قازاقستاندىق عالىمدارعا تۇراقتى ۇستەمەاقى جانە ەڭبەك دەمالىسى بەرىلەدى.
عالىمدار جالاقىلارىن نەگىزىنەن مەرزىمدى تۇردە جاريالاناتىن گرانتتار ەسەبىنەن الادى، دەپ حابارلايدى Almaty-akshamy.kz
"كەيبىر زاڭنامالىق اكتىلەرگە عىلىم ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى بويىنشا ۇكىمەتتىڭ قورىتىندىسىن ءماجىلىس دەپۋتاتى اسحات ايماعامبەتوۆ تانىستىردى.
دەپۋتات اتاپ وتكەندەي، زاڭ جوباسى نەگىزگى ءتورت باعىتتى كوزدەيدى. بىرىنشىدەن، عىلىمدى قارجىلاندىرۋ جۇيەسىن وزگەرتۋ ۇسىنىلادى.
"عالىمدارىمىزعا تۇراقتى ەڭبەكاقى قامتاماسىز ەتۋدى قوسا العاندا، جاڭا تەتىكتەردى قوسۋ ۇسىنىلادى. قازىرگى كەزدە عالىمدار جالاقىلارىن نەگىزىنەن مەرزىمدى تۇردە جاريالاناتىن گرانتتار ەسەبىنەن الادى. ەگەر ءسىز گرانت الماساڭىز، جالاقىسىز قالاسىز"، - دەپ ءتۇسىندىردى اسحات ايماعامبەتوۆ.
وسىلايشا، عالىمدار گرانت الماسا، تابىسسىز قالادى.
دەگەنمەن، زاڭ جوباسى قابىلدانعاننان كەيىن بارلىق قىزمەتكەرلەر سياقتى عالىمدار دا اي سايىن تۇراقتى جالاقى الادى.
اسحات ايماعامبەتوۆتىڭ ايتۋىنشا، بۇعان بيۋدجەتتەن قارجى بولىنەدى.
"ءبىز قوسىمشا تولەمدەردى ۇسىنامىز. مىسالى، عىلىمي دارەجەسى بويىنشا دوسەنت جانە پروفەسسورلارعا تولەمدەر. ءقازىر ۇكىمەتتىڭ قورىتىندىسى ازىرلەنىپ جاتىر. مۇنىڭ ءبارى الداعى ۋاقىتتا ناقتىلانادى، سەبەبى ولارعا قوسىمشا تولەمدەر ەنگىزىلۋى كەرەك. سوڭعى 30 جىلدا عىلىمي قىزمەتكەرلەردىڭ سانى ايتارلىقتاي قىسقاردى. بۇل كاسىپتى عىلىمي كادرلارىمىز ءۇشىن قارجىلاندىرۋ جانە الەۋمەتتىك پاكەت تۇرعىسىنان تارتىمدى ەتۋىمىز كەرەك"، – دەدى اسحات ايماعامبەتوۆ.
زاڭ جوباسى اياسىندا، قازاقستاندىق عالىمدارعا ەڭبەك دەمالىسى بەرىلەدى. ياعني، ەڭبەك كودەكسى بويىنشا ولار بەلگىلى ءبىر ۋاقىتقا ءۇزىلىس جاساپ، عىلىمي زەرتتەۋلەرمەن اينالىسا الادى.
سونىمەن قاتار زاڭ جوباسىندا عالىمداردى مەگاگرانتپەن قامتاماسىز ەتۋ نورماسى دا بار. بۇل گرانتتار ارقىلى ۋنيۆەرسيتەتتەر زاماناۋي زەرتحانالارمەن جابدىقتالادى.
ماجىلىسمەن اسحات ايماعامبەتوۆتىڭ ايتۋىنشا، ەلىمىزدە زەرتحانالار جەتكىلىكسىز.
"زەرتحانالاردى بيۋدجەتتەن قارجىلاندىرۋدىڭ قازىرگى كۇردەلى. بۇل كوپ ۋاقىتتى الادى. وكىنىشتىسى، ءبىزدىڭ ۇيىمدار بيۋدجەتتەن بولىنگەن قارجىنى يگەرە المايدى. سوندىقتان ءبىز شەت ەلدەگىدەي ەرەكشە ەڭبەك سىڭىرگەن عالىمدارعا ەڭبەك دەمالىسىن بەرۋدى ۇسىنامىز. ەڭبەك كودەكسىنە ولار شارتتى تۇردە بەلگىلى ءبىر مەرزىم الىپ، عىلىمي زەرتتەۋلەرمەن اينالىسا الاتىن نورما ەنگىزۋ ۇسىنىلىپ وتىر"، - دەپ ءتۇسىندىردى ايماعامبەتوۆ.
سونداي-اق جەڭىلدەتىلگەن نەسيە الۋ ستاندارتتارىن ەنگىزۋ جانە پروفەسسورلاردىڭ عىلىمي اتاقتارىنا قوسىمشا ۇستەمەاقى بەرۋ ۇسىنىلدى.
دەپۋتاتتىڭ سوزىنشە، سوڭعى ءتورت جىلدا قارجىلاندىرۋ ەكى ەسە، ءۇش ەسە ۇلعايىپ جاتقان كەزدە ونى دۇرىس پايدالانۋ ماڭىزدى.
"سوندىقتان بارلىق گرانتتار تولىق كونكۋرستان ءوتۋى كەرەك دەپ ايتامىز. پروسەدۋرالار شىعىن بالانسى شەڭبەرىندە بولۋى كەرەك"، – دەدى ەكس-مينيستر.