وقۋ-اعارتۋ مينيسترلىگىنىڭ جانىنداعى ءماسليحات دەپۋتاتتارىنىڭ وتىرىسى ءوتتى.
بارلىق دەڭگەيدەگى ءماسليحاتتاردان 190-عا جۋىق دەپۋتات قاتىساتىن بۇل كونسۋلتاتيۆتىك-كەڭەسشى ورگان ءبىلىم بەرۋ جۇيەسىن دامىتۋ باعىتىنداعى ماسەلەلەردى تالقىلايتىن اسا ءتيىمدى الاڭعا اينالدى، دەپ حابارلايدى aqshamnews.kz.
وتكەن جىلى قۇرىلعان كەڭەس كەرى بايلانىس ورناتۋ مەن جان-جاقتى زەردەلەنگەن شەشىمدەر قابىلداۋدىڭ ءتيىمدى تەتىگى رەتىندە ماڭىزدى ءرول اتقارىپ كەلەدى.
وڭىرلەردەگى حالىق وكىلدەرىمەن ورناتىلعان تۇراقتى ديالوگتىڭ ارقاسىندا مينيسترلىك وزەكتى سىن-قاتەرلەرگە جەدەل دەن قويىپ، ناقتى وزگەرىستەر مەن جاڭاشىلدىقتار ەنگىزۋدە.
كەزدەسۋ بارىسىندا مينيسترلىكتىڭ 2024 جىلى اتقارعان جۇمىس قورىتىندىسى تانىستىرىلدى. بالالاردىڭ قاۋىپسىزدىگىن قامتاماسىز ەتۋ، ءبىلىم بەرۋ ينفراقۇرىلىمدارىن جاڭعىرتۋ، تەحنيكالىق جانە كاسىپتىك ءبىلىم بەرۋدى ترانسفورماسيالاۋ سياقتى باعىتتار بويىنشا قول جەتكىزىلگەن ناقتى ناتيجەلەر مەن جۇيەلى شارالار قارالدى.
ۆەدومستۆو باسشىسى دەپۋتاتتىق كورپۋسپەن ءوزارا ىنتىماقتاستىق ءبىلىم بەرۋ سالاسىندا تۇراقتى دامۋدى قامتاماسىز ەتەتىنىن اتاپ ءوتتى.
«ءبىز وڭىرلەردە ءجيى كەزدەسەمىز، جەرگىلىكتى جەرلەردە ماسەلەلەردى بىرلەسىپ تالقىلايمىز، مۇنىڭ بارلىعى ءبىلىم بەرۋ ساپاسىن جۇيەلى تۇردە ارتتىرۋعا باعىتتالعان پراكتيكالىق قادام بولىپ تابىلادى. ءماسليحاتتار - مەملەكەتتىك ساياساتتى ىسكە اسىرۋداعى ءبىزدىڭ نەگىزگى سەرىكتەسىمىز. بىرلەسكەن جۇمىس پروبلەمالاردى انىقتاپ قانا قويماي، ولاردى شەشۋگە مۇمكىندىك بەرەدى. ءبىزدىڭ ورتاق مىندەتىمىز - ءاربىر بالاعا ءوز الەۋەتىن اشا الاتىن تەڭ ءارى قولايلى جاعدايلار جاساۋ. بۇل — ءبىز جۇيەلى تۇردە جۇزەگە اسىرىپ كەلە جاتقان نەگىزگى ۇلتتىق باسىمدىق»، - دەدى عاني بەيسەمبايەۆ.
دەپۋتاتتار جەرگىلىكتى جەرلەردەگى كەيبىر وزەكتى ماسەلەلەرگە قاتىستى سۇراقتارىن قويدى. ولار اشىقتىق، سىڭدارلى ديالوگ جانە ناقتى ناتيجەگە نەگىزدەلگەن جۇيەلى جۇمىس ءۇشىن ريزاشىلىقتارىن ءبىلدىردى.
ەستەرىڭىزگە سالا كەتەيىك، بۇعان دەيىن مينيستر ءبىرقاتار وڭىرلەردە دەپۋتاتتارمەن كەزدەسۋلەر وتكىزگەن بولاتىن. ولاردىڭ قورىتىندىسى بويىنشا مينيسترلىك پەن ءوڭىر حالقى اراسىنداعى كوپىر ءرولىن اتقاراتىن ءماسليحاتتار دەپۋتاتتارى كەڭەسىن قۇرۋ تۋرالى شەشىم قابىلداندى.