بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى.
قازاقستاننىڭ يوردانيا مەن مىسىرداعى ەلشىلىكتەرى گازا سەكتورىنداعى احۋالدىڭ اسقىنۋىنىڭ العاشقى كۇنىنەن باستاپ ءبىزدىڭ وتانداستارىمىزدى «رافاح» باقىلاۋ-وتكىزۋ پۋنكتى (ءبوپ) ارقىلى شىعارۋ، ولاردى ودان ءارى تاسىمالداۋ، سونداي-اق شەت مەملەكەتتەردىڭ شەكاراسىنان ءوتۋ ءۇشىن ءتيىستى قۇجاتتارمەن قامتاماسىز ەتۋ بويىنشا جاردەم كورسەتۋ ماسەلەلەرىن پىسىقتاۋدا، دەپ حابارلايدى Almaty-akshamy.kz.
قاقتىعىس ايماعىنداعى ق ر ازاماتتارى مەن ولاردىڭ جاقىن تۋىستارىنىڭ ءتىزىمىن قالىپتاستىرۋ، ونى كەلىسۋ جانە ۇنەمى جاڭارتىپ وتىرۋ جونىندەگى مىندەتتەرگە ەرەكشە نازار اۋدارىلادى
قازاقستاننىڭ كايردەگى ەلشىلىگى كۇن سايىن مىسىردىڭ سىرتقى ىستەر مينيسترلىگىمەن جانە باسقا دا قۇزىرەتتى ورگاندارىمەن ازاماتتارىمىزدى ەۆاكۋاسيالاۋ شارتتارى تۋرالى كەلىسسوزدەر جۇرگىزەدى.
گازا سەكتورىنىڭ ەرەكشەلىگىن ەسكەرە وتىرىپ، انكلاۆتا تۇراتىن ازاماتتارمەن جەدەل ءوزارا ءىس-قيمىل جاساۋ ماقساتىندا مەسسەندجەردە تۇراقتى نەگىزدە ارنايى چات اشىلعان. اتالعان شيەلەنىس باستالعان كەزدەن باستاپ ءاربىر ازاماتپەن ولاردىڭ ورنالاسقان جەرى مەن دەنساۋلىق جاعدايىن ناقتىلاۋ ءۇشىن تىكەلەي بايلانىس جۇرگىزىلەتىنىن اتاپ وتەمىز.
قازاقستاننىڭ يوردانيا مەن مىسىرداعى ەلشىلىكتەرى وسى ەلدەردىڭ سىرتقى ىستەر مينيسترلىكتەرىمەن، سونداي-اق پالەستينالىق بوسقىندارعا كومەكتەسۋ جانە جۇمىستاردى ۇيىمداستىرۋ ءۇشىن بۇۇ تاياۋ شىعىس اگەنتتىگى (باپور)، حالىقارالىق كوشى-قون ۇيىمى سياقتى وسى ايماقتاعى حالىقارالىق ۇيىمداردىڭ كەڭسەلەرىمەن تۇراقتى بايلانىستا. سونىمەن قاتار، پالەستينانىڭ قازاقستانداعى جانە مىسىرداعى ەلشىلىكتەرىمەن قۇجاتتاردى تەكسەرۋگە قاتىستى كەيىنگى جۇمىستار بويىنشا ۋاعدالاستىقتار بار.
«وزدەرىڭىز بىلەتىندەي، اعىمداعى جىلدىڭ 1 قاراشاسىندا گازا سەكتورىنان شەتەلدىك ازاماتتار مەن قوس ازاماتتىعى بار پالەستينالىقتاردى ەۆاكۋاسيالاۋ باستالدى. الايدا، وكىنىشكە وراي، 4 قاراشادان باستاپ «رافاح» ءبوپ ارقىلى شەتەلدىكتەر مەن جارالىلاردى ەۆاكۋاسيالاۋ ۋاقىتشا توقتاتىلدى.
مىسىر جانە يزرايل تاراپتارىنىڭ تالاپتارىنا سايكەس ءار ەلگە «رافاح» ءبوپ ارقىلى شەتەلدىك ازاماتتاردىڭ ءوتۋى بويىنشا بەلگىلى ءبىر كۇن بەرىلەدى. بۇل رەتتە اعىمداعى وتكىزۋ قابىلەتى (تاۋلىگىنە 500-گە جۋىق ادام)، سونداي-اق شامامەن 45 ەلدىڭ ەلشىلىكتەرى ۇسىنعان تىزىمدەگى ادامداردىڭ جالپى سانى ەسكەرىلەدى، بۇل شامامەن 7000 ادام.
بۇگىنگى تاڭدا گازا سەكتورىندا ءبىزدىڭ دەرەكتەرىمىز بويىنشا ق ر 76 ازاماتى بار. وتباسى مۇشەلەرىمەن بىرگە ساناعاندا ولاردىڭ سانى 161 ادام. سونىمەن قاتار، شەتەلدىك ازاماتتاردىڭ وتباسى مۇشەلەرىنىڭ شىعۋىنا بايلانىستى مىسىر تاراپىنان جانە يزرايل تاراپىنان دا بەلگىلى ءبىر تالاپتار بار. مىسالى، ۇشتەن ءبىر بولىگى ەۆاكۋاسيالاۋعا، ياعني جوعارىدا اتالعان تالاپتارعا سايكەس كەلمەيدى. بۇل كامەلەتكە تولعان بالالار، ەرلى-زايىپتىلار، نەمەرەلەر جانە بالالاردىڭ جۇبايلارى. وسىعان وراي، ءبىزدىڭ كەيبىر ازاماتتارىمىز وتباسى مۇشەلەرىن الىپ كەتۋ مۇمكىندىگى بولماعاندىقتان گازا سەكتورىنان كەتۋگە دايىن ەمەس.
ءبىز قازاقستان ازاماتتارىن ەۆاكۋاسيالاۋىن مۇمكىندىگىنشە تەزىرەك جاساۋ ءۇشىن بارلىق كۇش-جىگەرىمىزدى سالىپ جاتىرمىز. دەگەنمەن، كوپ نارسە بىزگە بايلانىستى ەمەس. بۇل اسكەري-ديپلوماتيالىق داعدارىستى بۇكىل الەم شەشۋگە تىرىسىپ جاتىر.
ءوز تاراپىمىزدان تولىق دايىنبىز – ازاماتتارىمىز مىسىر شەكاراسىنان وتكەننەن كەيىن ارنايى ەۆاكۋاسيالىق بورت كايرگە ۇشىپ شىعادى.
شەتەلدە قازاقستان ازاماتتارىنىڭ قۇقىقتارى مەن مۇددەلەرىن قورعاۋ ق ر سىرتقى ىستەر مينيسترلىگى مەن ەلشىلىكتەرىنىڭ نەگىزگى مىندەتتەرىنىڭ ءبىرى. الدىن الۋ شارالارىن قابىلداۋ ءۇشىن ءبىز تاياۋ شىعىس وڭىردەگى جاعدايدى باقىلاپ وتىرمىز، وكىنىشكە وراي، ونىڭ شيەلەنىسى كۇشەيىپ كەلەدى»، - دەدى مينيسترلىكتىڭ رەسمي وكىلى.