26 اقپان كۇنى ق ر وقۋ-اعارتۋ ءمينيسترى عاني بەيسەمبايەۆ قازاق ۇلتتىق قىزدار پەداگوگيكالىق ۋنيۆەرسيتەتىندە پروفەسسور-وقىتۋشىلار قۇرامى مەن ستۋدەنتتەرىمەن كەزدەستى. جيىن بارىسىندا پەداگوگ كادرلارىن ساپالى دايارلاۋ، ءبىلىم بەرۋ باعدارلامالارىن جەتىلدىرۋ جانە ۇزدىكسىز پەداگوگيكالىق ءبىلىم بەرۋ جۇيەسىن دامىتۋ ماسەلەلەرى تالقىلاندى، دەپ حابارلايدى aqshamnews.kz
مينيستر ءوز سوزىندە پەداگوگيكالىق ماماندىقتارعا بولىنەتىن مەملەكەتتىك گرانتتاردىڭ جىل سايىن ارتىپ كەلە جاتقانىن اتاپ ءوتتى. ونىڭ ايتۋىنشا، بيىل 48 مىڭعا جۋىق تۇلەك پەداگوگيكالىق ماماندىقتار بويىنشا جوعارى وقۋ ورىندارىن ءتامامداعان.
«مەملەكەت پەداگوگ كادرلارىنىڭ ساپاسىن ارتتىرۋعا ەرەكشە ءمان بەرۋدە. سونىڭ ءبىر دالەلى – سوڭعى ءبىر جىلدا ءۇش ۇستازعا قازاقستان رەسپۋبليكاسىنىڭ ەڭبەك ەرى اتاعى بەرىلدى. بۇل – مەملەكەت پەن پرەزيدەنتتىڭ ۇستازدارعا دەگەن جوعارى سەنىمىنىڭ كورىنىسى. ۇستازدىڭ ەڭ باستى ۇستانىمى – شاكىرتتەرىنە ساپالى ءبىلىم، سانالى تاربيە بەرۋ. ستۋدەنتتەرگە وسى ۋنيۆەرسيتەتتەن شىققان اياگۇل ميرازوۆا مەن گۇلجانار نۇرپەيىسوۆا سياقتى پەداگوگيكالىق قىزمەتتىڭ بيىك شىڭىنا جەتۋلەرىنە تىلەكتەسپىن»، – دەدى عاني بەيسەمبايەۆ.
ءمينيستردىڭ ايتۋىنشا، سوڭعى جىلدارى زەرتتەۋ جۇمىستارىمەن اينالىساتىن پەداگوگتەردىڭ ۇلەسى 1،6 ەسەگە ءوسىپ، ماگيستر دارەجەسى بار مۇعالىمدەردىڭ سانى رەكوردتىق 27،9 مىڭعا جەتكەن.
ستۋدەنتتەر مينيسترمەن كەزدەسۋدە اۋىلدىق جەرلەردەگى پەداگوگتەردى قولداۋ، جۇمىسقا ورنالاسۋ، اتا-انالار قاۋىمداستىعىمەن ءوزارا ارەكەتتەسۋ جانە «ءبىرتۇتاس تاربيە» باعدارلاماسى اياسىنداعى تاربيە جۇمىستارى جونىندە سۇراقتار قويىپ، ناقتى جاۋاپتار الدى.
كەزدەسۋ اياسىندا قازاق ۇلتتىق قىزدار پەداگوگيكالىق ۋنيۆەرسيتەتىندە ەلىمىزدىڭ ۇزدىك پەداگوگتەرىنىڭ قۇرمەتىنە «ۇلت كەلبەتى – ۇستازدار» اتتى فوتوگالەرەيا اشىلدى. سالتاناتتى راسىمگە عاني بەيسەمبايەۆ، ۋنيۆەرسيتەت رەكتورى گۇلميرا قاناي جانە QyzPU تۇلەكتەرى، تانىمال پەداگوگتەر اياگۇل ميرازوۆا مەن گۇلجانار نۇرپەيىسوۆا قاتىستى.
فوتوگالەرەيادا ەلدىڭ ءبىلىم سالاسىنا زور ۇلەس قوسقان كورنەكتى ۇستازداردىڭ بەينەلەرى ۇسىنىلعان. ولاردىڭ قاتارىندا سوسياليستىك ەڭبەك ەرى، قازاق ءتىلى مەن ادەبيەتى ءپانىنىڭ ءمۇعالىمى مارجان تاسوۆا، قازاقستاننىڭ ەڭبەك ەرى، بيولوگيا ءپانىنىڭ ءمۇعالىمى الينا سولوۆيەۆا، سونداي-اق QyzPU تۇلەگى، قازاقستاننىڭ تۇڭعىش ەڭبەك ەرى، قازاقستاننىڭ ەڭبەك سىڭىرگەن قايراتكەرى اياگۇل ميرازوۆا بار.
«فوتوگالەرەيا – بارلىق ۇستازعا دەگەن قۇرمەتتىڭ بەلگىسى. ءبىز وتكەنىمىزدى بىلمەسەك، بولاشاعىمىزدى باعدارلاي المايمىز. ۇستازدىڭ جۇرەگى دە، ءسوزى دە جىلى بولۋى كەرەك. ۇستاز بولۋ – ۇلكەن جاۋاپكەرشىلىك. سول جاۋاپكەرشىلىكتى ابىرويمەن اتقارعان جان عانا ناعىز ۇستاز بولا الادى. وسىنداي ارداقتى ۇستازدارىمىز كوپ بولسىن، فوتوگالەرەيانىڭ قاتارى تولىعا بەرسىن»، – دەدى اياگۇل ميرازوۆا.
سونىمەن قاتار كەزدەسۋ اياسىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ءبىرقاتار وقىتۋشىسىنا «ەڭبەك ارداگەرى» مەدالى، «ىبىراي التىنسارين» توسبەلگىسى، ق ر وقۋ-اعارتۋ مينيسترلىگىنىڭ «ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسى، قۇرمەت گراموتاسى جانە العىس حاتتار تابىستالدى.