وتكەن اپتادا «QazaqGaz Aimaq» اق الماتى وندىرىستىك فيليالى الماتى قالاسى مەدەۋ اۋدانىنىڭ توتەنشە جاعدايلار باسقارماسى قىزمەتكەرلەرىمەن بىرلەسىپ، جىلىتۋ ماۋسىمىنا بايلانىستى جەكە سەكتورداعى ۇيلەردەگى گاز جابدىقتارىنىڭ قىسقا دايىندىعىن تەكسەرۋ بويىنشا ارنايى رەيد جۇرگىزدى.
«QazaqGaz Aimaq» اق الماتى وندىرىستىك فيليالى وندىرىستىك-تەحنيكالىق ءبولىمىنىڭ باسشىسى ايبەك قاسىموۆتىڭ ايتۋىنشا، بۇگىنگە دەيىن كۇزگى-قىسقى كەزەڭگە دايىندىق جوسپارى 100% ورىندالعان.
– الماتىنىڭ گاز تۇتىنۋ باعىتىنداعى جۇمىستارى «QazaqGaz Aimaq» اق-نىڭ الماتى وندىرىستىك فيليالىنىڭ ەرەكشە باقىلاۋىندا. قىسقى ماۋسىمعا 100% دايىنبىز. «ساقتىقتا قورلىق جوق» دەگەن. بۇگىن سالا ماماندارى توتەنشەلىكتەرمەن بىرىگىپ، تاعى ءبىر مارتە تەكسەرۋ جۇمىستارىن جۇرگىزبەكپىز. باستى ماقساتىمىز – جىلىتۋ ماۋسىمىنىڭ باستالۋىنا بايلانىستى جەكە سەكتورداعى ۇيلەردىڭ گاز قۇبىرلارى مەن جابدىقتارىن تەكسەرۋ، كوگىلدىر وتىندى تۇرمىستا ءقاۋىپسىز پايدالانۋ، جازاتايىم وقيعالاردىڭ الدىن الۋ بويىنشا ءتۇسىندىرۋ جۇمىستارىن جۇرگىزۋدى كۇشەيتتىك. تەكسەرۋ بارىسىندا قانداي دا ءبىر اقاۋدى بايقايتىن بولساق، ونى ارنايى ماماندار سول جەردە قالپىنا كەلتىرىپ بەرەدى. ءبىرىنشى كەزەكتە الەۋمەتتىك وسال توپ ساناتىنا جاتاتىن تۇرعىنداردىڭ ۇيلەرىنە كوڭىل بولىنگەن. بۇل ءىس-شارالار كەشەنى تۇتىنۋشىلارعا گازبەن ءقاۋىپسىز جۇمىس ىستەۋ ەرەجەلەرىن تاعى ءبىر رەت ەسكە سالۋ ءۇشىن وتكىزىلەدى، - دەيدى ءبولىم باسشىسى ايبەك ءومىرزاق ۇلى.
سالا ماماندارىنان قۇرالعان ارنايى توپ رەيد بارىسىندا گاز جەلىلەرى مەن اسپاپتاردىڭ جاي-كۇيىنە، ولارعا تەحنيكالىق قىزمەت كورسەتۋ ساپاسىنا نازار اۋداردى. ايتا كەتكەن ءجون، مەدەۋ اۋدانىندا تۇرمىسى كۇنكورىس دەڭگەيىنەن تومەن وتباسىلار كوپ. اۋدان اكىمدىگى ولاردىڭ بارلىعىن ەرەكشە باقىلاۋعا العان. جىلىتۋ ماۋسىمى باستالعاندا ولاردىڭ ۇيلەرىندەگى قاۋىپسىزدىك شارالارى ءجىتى تەكسەرىلەدى. ماسەلەن، رەيد كەزىندە پوتانين كوشەسى، 18 مەكەنجايىندا ورنالاسقان ءۇيدىڭ جىلىتۋ جابدىعىنا كەلەتىن قۇبىردان گاز شىعىپ تۇرعانىن انىقتاعان ماماندار اقاۋدى سول جەردە جوندەپ بەردى.
– جىلىتۋ ماۋسىمى باستالار الدىندا ادامداردىڭ ۋلى گازدان ۋلانىپ قالۋى، تۇرعىن ءۇي سەكتورىندا پەشتەردى دۇرىس پايدالانباۋ فاكتىلەرى ەرەكشە الاڭداۋشىلىق تۋدىرادى. سوندىقتان بۇگىن حالىققا ءورت قاۋىپسىزدىگى تالاپتارىن ءتۇسىندىرۋ بويىنشا پروفيلاكتيكالىق جۇمىستار جۇرگىزىپ جاتىرمىز. ءىس-شارالاردى وتكىزۋ بارىسىندا تۇرعىندارمەن پەشتەردى دۇرىس پايدالانۋ بويىنشا ءتۇسىندىرۋ جۇمىستارىن وتكىزدىك، اقاۋلار انىقتالعان جاعدايدا، يەلەرىنە ولاردى جويۋ بويىنشا ۇسىنىستار بەرۋدەمىز. ورتكە قارسى تاقىرىپتا جادىنامالار تابىستاپ جاتىرمىز، الەۋمەتتىك وسال توپتار – جالعىزباستى قاريالار، كوپبالالى وتباسىلار ەرەكشە باقىلاۋىمىزدا، - دەيدى مەدەۋ اۋدانىنىڭ توتەنشە جاعدايلار ءبولىمىنىڭ ينجەنەرى، ازاماتتى قورعاۋ لەيتەنانتى اليشەر گيززاتوۆ.
ايتا كەتەيىك، «QazaqGaz Aimaq» اق الماتى وندىرىستىك فيليالى قالا بويىنشا 4800 شاقىرىم گاز قۇبىرى مەن قۇبىر بويىنداعى نىسانداردىڭ قالىپتى جۇمىس ىستەۋىنە جاۋاپتى.
سالا ماماندارىنىڭ ايتۋلارىنشا، مۇنداي رەيدتىك ءىس-شارالار جىلىتۋ ماۋسىمى اياقتالعانعا دەيىن بەلسەندى تۇردە جۇرگىزىلەدى. ارينە، جۇمىس وتە اۋقىمدى. دەسەك تە، ابونەنتتەرگە ءتۇسىندىرۋ جۇمىستارىن جۇرگىزە وتىرىپ، جادىناما تاراتۋ ارقىلى گاز تۇتىنۋدى ءقاۋىپسىز ەتۋگە كومەكتەسەدى.
تەكسەرۋ جۇمىسى اياقتالار ساتتە ماماندار تۇرعىنداردىڭ قاۋىپسىزدىك ەرەجەلەرىنە سالعىرت قاراماۋىنا كەڭەس بەرەدى.