياگنوستيكالىق قۇرال-جابدىقتار ءوندىرىسىن لوكاليزاسيالاۋ جانە كلينيكالىق بەينەلەردىڭ ورتالىقتاندىرىلعان ۇلتتىق مۇراعاتىن قۇرۋ جوسپارلارىن تالقىلادى. العاشقى باعىت بويىنشا ۋلترادىبىستىق دياگنوستيكا اپپاراتتارى مەن ونىمدىلىگى جوعارى كومپيۋتەرلىك توموگرافتاردىڭ جاڭا ۇلگىلەرىن لوكاليزاسيالاۋ كوزدەلگەن. مەديسينالىق بەينەلەردىڭ ورتالىقتاندىرىلعان مۇراعاتى پاسيەنتتەردىڭ دەرەكتەرىن ءقاۋىپسىز ساقتاپ، ءبىرىڭعاي سيفرلىق دەنساۋلىق ساقتاۋ كەڭىستىگىن قۇرۋعا مۇمكىندىك بەرەدى.
ولجاس بەكتەنوۆ ۇكىمەتتىڭ باسىم باعىتتارىنىڭ ءبىرى – قازاقستاندىقتاردىڭ قاۋىپسىزدىگى مەن دەنساۋلىعىن قامتاماسىز ەتۋگە باعىتتالعان ساپالى ءارى قولجەتىمدى، زاماناۋي مەديسينالىق ينفراقۇرىلىم قۇرۋ ەكەنىن اتاپ ءوتتى. دەنساۋلىق ساقتاۋ سالاسىندا سيفرلىق شەشىمدەر ەنگىزۋ، اۋرۋحانالاردى جاڭعىرتۋ مەن ساپالى جابدىقپەن قامتاماسىز ەتۋ، سونداي-اق بىلىكتى كادرلار دايارلاۋ ماڭىزدىلىعى اتاپ ءوتىلدى.
ءوز كەزەگىندە كوستاس دەليگياننيس كومپانيانىڭ قازاقستان نارىعىنداعى قاتىسۋىن كەڭەيتۋ جوسپارلارى تۋرالى بايانداپ، ەلىمىزدىڭ مەديسينالىق مەكەمەلەرىندە 3 مىڭنان استام GE Healthcare جابدىعى پايدالانىلىپ جاتقانىن جەتكىزدى. مەملەكەتتىك ونكولوگيالىق باعدارلاما اياسىندا وڭىرلەردە جۇزدەن استام مامموگراف ورناتىلعان، ال GE Healthcare الاڭدارىندا 6 مىڭ قازاقستاندىق مامان وقىتىلدى.
كەزدەسۋ قورىتىندىسى بويىنشا تاراپتار ەلىمىزدىڭ دەنساۋلىق ساقتاۋ جۇيەسىن دامىتۋعا باعىتتالعان ىنتىماقتاستىقتى ودان ءارى نىعايتۋعا نيەتتى ەكەنىن راستادى.