6 اي بويى مەملەكەت تاراپىنان رەتتەلەدى.
ەلىمىزدىڭ اۋماعىنداعى اۆتوگاز قۇيۋ ستانسيالارىندا اۆتوكولىككە جانارماي قۇيۋ ءۇشىن سۇيىتىلعان مۇناي گازىنىڭ بولشەك ساۋداداعى باعاسى تاعى 6 اي بويى مەملەكەت تاراپىنان رەتتەلەدى. مۇنداي رەتتە ق ر باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ بۇيرىعىندا كوزدەلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، مەملەكەت باسشىسىنىڭ 2022 جىلعى 5 قاڭتارداعى تاپسىرماسى بويىنشا 5 شىلدەدە اۆتوگاز قۇيۋ ستانسيالارىنان سۇيىتىلعان مۇناي گازىن بولشەك ساۋدادا وتكىزۋگە شەكتى باعالار بەلگىلەنگەن ەدى. گاز باعاسى وڭىرگە بايلانىستى ليترىنە 70 تەڭگەگە دەيىن بولدى. اتالعان بۇيرىقتىڭ قولدانىلۋ مەرزىمى 2023 جىلعى 1 قانتاردا اياقتالادى.
جالپى، سۇيىتىلعان مۇناي گازى نارىعىنىڭ بولشەك سەگمەنتىندە ەركىن باعا بەلگىلەۋ جاعدايىندا باعانىڭ كۇرت ءوسۋ جانە قوعامداعى الەۋمەتتىك شيەلەنىستىڭ پايدا بولۋ ءقاۋپى بار. وسىعان وراي كەشە كۇشىنە ەنگەن بۇيرىققا سايكەس، 2023 جىلعى 30 ماۋسىمعا دەيىن قازاقستان رەسپۋبليكاسىنىڭ اۋماعىنداعى اۆتوگاز قۇيۋ ستانسيالارىندا اۆتوكولىككە ماي قۇيۋ ءۇشىن سۇيىتىلعان مۇناي گازىن بولشەك ساۋدادا وتكىزۋگە ۋاقىتشا مەملەكەتتىك باعالىق رەتتەۋ ۇزارتىلدى.