بۇگىن ۇلى وتان سوعىسىنىڭ ارداگەرى، مەملەكەت جانە قوعام قايراتكەرى شاڭگەرەي جانىبەك ۇلى جانىبەكوۆ 100 جاسقا تولدى.
عاسىر جاساعان قاريانى مەرەيتويىمەن قۇتتىقتاپ، قۇرمەت كورسەتۋگە مەدەۋ اۋدانى اكىمىنىڭ ورىنباسارى ايدوس نۇرلىبايەۆ، الماتى قالاسى ارداگەرلەر كەڭەسىنىڭ ءتوراعاسى اقان بيجانوۆ، قازاقستان رەسپۋبليكاسى قورعانىس مينيسترلىگىنىڭ وكىلدەرى، زامانداستارى مەن بالالارى كەلدى، دەپ حابارلايدى Almaty-akshamy.kz
اسكەري وركەستردىڭ سۇيەمەلدەۋىمەن تۋعان كۇن يەسىن قارسى العان قوناقتار عاسىر كۋاگەرىنە ىزگى تىلەكتەر ايتىپ، گۇل شوقتارى مەن تاتتىلەر سالىنعان سەبەتتەر تارتۋ ەتتى.
كەش شىمىلدىعىن الماتى قالاسى ارداگەرلەر كەڭەسى ءتوراعاسى اقان بيجانوۆ اشىپ، قارت مايدانگەردى تۋعان كۇنىمەن قۇتتىقتادى.
– عاسىر جاساپ، كوپتى كورگەن قارياسىز. سوناۋ سوعىستىڭ زۇلمات جىلدارى ەتىگىڭىزبەن قان كەشىپ، ەرەن ەرلىگىڭىزبەن وتانىمىزدى قورعادىڭىز. سىزدەي باتىرلارىمىزدىڭ ارقاسىندا بۇگىنگى جاس ۇرپاق كوك اسپان مەن كوك تۋدىڭ استىندا بەيبىت ءومىر ءسۇرىپ كەلەدى. سول وشپەس ەرلىكتەرىڭىز ءۇشىن الدىڭىزدا باس يەمىز. ءسىزدىڭ ءومىر جولىڭىز، ەڭبەكپەن ورىلگەن تابىستى دا جەمىستى قىزمەتىڭىز جاستارعا ۇلگى. ءجۇز جاس – اللانىڭ بەرگەن سىيى، ەڭبەگىڭىزدىڭ زەينەتى. الماتىلىق ارداگەرلەر اتىنان ءسىزدى تۋعان كۇنىڭىزبەن قۇتتىقتايمىز، - دەدى ا.بيجانوۆ.
شاڭگەرەي جانىبەكوۆ 1924 جىلى 15 ماۋسىمدا قوستاناي وبلىسى، بۇرىنعى دەنيسوۆ اۋدانى، كراسنوارمەيسكى وكرۋگى قارپىق اۋىلىندا دۇنيەگە كەلگەن.
II دارەجەلى وتان سوعىسى، ەڭبەك قىزىل تۋ، وكتيابر ريەۆوليۋسياسى، حالىقتار دوستىعى وردەندەرىنىڭ يەگەرى وتستاۆكاداعى گۆارديا پولكوۆنيگىن.
ول مايدانعا 1943 جىلدىڭ جازىندا تۋلا وبلىسىندا كىردى. وعان دەيىن ول قوستانايداعى مەديسينالىق تەحنيكۋمدى ءبىتىرىپ، وقۋ پولكىندە اسكەري فەلدشەر بولىپ مەرزىمدى قىزمەت اتقاردى.
عىلىم مەن مادەنيەتتى، ادەبيەت پەن ونەردى دامىتۋعا، ەلدىڭ رۋحاني جانە زياتكەرلىك الەۋەتىن ارتتىرۋعا قوسقان باعا جەتپەس ۇلەسى ءۇشىن شاڭگەرەي جانىبەكوۆ «پاراسات» جانە «قۇرمەت» وردەندەرىمەن ماراپاتتالعان.
سالتاناتتى باسقوسۋدا قازاقستان رەسپۋبليكاسىنىڭ قورعانىس ءمينيسترى ر.جاقسىلىقوۆتىڭ، قازاقستان رەسپۋبليكاسى قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى ا.دجۋماكەيەۆتىڭ، قوستاناي وبلىسىنىڭ اكىمىنىڭ قۇتتىقتاۋ حاتتارى وقىلىپ، تابىستالدى.
ءىس-شارا سوڭىندا مەرەيتوي يەسى شاڭگەرەي اتا وزىنە كورسەتىلگەن قۇرمەت ءۇشىن ريزاشىلىعىن ءبىلدىرىپ، اق باتاسىن بەردى.