تايلاندتا 21 قاراشاعا قاراعان ءتۇنى "عالام ارۋى - 2025" حالىقارالىق سۇلۋلىق بايقاۋىنىڭ جەڭىمپازى انىقتالدى. ءتاج مەكسيكالىق سۇلۋ فاتيما بوش فەرناندەسكە بۇيىردى، - دەپ حابارلايدى aqshamnews.kz ءتىلشىسى.
بۇل كەشتە قازاقستان حالقى 20 جاستاعى دانا الماسوۆاعا ەرەكشە قولداۋ كورسەتتى.
جەڭىمپاز تۋرالى نە بەلگىلى؟
26 جاستاعى فاتيما بوش فەرناندەس كەشتىڭ جۇلدىزىنا اينالدى. ول سىرت كەلبەتىمەن عانا ەمەس، بىلىمىمەن، قوعامدىق بەلسەندىلىگىمەن دە كوزگە ءتۇستى: فاتيما ەكولوگيالىق باستامالارمەن، جاستاردىڭ مۇمكىندىگىن كەڭەيتۋگە باعىتتالعان الەۋمەتتىك باعدارلامالارمەن اينالىسادى. فينالدا ول ايەلدەردىڭ كليماتتىق كۇن تارتىبىندەگى ءرولى تۋرالى كوزقاراسى ءۇشىن ەڭ جوعارى باعالاردىڭ ءبىرىن الدى.
ايتا كەتەيىك، فاتيمانىڭ ەسىمى "عالام ارۋى - 2025" جوباسىنا دايىندىق كەزەڭنەن تانىلدى. بايقاۋ ديرەكتورى ناۆاد يساساگريسيل دايىندىقتا ونى مىندەتتى پرومو-اكسيالارعا بەلسەندى قاتىسپادى دەپ ەل الدىندا ايىپتادى. ول فاتيمانى "اقىماق" دەپ اتادى. كەيىن ءبىرقاتار قاتىسۋشى فاتيماعا قولداۋ ءبىلدىرۋ ءۇشىن زالدان شىعىپ كەتكەن ەدى.
قازاقستان اتىنان كىم قاتىستى؟
دانا الماسوۆا - قوستاناي وبلىسىنىڭ تۋماسى. ول وقۋ، مانساپ جانە الەۋمەتتىك ميسسيانى قاتار الىپ جۇرەتىن جاس بۋىننىڭ وكىلى. حالىقارالىق ساحناعا دەيىن الماسوۆا التى جىل بويى بالالارعا ارنالعان تەلەباعدارلامادا جۇمىس ىستەپ، سپورتپەن اينالىسقان، ءارى PR مەن جارناما سالاسىندا ءبىلىمىن جالعاستىرعان. سۇحباتتارى مەن الەۋمەتتىك جەلىلەرىندە ول ايەلدەردىڭ دامۋى مەن ەكولوگيالىق جاۋاپكەرشىلىك جايىن كوتەرگىسى كەلەتىنىن ايتىپ، بايقاۋدى "قازاقستاندى تانىتىپ، قىزدارعا ءوز كۇشىنە سەنۋگە شابىت بەرەتىن مۇمكىندىك" دەپ اتاپ وتكەن. كورەرمەندەر دانىڭ دايىندىعىن ەرەكشە قىزىعۋشىلىقپەن باقىلاپ وتىردى، اسىرەسە تاي بوكسى جاتتىعۋىنان تۇسىرىلگەن روليك كوپشىلىكتى ءتانتى ەتتى.
قازاقستاندىق ارۋ جۋرناليستەر مەن كورەرمەندەردى اسەر قالدىرعان توپ-5 قاتىسۋشىنىڭ قاتارىنا كىردى.