1938-1945 جىلدارى جامبىل جابايەۆتىڭ ادەبي حاتشىسى بولعان اقىن عالي ورمانوۆتىڭ لاتىن قارپىمەن جازىلعان كۇندەلىگى تابىلدى.
حالقىمىزدىڭ ارداقتى اقىندارىنىڭ ءبىرى، قازاق پوەزياسىنىڭ كورنەكتى كوركەمسوز شەبەرلەرىنىڭ ءبىرى – عالي ورمانوۆ جەر ءجانناتى – جەتىسۋ ولكەسىندە دۇنيەگە كەلگەن.
قازاق ادەبيەتىنە 20-جىلداردىڭ سوڭعى شيرەگىندە كەلگەن، قازاق پوەزياسىنىڭ قالىپتاسۋىنا، دامۋىنا، وسىپ-وركەندەۋىنە ەرەكشە ۇلەس قوسقان اقىننىڭ ءبىرى. ورىستىڭ، شىعىستىڭ كلاسسيكالىق ۇلگىلەرىن اۋدارىپ، قازاق ادەبيەتىنىڭ اۋدارما سالاسىندا دا ءبىرشاما ۇلەس قوسىپ، ءىرى جۇمىستاردى يگەردى. جامبىل جابايەۆقا 1939-1945 جىلدار ارالىعىندا ادەبي حاتشىلىق قىزمەت اتقارعان. ول – جان سىرلارىن، تابيعات سيپاتتارىن سۋرەتتەگەن، ليريكالىق جىرلارىن ازاماتتىق اۋەندەرمەن توعىستىرا بىلگەن تولىمدى اقىن. كوپتەگەن ولەڭدەر جيناعىنىڭ، بىرنەشە پوەما، اڭگىمە جانە وچەركتەردىڭ اۆتورى اتاندى.
اقىننىڭ جيەن-نەمەرەسى ايدار قىرىقباي ۇلىنىڭ سوزىنشە، كۇندەلىك شامامەن 1939 جىلى جازىلعان.
كۇندەلىك لاتىن الىپبيىمەن جازىلعان. سول كۇيى ساقتالىپ، جازۋى وزگەرمەگەن. بۇگىندە سول كۇندەلىك جازىلعان ءالىپبيدى بىلەتىن ادامدار از ەكەن. سوندىقتان كۇندەلىكتى جاڭارتىپ قويدىق. الداعى ۋاقىتتا اۋدارۋعا بەرەمىز. كۇندەلىكتىڭ مازمۇنى بويىنشا جامبىل اتامىزعا كىمدەر كەلگەن، قانداي ماسەلەلەر تالقىلانعان دەگەن سەكىلدى مالىمەت كورسەتىلگەن. كۇندەلىك ەشقايدا جارىق كورمەدى. سوندىقتان جامبىل اتامىزدىڭ شىعارماشىلىعىن زەرتتەۋگە سەپتىگىن تيگىزەدى دەپ ويلايمىن، - دەدى ول.
كۇندەلىكتى عالي ورمانوۆتىڭ جارى ايتبالا ورمانوۆا ساقتاعان. كەيىننەن قولدان قولعا ءوتىپ، كۇندەلىك وسى كۇنگە جەتكەن. بۇگىندە كۇندەلىك اتامىزدىڭ قىزى جاميعا عاليقىزىنا تابىستالدى.
ەلوردادا اتامىزدىڭ اتىنا ارناپ مەكتەپ بەرىلگەن. 2007 جىلدان بەرى اتالعان مەكتەپتىڭ الدىنا بيۋست ورناتۋ ماسەلەسى كوتەرىلىپ كەلەدى. قالا اكىمى باقىت سۇلتانوۆ بولىپ تۇرعان كەزىندە بيۋدجەتتەن عالي ورمانوۆتىڭ ءبيۋستىن ورناتۋ ماسەلەسى بەكىتىلگەن دە بولاتىن. وكىنىشكە قاراي، بۇگىنگى كۇنگە دەيىن مەكتەپتىڭ الدىنا بيۋست ءالى ورناتىلمادى. وسى ماسەلەنى نۇر-سۇلتان قالاسىنىڭ اكىمى التاي كولگىنوۆ نازارىنا السا ەكەن، - دەپ تۇيىندەدى ءسوزىن ا. قىرىقباي ۇلى.
ايتا كەتەيىك، ع. ورمانوۆ قىرعىز ەپوسى «ماناستىڭ» 1-كىتابىن، ا.س. پۋشكيننىڭ، م.يۋ. لەرمونتوۆتىڭ، يان ءراينيستىڭ، ف.ماقتىمق ۇلىنىڭ ءبىرقاتار پوەماسىن، ن.ۆ. گوگولدىڭ «نيەۆا پروسپەكتىسى» پوۆەسىن، ا.پ. چەحوۆتىڭ اڭگىمەلەرىن، م.تۇرسىن-زادەنىڭ «ءۇندىستان باللادالارى» ولەڭ كىتابىن، ل.ن. تولستويدىڭ «اننا كارەنينا» رومانىن قازاق تىلىنە اۋداردى.
الداعى ۋاقىتتا الماتى وبلىسىنىڭ اكىمى اماندىق باتالوۆتىڭ قولداۋىمەن ع. ورمانوۆ اۋدارعان ل.ن. تولستويدىڭ «اننا كارەنينا» رومانىنىڭ 2 تومدىعى جارىق كورەدى.