Kaztraffic-2023 كورمەسىندە قازاقستان جول عىلىمي-زەرتتەۋ ينستيتۋتىنىڭ ماماندارى شەتەلدىك ارىپتەستەرىنە توپىراق تۇراقتاندىرعىشى، بەتونعا ارنالعان ءسىڭدىرۋ قوسپاسى جانە بيتۋم موديفيكاتورى سياقتى وتاندىق ازىرلەمەلەردى ۇسىندى.
بۇل ماتەريالدار قاتال كليماتتىڭ جول ساپاسىنا اسەرىن ەسكەرە وتىرىپ جاسالعان، دەپ حابارلايدى Almaty-akshamy.kz ق ر كولىك مينيسترلىگىنە سىلتەمە جاساپ.
اتاپ ايتقاندا، قازجولعزي زەرتحاناسىندا ازىرلەنگەن توپىراق تۇراقتاندىرعىشى مۇناي جانە گاز ونەركاسىبىنىڭ تاس جول بويىنداعى وتكەلدەرىن سالۋ ءۇشىن دە قولدانىلاتىن جەر توسەمىنىڭ توپىراعىن نىعايتۋ تەحنولوگياسى بولىپ تابىلادى. سونداي-اق وتاندىق ماتەريالدىڭ قۇرامىندا بەتونعا ارنالعان ءسىڭدىرۋ قوسپاسى بار. ول اۆتوجولداردىڭ سەمەنت-بەتون جابىندارىنا ءتيىمدى كۇتىم جاساۋدى قامتاماسىز ەتەدى. قوسپانىڭ قۇرامى بەتوننىڭ سۋدى ءسىڭىرۋىن ازايتادى جانە ونىڭ ايازعا توزىمدىلىگىن ارتتىرادى.
قازاقستاندىق عالىمداردىڭ تاعى جاڭاشىلدىعى – بۇل بيتۋم موديفيكاتورى. اتالعان ماتەريال تاسىمالداۋعا جانە پايدالانۋ ورنىندا بيتۋم ماسساسىنا تىكەلەي ەنگىزۋ بارىسىندا ىڭعايلى. بۇل جاعدايدا موديفيكاتور ارزان كومپونەنتتەر نەگىزىندە جاسالادى.
كورمەگە كەلگەن شەتەلدىك جول ساراپشىلارى مەن ىقتيمال ينۆەستورلار قازاقستاندىق عالىمداردىڭ جەتىستىكتەرىمەن تانىستى. اسىرەسە كورمە قوناقتارىن اۆتوجولداردىڭ دەفورماسياسىنا ەلەۋلى اسەر ەتەتىن قازاقستاننىڭ قاتال كليماتىنا وتاندىق ازىرلەمەلەردىڭ تۇراقتىلىعى قىزىقتىردى. ولاردىڭ ايتۋىنشا، ينستيتۋت جاساعان ماتەريالدار كولىك-لوگيستيكالىق الەۋەتىن ارتتىرۋعا باعدار العان ەلدەردە پايدالى جانە قولدانۋعا ىڭعايلى بولۋى مۇمكىن.